ވޮލީބޯލް އެސޯސިއޭޝަން ކަޕްގެ ފިރިހެން ޑިވިޝަންގެ ފައިނަލް ބުރުގެ ފުރަތަމަ މެޗުގައި ކްލަބް ވެމްކޯ އިން ކްލަބް އާބަންކޯ އަތުން 3-2 ސެޓުން މޮޅުވެ، ވަރުގަދަކޮށް މުބާރާތް ފަށައިފި އެވެ.
ފައިނަލް ބުރުގެ ގްރޫޕް އެކެއްގައި އާބަންކޯ އާއި ވެމްކޯގެ އިތުރުން ދެން އޮތީ ދިވެހި ސިފައިންގެ ކްލަބް އެވެ.
ޒުވާނުންގެ މަރުކަޒު އެތެރެ ކޯޓުގައި އިއްޔެ ހަވީރު ކުޅުނު މެޗުގެ ފުރަތަމަ ސެޓު ވެމްކޯ އިން 25-22 އިން ގެންދިޔަ އެވެ. ބްރެޒިލްގެ ކުޅުންތެރިންނާ އެކު، ގައުމީ ޓީމުގެ ކެޕްޓަނަކަށް ކުރިން ހުރި އަލީ ހުޒާމް (ހުޒަންޓެ)ގެ މޮޅު ކުޅުމާ އެކު ފުރަތަމަ ސެޓުގައި، ވެމްކޯ އިން ސެޓު ނިންމުމުގައި ކުރިހޯދި އެވެ. ޕްރިމިލިނަރީ ބުރުގެ ހުރިހާ މެޗަކުން މޮޅުވެގެން، ފައިނަލް ބުރަށް އައި އާބަންކޯ އިން އިސްމާއިލް ސާޖިދު (ކުޑަކާއްޓެ)ގެ ރަނގަޅު ކުޅުމާ އެކު، ދެ ވަނަ ސެޓާއި ތިން ވަނަ ސެޓު، 19-25، 19-25 އިން ގެންދިޔަ އެވެ.
ވެމްކޯ މޮޅުވީ ފޯރިގަދަ ކުޅުމަކަށް ފަހު ދެން ކުޅުނު ދެ ސެޓު ގެންގޮސްގެންނެވެ. އެ ގޮތުން، ވެމްކޯގެ ބްރެޒިލް ކުޅުންތެރިޔާ، ބްރޫނޯ އެންރީކޭ ޑި ސޫޒާގެ ތަފާތާ އެކު، އެ ޓީމުން ފަހު ދެ ސެޓު ގެންދިޔައީ، 26-24 އާއި 20-18 އިންނެވެ.
ފައިނަލް ބުރުގެ ގްރޫޕް ދޭއްގައި ރޭ ޕޮލިސް ކްލަބް އަތުން ސިޓީ ސްޕޯޓްސް ކްލަބް މޮޅުވެފައިވަނީ ސީދާ ތިން ސެޓުންނެވެ. ސިޓީ ސްޕޯޓްސް ކްލަބަކީ ޕްރިލިމިނަރީ ބުރުން އައި ޓީމެކެވެ. މި ގްރޫޕްގައި ދެން އޮތް ސްޕޯޓްސް ކްލަބް ސިޓީ އަކީ އެންމެ ފަހުގެ ޗެމްޕިއަން އެެވެ.
ސިޓީ ސްޕޯޓްސް ކްލަބުން އިއްޔެ ޕޮލިސް ބަލިކުރި މެޗުގައި ސެޓުތައް ގެންދިޔައީ، 25-18، 25-07 އަދި 25-21 އިންނެވެ. މެޗުގެ މޮޅު ކުޅުންތެރިއަކީ ސިޓީ ސްޕޯޓްސް ކްލަބްގެ ނުއެމުހައްމަދު ޓޮކްޓޮއޭފް އެވެ.
