އިންޑިއާއިން ފިޔާ އެކްސްޕޯޓުކުރުން މަނާކޮށްފައިވާ މި ދަނޑިވަޅުގައި، ރައްޔިތުންނަށް ދަތިވާނެހެން ބާޒާރުގައި ފިޔާގެ އަގު ބޮޑު ނުކުރުމަށް އިކޮނޮމިކް މިނިސްޓްރީން އިލްތިމާސްކޮށްފި އެވެ.
އެ މިނިސްޓްރީން މިއަދު ނެރުނު ބަޔާނެއްގައި ބުނީ ބައެއް ފަރާތްތަކުން ފިޔާގެ އަގު ބޮޑުކުރަމުންދާ ކަމަށް ބުނެ އާންމުންގެ ޝަކުވާތައް އެ މިނިސްޓްރީއަށް ލިބިފައިވާ ކަމަށެވެ.
އިންޑިއާއިން ފިޔާ އެކްސްޕޯޓުކުރުން ހުއްޓާލުމާ އެކު މާލޭގެ ބާޒާރުގައި ފިޔާގެ އަގު ވަނީ ދެގުނަ ބޮޑުވެފަ އެވެ.
އިންޑިއާގެ ނޫސްތަކުން ރިޕޯޓު ކޮށްފައިވާ ގޮތުގައި އަންނަ އަހަރު އޮންނަ އިންޑިއާގެ ލޮކް ސަބާ އިންތިހާބާ ދިމާކޮށް އިންފްލޭޝަން ހުއްޓުވުމުގެ ފިޔަވަޅެއްގެ ގޮތުން, އަންނަ އަހަރުގެ މާޗް މަހާ ހަމައަށް އެ ގައުމުން ފިޔާ އެކްސްޕޯޓު ކުރުން ވަނީ މަނާކޮށްފަ އެވެ.
އިންޑިއާގެ މި ނިންމުމާއެކު މާލޭގެ ބާޒާރުގައި ފިޔާގެ އަގު މިހާރު ހުރީ އުފިލިފައެވެ. އަހަރުގެ މެދުތެރޭ ހިސާބުގައި ބާޒާރުގައި ފިޔާ ބަސްތާއެއްގެ އަގު އުޅުނީ 200ރ. އާ 400ރ. އާ ދެމެދުގެ އަގެއްގަ އެވެ. މިއަދު ބާޒާރުގައި ފިޔާ ބަސްތާއެއް ލިބެން ހުރީ 550ރ. އާއި 800ރ. އާ ދެމެދުގެ އަގެއްގަ އެވެ. ކިލޯއެއްގެ އަގު ހުރީ 30ރ. އާއި 40ރ. އާ ދެމެދު އެވެ.
މިކަމާ ގުޅިގެން މިނިސްޓްރީން އިތުރަށް ބުނީ، މި މައްސަލާގައި އެ މިނިސްޓްރީން ބެލި ބެލުންތަކުން ތިން ކަމެއް ފާހަގަވެފައިވާ ކަަމަށެވެ. އެގޮތުން، މޫސުމީ ހަލާތާ ގުޅިގެން މިވަގުތަށް އިންޑިއާއިން ފިޔާ އެކްސްޕޯޓުކުރުން މަޑުޖައްސާލި ނަމަވެސް އެ ގައުމުން ރާއްޖެއަށް ފިޔާ ލިބުމުގެ ދަތިކަމެއް ދިމާވާނެ ފިޔަވަޅެއް އަޅާފައި ނުވާ ކަމަށް އެ މިނިސްޓްރީން ބުނެފައިވެ އެވެ.
އަދި، ރާއްޖެއަށް ފިޔާ އިމްޕޯޓުކުރާ ފަރާތްތަކާއެކު އެ މިނިސްޓްރީން ދެކެވުނު ވާހަކަތަކުގައި، ފިޔާ ރާއްޖެއަށް އެތެރެކުރުމައިވެސް ދަތިކަމެއް ނެތްކަން ފާހަގަވި ކަމަށްވެސް ބުނެފައިވެ އެވެ.
ނަމަވެސް، އެ މިނިސްޓްރީން 23 ވިޔަފާރިއަކުން އަގުބަލާ ކުރި ދިރާސާއަކުން ދެއްކި ގޮތުގައި މިދިޔަ މަހު 23 އިން މި މަހު 10 އަކަށް ފިޔަލުގެ އަގު 20 އިންސައްތައާއި 50 އިންސައްތައަށް އުފުލިފައިވާކަންވެސް އިކޮނޮމިކް މިނިސްޓްރީގެ ބަޔާނުގައި ބުނެފައިވެ އެވެ.
އޭގެއިތުރުން އެ މިނިސްޓްރީން ބުނި ޒަރޫރީ އެއްވެސް ބާވަތެއް ރާއްޖެ އެތެރެކުރުމުގާ ދަތިކަމެއް ނެތް ކަމަށާއި އެފަދަ ހާލަތެއް ކުރިމަތިވެއްޖެ ނަމަވެސް ސަރުކާރުން އެކަމަށް އެކަށޭނަ ހައްލެއް ހޯދައިދޭނެ ކަމަށެވެ.
