މާލޭގެ މަސް މާރުކޭޓާއި ލޯކަލް މާރުކޭޓު ހިމެނޭ ޒަމާނީ މާރުކޭޓެއް އިމާރާތް ކުރުމުގެ މަސައްކަތް މި އަންނަ ހަފުތާގެ ތެރޭގައި ފައްޓަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ލޯކަލް ކައުންސިލްތަކަށް ދޭ "ކަންގަތި" އެވޯޑް ދިނުމަށް ރޭ ބޭއްވި ރަސްމިއްޔާތުގައި ރައީސް ވިދާޅުވީ އާ މަސް މާރުކޭޓު އެޅުމުގެ މަސައްކަތް އަންނަ ހަފުތާގައި ފައްޓަވާނެ ކަމާށާއި އަދި މާލޭގެ މަގުތަށް ޒަމާނީ ފެންވަރަކަށް ހެދުމުގެ މަސައްކަތް، ސިޓީ ކައުންސިލް މެދުވެރިކޮށް، އަންނަ އަހަރު ކުރިއަށް ގެންދަވާނެ ކަމަށެވެ.
"މި ސަރުކާރު މިއައީ މިފަދަ އެތައް ފަސޭހަތަކެއް، އެތައް ކުރިއެރުމެއް ރައްޔިތުންނަށް ގެނެސްދޭން. އެކަމުގެ ފުރިހަމަ ޕްލޭނާއެކު، އެކަމުގެ ހެޔޮ ނިޔަތާއި ޢަޒުމާއެކު،" މުއިއްޒު ވިދާޅުވި އެވެ.
މާލޭ މާރުކޭޓު އަލުން އިމާރާތް ކުރުމުގެ މަސައްކަތް، މާލޭގެ މޭޔަރު ކަމުގައި މުއިއްޒު ހުންނެވި އިރު، ކޮންޓްރެކްޓާ ފައިނޭންސިންގެ އުސޫލުން ބަޔަކާ ހަވާލުކުރި އެވެ. އަމަލީ މަސައްކަތް ފެށުމުގެ ކުރިން ސަރުކާރުން ވަނީ އެކަން ހުއްޓުވައިފަ އެވެ. އެއީ، ޕްލޭނިން މިނިސްޓްރީން ހުއްދަ ނުހޯދާ އޮތުމުންނާއި ކޮންސެޕްޓް ޑިޒައިން ފާސް ނުކޮށް އޮތުމުންނެވެ.
"އަޅުގަނޑު މާލޭސިޓީގެ މޭޔަރު ކަމުގައި ހުރެގެން ރައްޔިތުންނަށް ކޮށްދޭން އުޅުނު މުހިންމު ބޮޑެތި ގިނަ ކަންތައްތަކެއް. އެނގިވަޑައިގަންނަވާނެ ފަދައިން، އޭރު އޮތީ ހުއްޓުވާފައި. އަޅުގަނޑުމެން މަސައްކަތް ކުރިން، އޭރު މާލޭގެ މަގުތައް ޒަމާނީ ފެންވަރަކަށް ހަދަން. ލޯކަލް މާރުކޭޓާއި މަސް މާރުކޭޓު، އެއް ފުރާޅެއްގެ ދަށަށް ގެނެސް، އެންމެ ޒަމާނީ ފެންވަރަށް ބިނާވެފައިވާ އިމާރާތަކަށް ހަދަން." ރޭގެ ވާހަކަފުޅުގައި މުއިއްޒު ވިދާޅުވި އެވެ.
މޭޔަރު ކަމުގައި ހުންނެވިއިރު، މުއިއްޒު ވިދާޅުވެފައިވާ ގޮތުގައި އާ މާރުކޭޓަކިީ ހަތަރު ބުރީގެ އިމާރާތެކެވެ. އެ އިމާރާތުގެ ބޭސްމަންޓުގައި ޕާކިން އޭރިއާ، ގްރައުންޑު ފްލޯގައި މަސް މާރުކޭޓު، 1-3 ވަނަ ފްލޯއަށް އާންމު މާރުކޭޓުތައް އެޅުމަށް ނިންމާފައިވާއިރު އެ އިމާރާތުގެ ޓެރަސް ބޭނުން ކުރަން ހަމަޖައްސާފައި އޮތީ ކެފޭ އަކަށެވެ.
ރޭގެ ރަސްމިއްޔާތުގައި ވާހަކަ ދައްކަވަމުން މުއިއްޒު އިތުރަށް ވިދާޅުވީ މާލީ އެއްވެސް ތަކުލީފެއް، އުފުލަން ނުޖެހޭ ގޮތަށް މާލެ އާއި ވިލިމާލޭގައި ހުރި މާލޭހިޔާ އަދި ސިނަމާލެ ފްލެޓްތައް އަލުން އިމާރާތް ކުރުމުގެ މަސައްކަތް ފެބްރުއަރީ މަހު ފައްޓަވާނެ ކަމަށެވެ.
