ފަލަސްތީނުގައި ޔަހޫދީން ހިންގަމުންދާ ގަތުލުއާއްމު ދިގުލައިގެން ގޮސްފިނަމަ މެދުއިރުމަތީގެ ހަމަނުޖެހުންތައް އިތުރުވެ ދުނިޔޭގެ ބާޒާރުގައި ތެލުގެ އަގު ރެކޯޑު އަދަދަކަށް އުފުލިދާނެ ކަމަށް ދުނިޔޭގެ ވޯލްޑް ބޭންކުން ލަފާކޮށްފި އެވެ.
އިސްރާއީލާއި ހަމާސް އާ ދެމެދު ހިނގަމުންދާ ހަނގުރާމައިގެ ސަބަބުން އިގްތިސާދީގޮތުން ކުރިމަތިވެދާނެ ނުރައްކާތަކާ ބެހޭ ގޮތުން ވޯލްޑްބޭންކުން ހެދި އެސެސްމެންޓް ރިޕޯޓުގައި ބުނީ އެ ހަނގުރާމަ އިތުރަށް ވަރުގަދަވެއްޖެނަމަ ތެލުގެ ސަޕްލައި އަށް ބުރޫ އަރައި ތެޔޮ ފީފާއެއްގެ 150 ޑޮލަރަށް ވުރެ މައްޗަށް އަރާފާނެ ކަމަށް ބެލެވޭ ކަމަށެވެ.
ވޯލްޑް ބޭންކުން ލަފާކޮށްފައިވާގޮތުގައި އިޒްރޭލާއި ހަމާސް ހަނގުރާމައިގެ ހަމަނުޖެހުންތައް އިތުރުވެއްޖެނަމަ ދުނިޔޭގެ ބާޒާރުގައި ތެލުގެ ސަޕްލައި ދުވާލަކު ހަ މިލިއަނާއި އަށް މިލިއަން ފީފާއާ ދެމެދުގެ އަދަދަކަށް ދަށްވާނެ އެެވެ.
ތެލުގެ އަގު އުފުލޭނެ ކަމަށް ވޯލްޑް ބޭންކުން ލަފާކޮށްފައިވާ އަދަދަކީ މިހާތަނަށް ދުނިޔާގެ ބާޒާރުގައި ތެލުގެ އަގު ނުއުފުލޭ މިންވަރެކެވެ. މިހާރު ބާޒާރުގައި ތެޔޮ ފީފާއެއްގެ އަގު ގާތްގަނޑަކަށް 90 ޑޮލަރުގައި ހުރިއިރު 140 ޑޮލަރާއި 157 ޑޮލަރާ ދެމެދުގެ އަދަދަކަށް އުފުލިދާނެ ކަމަށް ވޯލްޑް ބޭންކުން ލަފާކުރެ އެވެ. އެއާ އެންމެ ގާތްކުުރާ އަދަދަކަށް ތެލުގެ އަގު އުފުލިފައިވަނީ 2008 ވަނަ އަހަރު އެވެ. އޭރު ތެޔޮ ފީފާއެެއްގެ އަގު 147 ޑޮލަރަށް އުފުލުނެވެ.
އެ ބޭންކުން އެންމެ ފަހުން ނެރުނު ކޮމޯޑިޓީ މާކެޓް އައުޓްލުކްގައި ބުނެފައިވާގޮތުން ދުނިޔޭގެ އިގްތިސާދަށް ލިބޭ މިފަދަ ޝޮކަކީ ހަކަތައިގެ އަގުތަކަށް އެކަނި ލިބޭނެ ޝޮކެއް ނޫނެވެ. އެ ޝޮކުގެ ސަބަބުން ކާބޯތަކެތީގެ އަގުވެސް ބޮޑުތަނުން އުފުލި އެތައް ސަތޭކަ މިލިއަން ބަޔަކަށް ބަނޑުހައިހޫނުކަމާ ކުރިމަތިވާނެ ކަމަށް އެ ރިިޕޯޓުގައި ވަނީ ބުނެފަ އެވެ.
އިޒްރޭލާއި ހަމާސް ހަނގުރާމައިގެ ސަބަބުން މިހާތަނަށް ތަކެތީގެ އަގަށް މާބޮޑު އަަސަރެއް ނުކުރެ އެވެ. އެގޮތުން ތެލުގެ އަގު ގާތްގަނޑަކަށް ހަ ޕަސެންޓަށް އުފުލުނު ނަމަވެސް ދަނޑުވެރިކަމުގެ ބާވަތްތަކާއި މައުދަނާއި އެހެނިހެން ބާވަތްތަކުގެ އަގުތައް ހުރީ ދަށް މިންވަރެއްގައި ކަމަށް ވޯލްޑް ބޭންކުން ބުންޏެވެ.
ނަމަވެސް އެ ހަނގުރާމަ އިތުރަށް ހޫނުވެ ހަމަނުޖެހުންތައް އިތުރުވެއްޖެނަމަ ކޮމޮޑިޓީ މާކެޓް އައުޓްލުކް ހީނުކުރާހާ އަވަހަށް ބަދަލުވުމުގެ ފުރުސަތު އޮތްކަމަށް ވޯލްޑްބޭންކުން ވަނީ އިންޒާރު ދީފަ އެވެ. އަދި އޭގެ ސަބަބުން ދުނިޔޭގެ ހުރިހާ ހިސާބެއްގައިވެސް ކާބޯތަކެތީގެ އަގުތައް އުފުލޭނެ ކަމަށް ވޯލްޑް ބޭންކުން ބުންޏެވެ.
