މިލާން (ޑިސެމްބަރު 18) - އިޓާލިއަން ލީގުގައި ރޭ މިލާނަށް ނިސްބަތްވާ ދެ ޓީމު ކަމަށްވާ، އޭސީ މިލާނާއި އިންޓަ މިލާނުން މުހިންމު މޮޅެއް ހޯދައި، ލީގުގެ ރޭހުގައި ކުރިއަށް ޖެހިލައިފި އެވެ.
ލާޒިއޯ އަތުން އިންޓަ މޮޅުވީ 2-0 އިންނެވެ. މިލާނުން މޮންޒާއާ ދެކޮޅަށް ނުކުތް މެޗުން މޮޅުވީ 3-0 އިންނެވެ.
ލީގުގެ އެއް ވަނައިގައި އޮތް އިންޓަ މިލާން 16 މެޗުން 41 ޕޮއިންޓް ހޯދައިފަ އެވެ. ދެ ވަނައިގައި ޔުވެންޓަސް އޮތީ 37 ޕޮއިންޓާ އެކުގަ އެވެ. ތިން ވަނައިގައި މިލާން އޮތީ 32 ޕޮއިންޓް ހޯދައިގެންނެވެ.
އިންޓަ އިން ލާޒިއޯ ބަލިކުރި މެޗުގައި ގޯލްތަށް ޖެހީ ލަޓާރޯ މާޓިނޭޒް އާއި މާކަސް ތުރާމް އެވެ. ލީގު ތާވަލްގެ ލަނޑު ލިސްޓުގެ އެއް ވަނައިގައި މާޓިނޭޒް އޮތީ 15 ގޯލު ޖަހައިގެންނެވެ.
ރޭގެ މެޗުގައި ލާޒިއޯގެ މެނުއެލް ލަޒާރީ އަށް ވަނީ ރަތް ކާޑެއް ވެސް ދައްކައިފަ އެވެ. މިއީ ރެފްރީގެ ނިންމުމަށް ހިތްހަމަނުޖެހުން ފާޅުކުރުމުގެ ސަބަބުން މެނުއަލް ލަޒާރީއަށް ދެއްކި ކާޑެކެވެ.
މި މެޗުން ބަލިވި ލާޒިއޯ ތާވަލްގެ 11 ވަނަ އަށް ވެއްޓިފަ އެވެ.
މިލާންގެ ގޯލްތައް ޖަހައިދިނީ ޓިޖާނީ ރެއިންޑާސް، ޔަން ކާލޯ ސެމިޗް އަދި ނޯއާ އަކަފޯ އެވެ.
ލީގުގައި ރޭ ކުޅުނު އެހެން މެޗުތަކަށް ބަލާއިރު، ރަށުން ބޭރުގައި ރޯމާ ވަނީ ބޮލޮންޔާ އަތުން ބަލިވެފަ އެވެ. މި ސީޒަންގައި ރަނގަޅު ކުޅުމެއް ދައްކަމުން އަންނަ ބޮލޮންޔާ އިން ރޯމާ ބަލިކުރީ 2-0 އިންނެވެ. މި މެޗުގައި ރޯމާގެ މުހިންމު ދެ ފޯވާޑުން ކަމަށްވާ ޕައުލޯ ޑިބާލާ އާއި ރޮމެލޫ ލުކާކޫ ނުކުޅެ އެވެ.
ރޯމާ އަތުން މޮޅުވުމުން ބޮލޮންޔާ ވަނީ ލީގުގެ ހަތަރު ވަނަ އަށް ޖެހިލައިފަ އެވެ. ކުރިން ގަދަ ފަސް ޓީމުގެ ތެރޭގައި އޮތް ރޯމާ ވަނީ ލީގުގެ ހަތް ވަނަ އަށް ވެއްޓިފަ އެވެ.
