ބަންގްލަދޭޝް މީހެއް ކަމަށްވާ މުހައްމަދު ލިޓަން، 35، މަރާލި ކަމުގެ ތުހުމަތުގައި ގދ ތިނަދޫ, މަނާރު, މުހައްމަދު ނިޒާމުގެ މައްޗަށް އުފުލާފައިވާ ދައުވާތައް ސާބިތު ކުރުމަށް ދައުލަތުން ހުށަހަޅާފައިވާ ބައެއް ހެކިތައް ރައްކާތެރި ކުރުމުގެ އަމުރެއް ނެރެދޭން ކްރިމިނަލް ކޯޓުން ނިންމައިފި އެވެ.
ލިޓަންގެ މަރުގެ މައްސަލާގައި ނިޒާމުގެ މައްޗަށް ދައުލަތުން ކުރަނީ ގަސްތުގައި މީހަކު މެރުމުގެ ދައުވާއާއި, ވައްކަމުގެ ދައުވާގެ އިތުރުން ޑައިމޯފިން ޓްރެފިކް ކުރުމުގެ ދައުވާ އެވެ. މި ދައުވާތަކުގެ ޝަރީއަތް ކްރިމިނަލް ކޯޓުގައި ގެންދަވަނީ ގާޒީ މުހައްމަދު މިސްބާހެވެ.
މައްސަލާގައި އެންމެ ފަހުން ބޭއްވި އަޑުއެހުމުގައި ދައުލަތުން ވަނީ ދައުލަތުގެ ހެކިތައް ސިއްރު ކޮށްދިނުމުގެ އަމުރަކަށް އެދިފަ އެވެ. އެހެން ނަމަވެސް, މައްސަލައިގެ ހުރިހާ ލިޔެކިޔުންތައް ނުލިބޭތީ ނިޒާމުގެ ދިފާއީ ވަކީލު މަޖީދު އަލީ އެދިވަޑައިގަތީ ލިޔެކިޔުންތައް ހަމަކުރުމަށް ފަހު ހެކި ރައްކާތެރި ކުރުމުގެ އަމުރާ ގުޅޭ ގޮތެއް ނިންމުމުގެ ބައި ކުރިއަށް ގެންދިއުމަށެވެ.
އޭގެ މަހަކަށްވުރެ ގިނަ ދުވަސްފަހުން މިއަދު ބޭއްވި އަޑުއެހުމުގައި ވެސް ދައުލަތުން ވަނީ ހެކި ސިއްރުކޮށް ދިނުމުގެ އަމުރަކަށް އެދިފަ އެވެ. ދިފާއީ ވަކީލަށް ލިބެންޖެހޭ ލިޔެކިއުންތައް އަދިވެސް ލިބިފައި ނެތް ނަމަވެސް, ވަކީލު މަޖީދު ވިދާޅުވީ ހެކި ސިއްރު ކުރުމަށް އިއުތިރާޖެއް ނެތް ކަމަށެވެ.
އެހެންކަމުން, މި މައްސަލަ ބައްލަވާ ގާޒީ މިސްބާހު ނިންމެވީ ދައުލަތުގެ ހެކިތައް ރައްކާތެރި ކުރުމުގެ އަމުރެއް ނެރެދިނުމަށެވެ. މި މައްސަލާގައި ސިއްރު ކުރަން ދައުލަތުން އެދުނީ ސިއްރު ހެކިވެރިޔާގެ މައުލޫމާތާއި, މައްސަލަ ތަހުގީގު ކުރި ފަރާތުގެ މައުލޫމާތެވެ.
ގާޒީ މިސްބާހު ވިދާޅުވި ގޮތުތުގައި މި މައްސަލައިގެ އަޑުއެހުމެއް ދެން ތާވަލު ކުރައްވާނީ ދިފާއީ ވަކީލަށް ލިޔެކިއުންތައް ލިބި, އެކަން ކޯޓަށް އެންގުމުންނެވެ.
މަސްލައިގެ ފަސްފަހަތް؛
ޑިސެމްބަރު 28، 2022 ގައި ފުލުހުންނަށް ކުރި ރިޕޯޓަކާ ގުޅިގެން ހޯދި ހޯދުމުން އެނގުނު ގޮތުގައި އެންމެ ފަހުން އެ ދެ މީހުން ފެނިފައިވަނީ ތެޔޮބޯޓެއްގައި ވިލިމާލޭ ފަޅުން ނުކުމެގެން ދަނިކޮށް ކަމަށްވެ އެވެ.
ޖެނުއަރީ 01، 2023 ގައި އެ ދެ މީހުން ދަތުރުކުރި ތެޔޮބޯޓު ވަނީ ކ. ހުޅުލެ ނެރު ކައިރިން ފެނިފަ އެވެ. ނަމަވެސް ބޯޓުގައި ލިޓަން އަދި ނިޒާމް ވެސް ނެތެވެ. އެ ދެ މީހުން ހޯދުމަށް ފުލުހުންގެ އޮޕަރޭޝަން ހުއްޓާނުލާ ކުރިއަށް ގެންދަނިކޮށް ނިޒާމް މާލެއިން ފެނުނީ އާންމު މީހަކު ސޯޝަލް މީޑިއާގައި އޭނާ ފެނިގެން ހިއްސާކުރި ފޮޓޯއަކާ ގުޅިގެންނެވެ.
އޭގެ ފަހުން މާލޭ ގެސްޓްހައުސް އަކުން އޭނާ ހައްޔަރުކޮށް ކްރިމިނަލް ކޯޓުން އޭނާގެ މައްޗަށް 60 ދުވަހުގެ ބަންދުގެ މުއްދަތެއް ޖެހި އެވެ. ނިޒާމް އަދިވެސް ބަންދުގައި ހުރި އިރު، އޭނާ ހައްޔަރުކުރީ ލިޓަންގެ މަރުގެ މައްސަލައިގައި ކަމަށް ފުލުހުން ވަނީ ބުނެފަ އެވެ.
ދައުލަތުން ތުހުމަތު ކުރަނީ، ލިޓަންއަށް ނޭގި ހުއްޓާ އޭނާ މޫދަށް ކޮއްޕާލައިގެން އޭނާ މަރާލާފައިވާ ކަމަށެވެ. އެ ހާދިސާ ހިނގީ ޑިސެމްބަރު 28، ގެ 19:00 އާ 20:30 އާ ދެމެދުގެ ވަގުތެއްގައި ކަމަށެވެ. އެ ތުހުމަތުގައި ނިޒާމުގެ މައްޗަށް އެނގި ހުރެ މީހަކު މަރާލުމުގެ ދައުވާ ވަނީ އުފުލައިފަ އެވެ.
އޭނާގެ މައްޗަށް ވައްކަމުގެ ދައުވާ ކުރަނީ ދޯނިން 51،000ރ. ވަގަށް ނެގި ކަމުގެ ތުހުމަތުގަ އެވެ.
ލިޓަންގެ ހަށިގަނޑު ނުފެނުނު ނަމަވެސް ނިޒާމުގެ އަމަލުތަކަކީ މީހަކު މަރާލުމުގެ އަމަލެއް ކަން ޝަރީއަތަށް ސާބިތު ކުރެވޭނެ ކަމަށް ޕްރޮސެކިއުޓާ ޖެނެރަލް ހުސައިން ޝަމީމް ވަނީ މީގެ ކުރިން ވިދާޅުވެފަ އެވެ.
