ނިމިދިޔަ ރިޔާސީ އިންތިހާބަށް ރައީސް ޑރ. މުހައްމަދު މުއިއްޒު ކުރެއްވި ހަރަދުތަކުގެ ތެރެއިން 19 މިލިއަން ރުފިޔާ ތަކެތީގެ ގޮތުގައި ކެމްޕޭނަށް ލިބުނު ނަމަވެސް ފައިސާގެ ގޮތުގައި ލިބިފައި ވަނީ އެންމެ 2.1 މިލިއަން ރުފިޔާކަން މިއަދު އިލެކްޝަންސް ކޮމިޝަން (އީސީ) އިން ހާމަކުރި ކެންޑިޑޭޓުންގެ މާލީ ބަޔާނުން ހާމަވެއްޖެ އެވެ.
މިއަހަރުގެ އިންތިހާބުގެ ކެމްޕޭނަށް މުއިއްޒުގެ އަމިއްލަ ފައިސާއިން އެއްވެސް ހަރަދެއް ކުރައްވާފައި ނުވާ ކަމަށް މާލީ ބަޔާނުގައި ބުނެފައިވެ އެވެ. އަދި އެމަނިކުފާނުގެ އަމިއްލަ ތަކެތިން ވެސް ހަރަދު ކުރައްވާފައި ނުވާ ކަމަށް ބަޔާނުން އެނގެ އެވެ.
ވަކިވަކި ފަރުދުންގެ ފަރާތުން 115,000ރ. ރައީސްގެ ކެމްޕޭނަށް ލިބުނުއިރު އޭގެ ތެރެއިން 100,000ރ. ހ. ފިލިގަސްދޮށުގެ, ހުދާ އަލީ ޝަރީފް ދިންއިރު ބާކީ 15,000ރ. ދިނީ މއ. ކިނބި, މުހައްމަދު ލަތީފެވެ. އޭގެ އިތުރުން, ޕީޕީއެމްގެ ފަރާތުން އެމަނިކުފާނުގެ ކެމްޕޭނަށް ފައިސާގެ ގޮތުގައި ޖުމުލަ ދެ މިލިއަން ރުފިޔާ ދީފައިވެ އެވެ.
ތަކެތީގެ ގޮތުގައި ވަކިވަކި ފަރުދުންގެ ފަރާތުން 9,743,200ރ. މުއިއްޒުގެ ކެމްޕޭނަށް ލިބުނުއިރު އޭގެ ތެރޭގައި ދަތުރާއި ހުރުމާއި ކެއުމާއި އަދި އެހެނިހެން މެޓީރިއަލްތައް ވަނީ ހިމަނާފަ އެވެ. އޭގެ އިތުރު އެއްވެސް ތަފްސީލެއް ނެތްއިރު ބިލުތަކަށް ދައްކާފައިވާ ފައިސާ ވެސް ކަނޑައަޅާފައިވަނީ "ލިބިފައިވާ ތަކެތި" ގެ ގޮތުގަ އެވެ.
ތަކެތި ދިން ފަރުދުންގެ ތަފްސީލު
- ހާމިދު އަފީފު, މއ. ޖަނބުގަސްދޮށުގެ - 370,000ރ.
- ސަލާހު ޝަރީފް, މަލަސް, ގއ. ކޮލަމާފުށި - 2,793,000ރ.
- ޝާހިދު އިބްރާހިމް, ނަސްރީނުވިލާ, ގއ. ދެއްވަދޫ - 850,500ރ.
- އިބްރާހިމް ސަނާހު, ނިޝާން, ތ. ތިމަރަފުށި - 435,580ރ.
- އަލީ އިބްރާހިމް, މަދަރާގެ, މާލެ - 820,350ރ.
- އަފޫ ހާމިދު, އާތު, ޅ. ނައިފަރު - 575,500ރ.
- އިސްމާއީލް ސުހައިލް, ނަސީމީވިލާ, ރ. ކަނދޮޅުދޫ - 538,500ރ.
- ފާތިމަތު ތައުފީގް, ޖަވާހިރުވާދީ, ސ. މަރަދޫފޭދޫ - 575,070ރ.
- އަހްމަދު ޒާހިރު, އެރިޔަދޫ, ރ. މީދޫ - 2,500,00ރ.
- މުހައްމަދު އާސިމް, ލަކީސްޓާ, ރ. މީދޫ - 285,200ރ.
ޕީޕީއެމުން ވަނީ އެމަނިކުފާނުގެ ކެމްޕޭނަށް ތަކެތީގެ ގޮތުގައި 4,129,687ރ. ހޭދަކޮށްފަ އެވެ. އޭގެ އިތުރުން, މާސިންގާ އިންވެސްޓްމަންޓުން 2,820,430ރ. އާއި ކްލައިންޓެކް މޯލްޑިވްސްއިން 2,120,750ރ. އަދި ކެޕްޓަން މޯލްޑިވްސްއިން 415,300ރ. މުއިއްޒުގެ ކެމްޕޭނަށް ހަރަދުކޮށްފައިވެ އެވެ.
މިއަދު އާންމުކުރި މާލީ ބަޔާންތަކުން ފެންނަ ގޮތުގައި ދެ ބުރުގެ ކެމްޕެއިނަށް އަށް ކެންޑިޑޭޓުންގެ އަތުން ހަރަދުވިކަމަށް ބުނާ ޖުމުލަ އަދަދަކީ އެންމެ 69،188،675ރ. އެވެ. އެންމެ ބޮޑު ހަރަދެއް ކުރެއްވި ކަމަށް ބަޔާންތަކުން ފެންނަނީ އިންތިހާބު ކާމިޔާބު ކުރެއްވި މިހާރުގެ ރައީސް މުއިއްޒެވެ.
