އެމެރިކާގެ ރައީސް ޖޯ ބައިޑެން އަދި ޗައިނާގެ ރައީސް ޝީ ޖިންޕިން އަންނަ ހަފުތާގެ ބުދަ ދުވަހު ބައްދަލުކުރައްވާނެ ކަމަށް ވައިޓް ހައުސްއިން ހާމަކޮށްފި އެވެ.
ދުނިޔޭގެ އެންމެ ބޮޑު ދެ އިގުތިސާދުގެ ވެރިންގެ މި ބައްދަލުވުން އޮންނާނީ އެމެރިކާގެ ކެލިފޯނިއާގަ އެވެ. އެންމެ ފަހުން މި ދެ ލީޑަރުން ބޭއްވި ބައްދަލުކުރެއްވުމަށް މިހާރު އަހަރެއް ވަނީ ފުރިފަ އެވެ. އެއީ އިންޑޮނޭޝިއާގެ ބާލީގައި ބޭއްވި ޖީ20 ސަމިޓުގެ ތެރެއިންނެވެ.
މި އަހަރުގެ ބައްދަލުކުރެއްވުމުގައި ވެސް ވިޔަފާރި އަދި އިގުތިސާދާ ގުޅުންހުރި ކަންކަމާއި ޓައިވާންގެ މައްސަލާގައި އުފެދިފައިވާ ނުތަނަވަސްކަމާ ގުޅޭގޮތުން މަޝްވަރާތައް ކުރިއަށްދާނެ އެވެ.
ދެ ގައުމުގެ އެންމެ އިސް ލީޑަރުންގެ އިތުރުން ސީނިއާ އެހެން އޮފިޝަލުންގެ މެދުގައި ވެސް ބައްދަލުވުންތައް ބާއްވާފައިވެ އެވެ. އެގޮތުން, އެމެރިކާގެ ޓްރެޝަރީ ސެކްރެޓަރީ ޗައިނާގެ ވައިސް ޕްރިމިއާ އާ ދެބޭފުޅުންގެ ބައްދަލުވުމެއް ބުރާސްފަތި ދުވަހު ސެން ފްރެންސިސްކޯގައި ބާއްވާފައިވެ އެވެ.
