އެންމެ ފަހުން ބޭއްވި ރިޔާސީ އިންތިހާބުގައި ގާނޫނުގައި ބުނާ މިންގަނޑަށް މާލީ ބަޔާން ހުށަނޭޅުމުން އިންތިހާބުގައި ވާދަކުރި އަށް ކެންޑިޑޭޓުންގެ ތެރެއިން ފަސް ކެނޑިޑޭޓަކު އިލެކްޝަން ކޮމިޝަން (އީސީ)އިން މިއަދު ޖޫރިމަނާކޮށްފި އެވެ.
އީސީން މިކަމާ ގުޅޭގޮތުން ނެރުނު ބަޔާނެއްގައި ބުނީ، އިންތިހާބުގައި ވާދަކުރި ކެންޑިޑޭޓުންގެ މާލީ ބަޔާން ދިރާސާ ކުރުމަށް ފަހު، އިންތިހާބުތަކާ ބެހޭ އާންމު ގާނޫނުގައި ބަޔާންކުރާ ކަންކަން ފުރިހަމަނުވާ މާލީ ބަޔާންތައް ހުށަހަޅާފައިވާ ކެންޑިޑޭޓުންނާއި އެ ކެންޑިޑޭޓުންގެ ރަސްމީ އިންތިހާބީ އެޖެންޓާ މެދު ފިޔަވަޅު އަޅަން އެ ކޮމިޝަނުން މިއަދުގެ ނިންމާފައިވާ ކަމަށެވެ.
މާލީ ބަޔާން ފުރިހަމަނުވާތީ ޖޫރިމަނާކުރި ކެންޑިޑޭޓުންނަކީ:
- އަމިއްލަގޮތުން ވާދަކުރެއްވި އުމަރު ނަސީރު
- އަމިއްލަގޮތުން ވާދަކުރެއްވި ހަސަން ޒަމީލު
- އަމިއްލަގޮތުން ވާދަކުރެއްވި ފާރިސް މައުމޫން
- ދަ ޑިމޮކްރެޓްސްއިން ވާދަކުރެއްވި ހުޅުދޫ ދާއިރާގެ މެމްބަރު އިލްޔާސް ލަބީބު
- އެމްއެންޕީން ވާދަކުރެއްވި ދަނގެތި ދާއިރާގެ މެމްބަރު މުހައްމަދު ނާޒިމް
އީސީން ކެނޑިޑޭޓުން ޖޫރިމަނާ ކުރީ 20،000ރ. އިންނެވެ. އަދި ކެންޑިޑޭޓުންގެ ރަސްމީ އިންތިހާބީ އެޖެންޓު ޖޫރިމަނާ ކުރީ 6000ރ. އިންނެވެ. ޖޫރިމަނާގެ ފައިސާ 30 ދުވަހުގެ ތެރޭގައި އީސީއަށް ދައްކަން ޖެހެ އެވެ.
ކޮމިޝަނުން ކަނޑައަޅާފައިވާ މިންގަނޑަށް މާލީ ބަޔާން ހުށަހެޅުއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ކުރީގެ ރައީސް އިބްރާހިމް މުހައްމަދު ސޯލިހާއި ޖުމްހޫރީ ޕާޓީން ވާދަކުރެއްވި މާމިގިލި ދާއިރާގެ މެމްބަރު ގާސިމް އިބްރާހިމެވެ.
