ކުޑަކުދިންގެ ހައްގުތަކަށް މަސައްކަތްކުރާ އެންޖީއޯތަކަށް ދިރާގު ރޯޑް ރޭހުން ބޮޑު އެހީއެއް

ދިރާގު މޯލްޑިވްސް ރޯޑް ރޭސް 2023 މެދުވެރިކޮށް ކުޑަކުދިންގެ ރައްކާތެރިކަމަށް މަސައްކަތްކުރާ 12 އެންޖީއޯ އަކަށް 635,000 ރުފިޔާ ހަދިޔާކޮށްފިއެވެ.

އެހެން އަހަރުތަކެކޭ އެއްފަދައިން މިއަހަރުގެ ދިރާގު މޯލްޑިވްސް ރޯޑް ރޭސްވެސް ހާއްސަ ކޮށްފައިވަނީ ކުޑަކުދިންގެ ރައްކާތެރިކަމަށެވެ. އެގޮތުން މި ދުވުމުގައި ކުޑަކުދިންގެ ރައްކާތެރިކަމުގެ ދާއިރާގައި ހަރަކާތްތެރިވާ އެންޖީއޯތަކަށް އާންމުން ހޭލުންތެރިކުރުވުމަށާއި ފަންޑްރެއިޒް ކުރުމުގެ ފުރުސަތު ވަނީ ފޯރުކޮށްދީފަ އެވެ.

މި އަހަރުގެ ރޯޑް ރޭހުގައި ދިރާގުންވަނީ އެއްބައިވަންތަ މާހައުލެއް ބިނާކުރުމަށާއި ކުޑަކުދިންގެ ރައްކާތެރިކަމަށާއި އަނިޔާއިން ކުޑަކުދިން ހިމާޔަތްކުރުމުގެ އިތުރުން ކުދިންގެ ދުޅަހެޔޮކަމަށް ހޭލުންތެރިކަން އިތުރުކުރުމަށް މަސައްކަތް ކުރާ 12 އެންޖީއޯއަކާއެކު ޕާޓްނާޝިޕް ގާއިމުކޮށްފަ އެވެ.

އަދި ކޮންމެ ދުވުންތެރިއެއްވެސް ރޭހަށް ރަޖިސްޓްރީ ކުރިއިރު، އިހްތިޔާރު ކުރާ އެންއެންޖީއޯއެއް ނޮމިނޭޓް ކުރުމުގެ ފުރުސަތު އޮތީ ހުޅުވާލާފަ އެެވެ. މިގޮތުން ބައިވެރިންގެ ފަރާތުން އެންމެ ގިނައިން ނޮމިނޭޓް ކުރެވުނު ފަސް އެންޖީއޯއަކަށް ބެހިގެންދާގޮތަށް ދިރާގުން ޖުމުލަ 200،000 ރުފިޔާގެ ހާއްސަ ޑޮނޭޝަންއެއް ހަދިޔާކުރި އެވެ.

މީގެ އިތުރުން ރޯޑް ރޭހުގެ ހުރިހާ ޕާޓްނަރު އެންޖީއޯތަކަށް ބެހިގެންދާގޮތަށް ކޮންމެ ރަޖިސްޓްރޭޝަން ކިޓަކުން 100 ރުފިޔާއާއި ރީތި ބިބް ނަންބަރު ވިއްކައިގެން ލިބުނު ފައިސާއިން ޖުމްލަ 435،000 ރުފިޔާ ވަނީ ހަދިޔާކޮށްފަ އެވެ.

އެގޮތުން މިއަހަރުގެ ދިރާގު މޯލްޑިވްސް ރޯޑްރޭސް މެދުވެރިކޮށް ޖުމުލަ 635000 ރުފިޔާ ވަނީ އެންޖީއޯތަކަށް ވަނީ ހަދިޔާކޮށްފައެވެ.

ދިރާގުން ބުނިގޮތުގައި އެކުންފުނީގެ އުއްމީދަކީ މި އެހީގެ ސަބަބުން އެ ޖަމިއްޔާތަކުގެ ޕްރޮގްރާމްތައް ފެށުމަށް މަގުފަހިވެގެންދިއުމެވެ. އަދި ހާއްސަކޮށް ރާއްޖޭގެ އެކި ކަންކޮޅުތަކުގައި ކުޑަކުދިން ހިމާޔަތްކުރުމަށް ކުރާ މުހިންމު މަސައްކަތްތަކުގެ ތެރެއިން އެ ޖަމިއްޔާތަކުގެ ޕްލޭންތައް ފެށުމަށް ހިތްވަރު ލިބިގެންދާނެކަމަށް އުންމީދުކުރާ ކަމަށްވެސް އެކުންފުނިން ވަނީ ބުނެފައެވެ.

ރޯޑް ރޭހުގެ ބައިވެރިންގެ އެންމެ ގިނަ ނޮމިނޭޝަން ލިބުނު 5 އެންޖީއޯ:

1. ކެންސަރު ސޮސައިޓީ އޮފް މޯލްޑިވްސް
2. އާކް-އެޑްވޮކޭޓިން ދަ ރައިޓްސް އޮފް ޗިލްޑްރަން
3. މޯލްޑިވްސް އޯޓިޒަމް އެސޯސިއޭޝަން
4. ޓައިނީ ހާޓްސް އޮފް މޯލްޑިވްސް
5. މޯލްޑިވްސް ތެލެސީމިއާ ސޮސައިޓީ

ދިރާގު މޯލްޑިވްސް ރޯޑް ރޭހުގެ އެންޑޯސްކޮށްފައިވާ އިތުރު އެންޖީއޯ ތަކަކީ:

• ޗައިލްޑް އެބިއުސް ޕްރިވެންޝަން ސޮސައިޓީ
• ޑައިބެޓީސް ސޮސައިޓީ އޮފް މޯލްޑިވްސް
• ބްލައިންޑް އެންޑް ވިޝުއަލް އިމްޕެއާޑް ސޮސައިޓީ އޮފް މޯލްޑިވްސް (ބީވީއައިއެސްއެމް)
• ކެއާ ސޮސައިޓީ
• މޮމްސް އެއިޑް
• ސޮސައިޓީ ފޯ ހެލްތް އެޑިއުކޭޝަން (ޝީ)
• މޯލްޑިވްސް އެސޯސިއޭޝަން އޮފް ޕާސަންސް ވިތް ޑިސްއެބިލިޓީސް (އެމްއޭޕީޑީ)

ދިރާގު މޯލްޑިވްސް ރޯޑް ރޭހަކީ ދިވެހިރާއްޖޭގައި ބާއްވާ ފުރަތަމަ އަދި ހަމައެކަނި ބައިނަލްއަގުވާމީ ދުވުމެވެ. އަދި މިއީ ވޯލްޑް އެތްލެޓިކްސް ސަޓިފައިޑް ރޭސް ރޫޓަކާއެކު އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް) ވޯލްޑް ރަނިން ކަލަންޑަރުގައި ލިސްޓުކޮށްފައިވާ ދުވުމެކެވެ.

ދިރާގުން ވަނީ އަންނަ އަހަރުގެ ދިރާގު މޯލްޑިވްސް ރޯޑް ރޭސް 25 އޮކްޓޫބަރު 2024 ގައި ބާއްވާނެކަމަށް އިއުލާނުކޮށްފައެވެ.