ޔަމަނުގެ ހޫސީންނަށް އެހީތެރިވާ ކަމަށް ބުނެ އިރާންއާ ގުޅުން އޮންނަ ވިޔަފާރި ނެޓްވޯކަކަށް އެމެރިކާއިން ދަތި ކުރުމުގެ ފިޔަވަޅު އަޅައިފި އެވެ.
އެމެރިކާގެ ޓުރެޝަރީ ޑިޕާޓުމަންޓުން އިއްޔެ ނެރުނު ނޫސްބަޔާނެއްގައި ބުނީ އިރާންއާ ގުޅުން އޮންނަ އެ ނެޓުވޯކަށް ދަތި ކުރުމުގެ ފިޔަވަޅު އެޅީ އެހީގެ ގޮތުގައި ހޫސީންނަށް ދިހަ ހާހަށްވުރެ ގިނަ އެމެރިކާ ޑޮލަރު އެ ނެޓުވޯކުން ފޯރުކޮށްދޭން އުޅުމުންނެވެ.
ވަކި ފަރުދުންނާއި އެންޓިޓީތައް ހިމެނޭހެން އެ ނެޓްވޯކުގައި ހިމެނޭ 13 ފަރާތަކަށް އެމެރިކާއިން ދަތި ކުރުމުގެ ފިޔަވަޅު އަޅައިފައިވެ އެވެ. އެ ނެޓްވޯކަކީ އިރާނުގެ ސައީދުލް ޖަމާލްގެ ބޭރު ފައިސާ މާރުކޮށްދޭ ވިޔަފާރި ނެޓްވޯކެކެވެ. އެ ނެޓްވޯކުގެ ގޮފިތައް ޑުބާއީއާއި ލިބުނާނުގައި ވެސް ހުރެ އެވެ.
ހޫސީންގެ އިތުރުން މެދު އިރުމަތީގައި ހަރަކާތްތެރިވާ ގިނަ ޖަމާއަތްތަކަށް އިރާނުން އެހީތެރިކަން ފޯރުކޮށްދޭ ކަމަށް އެމެރިކާއިން ތުހުމަތު ކުރެ އެވެ. އެގޮތުން ރަތް ކަނޑުން ދަތުރު ކުރާ ބޯޓުފަހަރަށް ހަމަލާދީ، ބައެއް ބޯޓުތައް ބާރުގެ ދަށަށް ގެންދިޔުން ފަދަ ކަންކަން ކުރަމުން ހޫސީން ދަނީ އިރާނުގެ ވާގިވެރިވުމާއެކު ކަމަށް އެމެރިކާއިން ނެރުނު ބަޔާނުގައި ބުނެފައިވެ އެވެ.
ހޫސީންނަކީ ޔަމަނުގެ ބޮޑު ބައެއްގެ މައްޗަށް ވެރިކަން ކުރަމުން އަންނަ ޝިއައީ ޖަމާއަތެކެވެ. ފާއިތުވި ދުވަސްތަކުގައި ހޫސީން ވަނީ ފަލަސްތީނާއި އިޒްރޭލު ހަނގުރާމައަށް އަމަލީ ގޮތުން ވަދެ، ރަތް ކަނޑުން ދަތުރު ކުރި އިޒްރޭލާ ގުޅުން އޮންނަ ބައެއް ބޯޓު ފަހަރަށް ހަމަލާދީ، އިޒްރޭލުން ހިފާފައިވާ ފަލަސްތީނުގެ ބިންތަކަށް އަމާޒުކޮށް ވެސް މިސައިލާއި ޑްރޯން ހަމަލާތައް ފޮނުވާލައިފަ އެވެ.
އެމެރިކާގެ ބަޔާނުގައި އިތުރަށް ބުނެފައި ވަނީ ކުރިއަށް އޮތް ތަނުގައި ވެސް އެފަދަ ހަރަކާތްތަކަށް ވާގިވެރިވާ ނެޓްވޯކުތައް ދެނެގަނެ ފިޔަވަޅުތައް އަޅަމުން ގެންދާނެ ކަމަށެވެ.
ޓެރަރިޒަމަށް ވާގިވެރިވާ ކަމަށް ބުނެ ވިޔަފާރި ނެޓްވޯކުތަކަށް އެމެރިކާއިން ދަތި ކުރުމުގެ ފިޔަވަޅު އަޅަމުން ދާއިރު، ފަލަސްތީނުގެ ކުށެއް ނެތް އާންމުންނަށް އަމާޒުކޮށް އިޒްރޭލުން ހިންގަމުން ގެންދާ ގަތުލުއާއްމުތަކަށް އެމެރިކާއިން ދަނީ ފަންނީ ގޮތުންނާއި މާލީ ގޮތުން އަދި އަމަލީ ގޮތުން ވެސް އެހީތެރިކަން ފޯރުކޮށްދެމުންނެވެ.
