މިހާރު ކުރިއަށްދާ ވޮލީބޯލް އެސޯސިއޭޝަން ކަޕްގެ ފިރިހެން ޑިވިޝަންގެ ކުއާޓާ ފައިނަލުން ކްލަބް ހާފްލައިންލިންކްއޭޖް އާއި ކްލަބް އާބަންކޯ، ބީޖީ ސްޕޯޓްސް ކްލަބް އަދި ގުޑީސް ސްޕޯޓްސް ކްލަބް ވަނީ ފުރުސަތު ހޯދައިފި އެވެ.
ގްރޫޕް އޭގައި ކުޅުނު ތިން މެޗުން ވެސް ހާފްލައިން ވަނީ މޮޅުވެފަ އެވެ. ހާފްލައިން އިން ބްރަދަހުޑް ސްޕޯޓްސް ކްލަބާ ދެކޮޅަށް ކުޅުނު މެޗުން ސީދާ ތިން ސެޓުން މޮޅުވިއިރު، ސެޓުތައް ގެންގޮސްފައިވަނީ 25-10، 25-15 އަދި 25-19 އިންނެވެ. މޮޅު ކުޅުންތެރިއަކީ ހާފްލައިންގެ އަހުމަދު ޝަރީފް އެވެ.
ގްރޫޕް ބީގައި ހިމެނޭ އާބަންކޯ އިން ކުޅުނު ދެ ވަނަ މެޗުގައި ވަނީ ޕިނަކްލް ސްޕޯޓްސް ކްލަބް އަތުން ސީދާ ތިން ސެޓުން މޮޅުވެފަ އެވެ. ވަރުގަދަ ސްކޮޑަކާ އެކު މި ފަހަރުގެ މުބާރާތަށް ކުރިމަތިލި އާބަންކޯ އިން ސެޓުތައް ގެންދިޔައީ 25-08، 25-15 އަދި 25-15 އިންނެވެ. މެޗުގެ މޮޅު ކުޅުންތެރިއަކަށް ހޮވިފައިވަނީ އާބަންކޯ ޓީމުގެ ޝަމާއިލް ހުސެއިން އެވެ.
އެ ގްރޫޕްގައި އާބަންކޯ ކުޅޭ ފަހު މެޗުގައި މިއަދު ހަވީރު ޑަބްލިއު ސްޕޯޓްސް ކްލަބާ ބައްދަލުކުރާނެ އެވެ.
ގްރޫޕް ސީގައި ގުޑީސް އާއި ބީޖީން ވަނީ ކުޅުނު ދެ މެޗުން މޮޅުވެ، ބާކީ މެޗެއް އޮއްވައި، ކުއާޓާ ފައިނަލްގެ ޖާގަ ޔަގީންކޮށްފަ އެވެ.
ވިިލިނގިލީ ޒުވާނުންގެ ޖަމިއްޔާއާ ދެކޮޅަށް ބީޖީން ކުޅުނު މެޗުގައި އެ ޓީމުން ސެޓުތައް ގެންގޮސްފައިވަނީ 25-15، 25-21 އަދި 25-22 އިންނެވެ. މެޗުގެ މޮޅު ކުޅުންތެރިއަކީ ބީޖީގެ އަބްދުލްޝުކޫރު އަބްދުލް ސައްތާރު އެވެ. ގުޑީސް ކުޅުނު މެޗުން ވަނީ ޔޫތު ނިއު ޖެނެރޭޝަން އަތުން ސީދާ ތިން ސެޓުން މޮޅުވެފަ އެވެ. ގުޑީސް އިން ސެޓުތައް ގެންދިޔައީ 25-19، 25-11 އަދި 25-23 އިންނެވެ. މެޗުގެ މޮޅު ކުޅުންތެރިއަކީ އާދަމް އަހުމަދު އެވެ.
އެސޯސިއޭޝަން ކަޕްގައި މިއަދު އޮތީ 12:15 ގައި އެސްޕަޔާ ފޯ އޯލް އިނީޝިއޭޓިވް ސްޕޯޓްސް ކްލަބް އާއި ވޮލީބޯލް ފެމިލީ އެސޯސިއޭޝަން ކުޅޭ މެޗާއި 14:15 ގައި ރަންވެލި ސްޕޯޓްސް ކްލަބް އާއި ޔޫތު ސްޕޯޓްސް ކްލަބް ބައްދަލުކުރާ މެޗާއި 16:15 ގައި އާބަންކޯ އާއި ޑަބްލިއު ސްޕޯޓްސް ކްލަބް ކުޅޭ މެޗާއި މިރޭ 20:15 ގައި ގުޑީސް އާއި ބީޖީ ކުޅޭ މެެޗެވެ.
