ދައުލަތުގެ ޕްރޮކިއުމަންޓުގެ ކަންކަން ހިންގާ ބަލަހައްޓާ ނޭޝަނަލް ޓެންޑާ ބޯޑުގެ ހިންގާ ގަވާއިދެއް ފުރަތަމަ ފަހަރަށް އެކުލަވާލައި، އިއްޔެ އެ ގަވާއިދަށް އަމަލުކުރަން ފަށައިފި އެވެ.
ނޭޝަނަލް ޓެންޑާ ބޯޑަކީ ވަކި އަދަދަކަށް ވުރެ މަތީގެ މުދަލާއި ހިދުމަތާއި މަސައްކަތްތަކާއި ކޮންސަލްޓެންސީ ހިދުމަތްތައް ހޯދުމަށް ކުރާ އާންމު ޓެންޑާތައް (ބީލަންތައް) ރެގިއުލޭޓްކޮށް ހިންގުމުގެ ޒިންމާ މަތިކުރެވިފައިވާ، ފިނޭންސް މިނިސްޓްރީގެ ދަށުން އޮންނަ ބޯޑެކެވެ. މި ބޯޑުގެ މައިގަނޑު މަސައްކަތަކީ ޕްރޮކިއުމަންޓު މަރުހަލާގެ އިންސާފުވެރިކަން ކަށަވަރުކުރުމާ އެކު ވީހާ ވެސް ހާމަކަން ބޮޑުކޮށް ބީލަން މަރުހަލާ ކުރިއަށް ގެންދިއުމެވެ.
ހަތް މެމްބަރުން ތިބޭ މި ބޯޑަށް މެމްބަރުން އައްޔަނުކުރަނީ ފިނޭންސް މިނިސްޓަރުގެ ލަފާގެ މަތިން ރައީސުލްޖުމްހޫރިއްޔާ އެވެ.
ބޯޑުގެ މަސްއޫލިއްޔަތުތަކަކީ:
ބޯޑަށް ހުށަހެޅިފައިވާ ޓެންޑަރުތަކުގެ ކަންކަން ގަވާއިދާ އެއްގޮތަށް ކުރިއަށް ގެންގޮސްފައިވާކަން ކަށަވަރުކުރުމާ އެކު، ޓެންޑަރުތަކާ މެދު ގޮތް ނިންމުން
- އެއްބަސްވުންތަކާ ގުޅިގެން ދެބަސްވުމެއް އުފެދޭ ހާލަތުގައި އެޖުޑިކޭޓަރަކީ ނުވަތަ އެޖުޑިކޭޓަރެއް އައްޔަނުކުރާ ފަރާތަކީ ޓެންޑާ ބޯޑު ކަމަށް ބަޔާންކުރާ ހާލަތުގައި އެކަން ކުރުން
- ބޯޑުގެ މަސްއޫލިއްޔަތެއް އަދާކުރަން ހާއްސަ އުސޫލެއް އެކުލަވާލަން ބޯޑަށް ފެންނަ ހާލަތުގައި އެފަދަ އުސޫލުތައް އެކުލަވާލުން
- ބޯޑުގެ ހުއްދައަށް އެދި ހުށަހަޅާ ވޭރިއަޝަންތަކާ މެދު ގޮތް ނިންމުން
އާ މާލިއްޔަތު ގަވާއިދުގެ ދަށުން ޓެންޑާ ބޯޑުން އެކުލަވާލި ގަވާއިދުގައި ބޯޑުގެ ޗެއާޕާސަނާއި ވައިސް ޗެއާޕާސަން އާއި މެމްބަރުންގެ މަސްއޫލިއްޔަތުތަކާއި ސުލޫކީ މިންގަނޑާއި ބޯޑުގެ ބައްދަލުވުންތަކުގެ ބާވަތްތަކާއި ކަންކަން ނިންމުމުގައި ފުރިހަަމަ ކުރަން ޖެހޭ އިޖުރާއަތްތައް ބަޔާންކޮށްފައި ވެ އެވެ.
އޭގެ އިތުރުން ބޯޑުގެ ހުރިހާ ބައްދަލުވުންތަކެއް ޔައުމިއްޔާ ލިޔެ ބަލަހައްޓަން ލާޒިމުކޮށް، އޭގައި ހިމަނަން ޖެހޭ މައުލޫމާތުތައް ވެސް ގަވާއިދުގައި ބަޔާންކޮށްފައި ވެ އެވެ. މި ނިންމުންތައް ފިނޭންސް މިނިސްޓްރީން ކަނޑައަަޅާ އުސޫލެއްގެ ތެރެއިން އާންމުކުރެވޭނެ ކަމަށް ގަވާއިދުގައި އޮތަސް، ބޯޑުން ސިއްރުކުރުމަށް ކަނޑައެޅިދާނެ ކަމަށް ގަވާއިދުގައި އޮވެ އެވެ. ނަމަވެސް ސިއްރުކުރެވޭނެ ހާލަތްތަކެއް ގަވާއިދުން ފެންނާކަށް ނެތެވެ.
ރައީސް ޑރ. މުހައްމަދު މުއިއްޒު ވަނީ މިފަހުން ޓެންޑާ ބޯޑު އަލުން އެކުލަވާލާފަ އެވެ. އެ ބޯޑުގެ ޗެއާޕާސަން އަކަށް ހަމަޖެއްސީ ފިނޭންސްގެ މިނިސްޓްރީގެ ނައިބު އަހުމަދު ސާއިދެވެ.
