އެމެރިކާގައި ތައުލީމު ހާސިލު ކުރަމުންދިޔަ ފަލަސްތީނުގެ ތިން ޒުވާނުންނަށް އެގައުމުގެ ބާލިންޓަނުގައި ބަޑިން ހަމަލާދީ ޒަހަމުކޮށްލާފައިވާ ކަމަށް ވާމަންޓުގެ ފުލުހުން ބުނެފި އެވެ.
ވާމަންޓުގެ ފުލުހުންނާ ހަވާލާދީ ވޮޝިންޓަން ޓައިމްސްއިން ރިޕޯޓުކޮށްފައި ވާގޮތުގައި އެ ހަމަލާގައި ޒަހަމުވެފައި ވަނީ ފަލަސްތީނަށް ނިސްބަތްވާ ޒުވާން ތިން ފިރިހެނުންނެވެ. އެ ތިން ޒުވާނުންގެ ތެރެއިން ދެ ކުދިންނަކީ މިހާރު އެމެރިކާގެ ރައްޔިތުންނެވެ. އަނެއް ޒުވާނާއަކީ ގަވާއިދާ އެއްގޮތަށް އެމެރިކާގައި ދިރިއުޅެމުންދާ މީހެކެވެ. އެ ތިން ޒުވާނުންގެ އުމުރަކީ ވެސް 20 އަހަރު ކަމަށް އެ ނޫހުގައި ރިޕޯޓުކޮށްފައިވެ އެވެ.
ވާމަންޓުގެ ފުލުހުން ބުނެފައި ވަނީ އެ ތިން ޒުވާނުންނަށް ހަމަލާދީފައި ވަނީ އެއްވެސް ވާހަކައެއް ދެއްކުމެއް ނުވަތަ އިންޒާރެއް ދިނުމެއް ނެތި ހަތިޔާރު އަޅައިގެން ހުރި މީހެއް ކަމަށެވެ. އެ ޒުވާނުންނާ ދިމާލަށް ހަތިޔާރު ހިފައިގެން ހުރި މީހާ ހަތަރު ވަޒަން ޖެހި ކަމަށް ވާމަންޓުގެ ފުލުހުން ބުނެފައިވެ އެވެ.
އެމީހުންނަށް ހަމަލާ ދިންއިރު، އެ ތިން ޒުވާނުންގެ ތެރެއިން ދެ ކުދިން ތިބީ އަރަބިން އަޅާ ބާވަތުގެ ދެ ކެފިޔާ ނުވަތަ ފޮށާ އަޅައިގެން ކަމަށް ވެސް ފުލުހުން ބުނެފައިވެ އެވެ.
އެ ކުދިންނަކީ ފަލަސްތީނުގެ ހުޅަނގު އައްސޭރީގައި ހުންނަ ރާމަﷲ ފްރެންޑްސް ސްކޫލުގެ ފަރާތުން އެމެރިކާގައި ތައުލީމު ހާސިލު ކުރަމުންދިޔަ ދަރިވަރުންތަކެއް ކަމަށް އެ ސްކޫލުން ވަނީ މިރޭ ނެރުނު ބަޔާނެއްގައި ބުނެފަ އެވެ.
އެ ބަޔާނުގައި އެ ސްކޫލުން ބުނެފައި ވަނީ އެ ކުދިންގެ ފުރާނައަށް ގެއްލުމެއް ވެފައި ނުވާތީ އެކަމާ އުފާ ކުރާ ކަމަށާއި އެކުދިންނަށް އަވަސް ޝިފާއެއް މިންވަރު ކުރެއްވުން އެދި ދުޢާ ކުރާ ކަމަށެވެ.
އެ ކުދިންނަށް ހަމަލާ ދިން މީހާ ހޯދުމުގެ މަސައްކަތް އެމެރިކާގެ ފުލުހުން ކުރަމުންދާއިރު، ދަ ކައުންސިލް އޮން އެމެރިކަން އިސްލާމިކް ރިލޭޝަންސް އިން ވަނީ ހަމަލާދިން މީހާ ދެނެގަނެ، ހައްޔަރު ކުރެެވޭ ވަރުގެ މައުލޫމާތެއް ފޯރުކޮށްދޭ ފަރާތަކަށް 10،000 އެމެރިކާ ޑޮލަރު ދޭން ހުށަހަޅައިފަ އެވެ.
