ފުލުހުންގެ ޑެޕިއުޓީ ކޮމިޝަނަރުންގެ މަގާމުގައި ތިއްބެވި އަލީ ރަޝީދާއި މަންނާނު ޔޫސުފް އެ މަގާމުން މިއަދު އިސްތިއުފާ ދެއްވައިފި އެވެ.
"އަދަދު" އެނގިފައިވާ ގޮތުގައި އެ ދެ ބޭފުޅުން އިސްތިއުފާ ދެއްވައިފައި ވަނީ ސަރުކާރުން އެކަން އެގޮތަށް ކުރުމަށް އަންގައިގެންނެވެ. އެ ދެ ބޭފުޅުން އިސްތިއުފާ ދެއްވިކަން ހޯމް މިނިސްޓަރު، އިހުސާން އަބްދުﷲ ވަނީ "އަދަދު" އަށް ކަށަވަރު ކޮށްދެއްވައިފަ އެވެ.
މަގާމުން އިސްތިއުފާ ދެެއްވިއިރު، މަންނާން ޔޫސުފް ހުންނެވީ އެކްޓިން ޕޮލިސް ކޮމިޝަނަރު ކަމުގެ މަގާމުގަ އެވެ. އެނާ އެ މަގާމަށް އައްޔަން ކުރީ އެ ކޮމިޝަނަރުގެ މަގާމުން މުހައްމަދު ހަމީދު ރިޓަޔާ ކުރެއްވުމުންނެވެ.
އަލީ ރަޝީދާއި މަންނާނު ޑެޕިިއުޓީ ކޮމިޝަނަރުކަމުން އިސްތިއުފާ ދެއްވިއިރު، ފުލުހުންގެ އިދާރާއިން ވަކިކޮށްފައި ހުރި، ކުރީގެ އެސިސްޓަންޓް ކޮމިޝަނަރު އަހުމަދު މުހައްމަދު (ޓޫފޯ) ޕޮލިސް ކޮމިޝަނަރުގެ މަގާމަށް އަައްޔަނު ކުރަން މަސައްކަތް ކުރަމުންދާކަން މި ނޫހަށް ވަނީ އެނގިފަ އެވެ.
އަހުމަދު މުހައްމަދު (ޓޫފޯ) މަގާމުން ވަކިކުރީ، ފުލުހުންގެ ބޯޑުން ނިންމި ނިންމުމަކާ ގުޅިގެން އޮކްޓޯބަރު 10, 2022 ގަ އެވެ. އެ މައްސަލަ ސިވިލް ކޯޓަށް ވެސް ހުށަހެޅި އެވެ. ސިވިލް ކޯޓުގެ ގާޒީ އަލީ އަބްދުﷲ ނެރުއްވި ހުކުމުގައިވަނީ އިސް އޮފިސަރަކު މަގާމުން ވަކިކުރެވޭނީ ތުހުމަތު ކުރެވޭ މައްސަލައަކާއި، މައްސަލައިގެ ބާވަތާއި، އެ ކަން ސާބިތުވާ ވަރަށް ހެކި އޮވެގެން ކަން ގާނޫނުގައި ބުނެފައިވާ ކަމަށާއި ޕޮލިސް ބޯޑުގެ އެފަދަ ނިންމުމެއް ފެންނާކަށް ނެތް ކަމަށެވެ.
އެެހެން ކަމުން ޕޮލިސް ބޯޑުގެ ލަފައެއް ތަންފީޒުކުރަން ކަމަށް ބުނެ އެ އޮފިސަރުން މަގާމުން ވަކިކުރީ ގާނޫނާ ހިލާފަށް ކަމަށް ސިވިލް ކޯޓުގެ ހުކުމުގައިވެ އެވެ.
އޮފިސަރުންނާ އެއްކޮޅަށް ސިވިލް ކޯޓުން ކުރި ހުކުމް ދައުލަތުގެ ފަރާތުން ވަނީ ހައި ކޯޓުގައި އިސްތިއުނާފުކޮށްފަ އެވެ. އިސްތިއުނާފު މަރުހަލާ ނިމެންދެން އަދި ހައި ކޯޓުން ވަކި ގޮތެއް ނިންމަންދެން ދަށު ކޯޓުގެ ހުކުމް ތަންފީޒުކުރުން މަޑުޖައްސައިލުމަށް ޖޫން 6, 2023 ގައި އޮތީ ހުކުމް ކޮށްފަ އެވެ. އޭގެ ފަހުން އެ މައްސަލައިގެ އަޑުއެހުމެއް ބާއްވާފައި ނުވެ އެވެ.
ޕޮލިސް ކޮމިޝަނަރަކަށް އަހުމަދު މުހައްމަދު އައްޔަން ކުރެވޭނީ ކޯޓުގައި އޮތް މައްސަލަ ނިންމުމުންނެވެ. އޭގެ ކުރިން އެކްޓިން ޕޮލިސް ކޮމިޝަނަރަކަށް މިހާރު އެސިސްޓެންޓު ޕޮލިސް ކޮމިޝަނަރަކަށް ހުންނެވި ފަރުހާދު ފިކުރީ ހަމަޖައްސާނެ ކަމަށް އަދަދު ނޫހާ ވާހަކަ ދެއްކެވި އޮފިޝަލް ވިދާޅުވި އެވެ.
