އިސްތަންބޫލް، ތުރުކީ (ޑިސެމްބަރު 15) - ތުުރުކީގެ ސުޕަ ލީގުގައި އަންކާރަގުޗޫ އާއި ރިޒެސްޕޯ ބައްދަލުކުރި މެޗަށް އަންކާރަގޫޗޫގެ ރައީސް، ފާރޫކް ކޯޗާ، އެ މެޗުގެ ރެފްރީ، ހަލީލް އުމެޓް އަށް ހަމަލާދިން މައްސަލައިގައި ފާރޫކް އުމުރަށް ސަސްޕެންޑް ކުރަން ނިންމައިފި އެވެ.
ތުރުކީ ލީގުގައި މިދިޔަ ހޯމަ ދުވަހު، އަންކާރަގުޗޫ އާއި ރިޒެސްޕޯ ބައްދަލުކުރި މެޗު ނިމުނީ ދެ ޓީމު 1-1 އިން އެއްވަރުވެ ގެންނެވެ. އަންކާރަގުޗޫ ލަނޑެއް ޖަހައި ލީޑު ހޯދާފައިވަނިކޮށް، ރިޒެސްޕޯ އިން އެއްވަރުކުރީ މެޗުގެ އިތުރު ވަގުތުގަ އެވެ. މި މެޗު ނިމުމާ އެކު، އަންކާރަގުޗޫގެ ރައީސް ފާރުކް ކޯޗާ ވަނީ ދަނޑަށް އަރައި، މެޗުގެ ރެފްރީ ހަލީލް އުމެޓް މެލާގެ މޫނު މަތީގައި ޖަހައިފަ އެވެ. އަދި އޭނާ ދަނޑަށް ވެއްޓިފައި އޮތް ވަގުތުވެސް، އަންކާރަގުޗޫގެ ބައެއް އޮފިޝަލުން އޭނާ އަށް ހަމަލާ ދިނެވެ.
މި މައްސަލައިގައި ތުރުކީ ފުލުހުން ވަނީ ފާރޫކް ކޯޗާ ހައްޔަރުކޮށްފަ އެވެ. ފާރޫކް ކޯޗާ ވަނީ އޭނާ އަށް ކުރެވުނު ކަމަށް މައާފަށް އެދި މަގާމުން އިސްތިއުފާ ދީފަ އެވެ.
ތުރުކީ ފުޓްބޯޅަ ފެޑެރޭޝަނުން ވަނީ ރެފްރީ ހަލީލް އުމެޓް އަށް ހަމަލާ ދިން މައްސަލަ އަވަހަށް ބަލައި ވަނީ ފިޔަވަޅުތަކެއް އަޅައިފަ އެވެ.
އެ ގޮތުން، ތުރުކީ ފުޓްބޯޅަ ފެޑެރޭޝަނުން ނިންމީ ފުޓްބޯޅައިގެ ހުރިހާ ހަރަކާތަކުން ފާރޫކް ކޯޗާ މުޅި އުމުރަށް ސަސްޕެންޑް ކުރުމަށެވެ. އަދި އަންކާރަގޫޗޫ ދެން އެންމެ އަވަހަށް އަމިއްލަ ދަނޑުގައި ކުޅޭ ފަސް މެޗަށް ސަޕޯޓަރުން ނުވެއްދޭއިރު، އެ ކްލަބް ވަނީ 66000 ޑޮލަރުން ޖޫރިމަނާކޮށްފަ އެވެ.
ތުރުކީގެ ޖަސްޓިސް މިނިސްޓަރު، ޔިލްމާޒް ޓުންކް ވިދާޅުވެފައިވަނީ، ރެފްރީ މެލާ އަށް ހަމަލާދިން ހުރިހާ ފަރާތެއްގެ ޝަރީއަތެއް ކުރިއަށްދާނެ ކަމަށެވެ.
އަންކާރަގުޗޫގެ ރައީސް ފާރުކް ކޯޗާ އާއި އޭނާގެ ބައިވެރިިން ދިން ހަމަލާގައި ރެފްރީ މެލާގެ މޫނުގެ ވާތުފަޅި އަށް ވަނީ ވަރަށް ބޮޑަށް އަނިޔާވެފަ އެވެ. ޔުއެފާ އެލީޓް ރެފްރީންގެ ތެރޭގައި ހިމެނޭ މެލާ ނެރުނު ބަޔާނެއްގައި ބުނެފައިވަނީ ފާރޫކް ކޯޗާ ވަނީ މެލާ އަށް މަރުގެ އިންޒާރު ވެސް ދީފައި ކަމަށެވެ.
ފީފާގެ ރައީސް ޖިއާނީ އިންފަންޓީނޯ ވަނީ ރެފްރީ މެލާ އަށް މި ދިން ހަމަލާ ކުށްވެރިކޮށްފަ އެވެ.
