ފަތުރުވެރިކަން ފުޅާކުރުމަށް މަސައްކަތް ކުރާ ކައުންސިލަކާއެކު އިތުރު ދެ ކައުންސިލެއް އުފައްދަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފި އެވެ.
ރައީސް އޮފީހުގައި މިއަދު ނޫސްވެރިންނާ ބައްދަލުކުރައްވައި ވާހަކަ ދައްކަވަމުން ރައީސް އޮފީހުގެ ސެކެޓްރީ މުހައްމަދު ފިރުޒުލް ވިދާޅުވީ އެ ތިން ކައުންސިލް އަކީ ސޯޝަލް ކައުންސިލް އާއި އިކޮނޮމިކް ކައުންސިލް އަދި ވިޒިޓާ އިކޮނޮމީ ކައުންސިލް ކަމަށެވެ.
އޭނާ ވިދާޅުވި ގޮތުގައި މީގެ ތެރެއިން އިކޮނޮމިކް ކައުންސިލްގެ ރިޔާސަތު ބަލައްހައްޓަވާނީީ އިކޮނޮމިކް މިނިސްޓަރު މުހައްމަދު ސައީދެވެ.
ސޯޝަލް ކައުންސިލްގެ ރިޔާސަތު ބަލަހައްޓަވާނީ ރައީސުލްޖުމްހޫރިއްޔާގެ ނައިބު ހުސެން މުހައްމަދު ލަތީފެވެ. އަދި ވިޒިޓާ އިކޮނޮމީ ކައުންސިލްގެ ރިޔާސަތު ބަލަހައްޓަވާނީ ރައީސުލްޖުމްހޫރިއްޔާ މުއިއްޒެވެ.
ސޯޝަލް ކައުންސިލް އާއި އިކޮނޮމިކް ކައުންސިލުގެ ނަމުގައި ކުރީ ސަރުކާރުން ވެސް ދެ ކައުންސިލެއް ހިންގި އެވެ. ނަމަވެސް ވިޒިޓާ އިކޮނޮމީ ކައުންސިލަކީ މުޅިން އާ ކައުންސިލެކެވެ.
ފިރުޒުލް ވިދާޅުވީ ވިޒިޓާ އިކޮނޮމީ ކައުންސިލް އުފައްދަން ރައީސް ނިންމެވީ ރާއްޖޭގެ ޓޫރިޒަމް ފުޅާކޮށް ކުރިއަރުވަން ހާއްސަ ސަމާލުކަމެއް ދީގެން މަސައްކަތް ކުރުމަށް ކަމަށެވެ.
އެގޮތުން އެ ކައުންސިލުގެ މެންޑޭޓުގައި ޓޫރިޒަމް ޑައިވާސިފައިކޮށް އެކި ބާވަތުގެ ޓޫރިޒަމް ޕްރޮމޯޓްކުރުން ހިމެނޭ ކަމަށް އޭނާ ވިދާޅުވި އެވެ.
އެ ދާއިރާތަކުގެ ތެރޭގައި ތައުލީމީ، ސިއްހީ، ތާރީހީ ފަތުރުވެރިކަމުގެ ޕްރޮޑަކްޓްތައް ހިމެނެ އެވެ. އަދި ރާއްޖޭގައި މިހާރުވެސް ހިންގަމުން އަންނަ ލެއިޝާ ޓޫރިޒަމް އިތުރަށް ފުޅާކުރުންވެސް ހިމެނޭ ކަމަށް ފިރުޒުލް ވިދާޅުވި އެވެ.
