މެޑްރިޑް (ނޮވެމްބަރު 9) - ޔުއެފާ ޗެމްޕިއަންސް ލީގުގެ ގަދަ 16 އިން ރެއާލް މެޑްރިޑާއި، ބަޔާން މިޔުނިކް މޮޅުވި އިރު، ހިތްދަތި ގޮތަކަށް މެންޗެސްޓާ ޔުނައިޓެޑް ބަލިވެއްޖެ އެވެ.
ޗެމްޕިއަންސް ލީގުގައި ރެއާލް އިން ވަނީ އަމިއްލަ ދަނޑުގައި 3-0 ގެ ނަތީޖާއަކުން ސްޕޯޓިން ބްރާގާ ބަލިކޮށްފަ އެވެ. ބަޔާން މިޔުނިކުން 2-1 އިން ގެލެޓަސަރާއީ ބަލިކުރިއިރު، މެންޗެސްޓާ ޔުނައިޓެޑް ވަނީ ރަށުން ބޭރުގައި ކޮޕެންހޭގަން އަތުން 3-4 އިން ބަލިވެފަ އެވެ.
ރެއާލް މޮޅުވި މެޗުގައި އެޓީމްގެ ގޯލުތައް ޖަހައިދިނީ ބްރަހިމް ޑިއާޒް، ވިނީޝިއަސް ޖޫނިއާ އަދި ރޮޑްރީގޯ އެވެ. ރޭގެ މެޗުގައި ރެއާލްގެ އިންގްލެންޑް ތަރި ޖޫޑް ބެލިންހަމް ނުކުޅެ އެވެ.
މި މެޗަކީ ރެއާލް އިން އަމިއްލަ ދަނޑުގައި ޗެމްޕިއަންސް ލީގުގައި ޖެހި ޖެހިގެން މޮޅުވި އަށްވަނަ މެޗެވެ. އަދި މި މޮޅާއިއެކު އެޓީމް ވަނީ ޖެހިޖެހިގެން 26 ވަނަ ފަހަރަށް ޗެމްޕިއަންސް ލީގުގެ ދެވަނަ ބުރުން ޖާގަ ހޯދާފަ އެވެ.
ޗެމްޕިއަންސް ލީގުގެ ގްރޫޕް ސީގެ އެއްވަނައިގައި ރެއާލް އޮތީ 12 ޕޮއިންޓާއިއެކުގަ އެވެ. ދެވަނައިގައި ނަޕޯލީ އޮތީ ހަތް ޕޮއިންޓާއިއެކުގަ އެވެ. އެޓީމް ދެވަނަ ބުރުގެ ޖާގައެއް ޔަގީންކުރަން ބާކީ އޮތް ދެ މެޗުން ބޭނުންވަނީ އެންމެ ޕޮއިންޓެކެވެ.
ބަޔާން މިޔުނިކުން 2-1 އިން ގެލަޓަސަރާއީ ބަލިކުރި މެޗުގައި ބަޔާންގެ ދެ ގޯލުވެސް ޖަހައިދިނީ ހެރީ ކޭން އެވެ. މި ދެ ގޯލާއިއެކު ހެރީ ކޭން ބަޔާނަށް ކުޅުނު 15 މެޗުގައި ޖެހި ގޯލުގެ އަދަދު ވަނީ 19 އަށް އަރާފަ އެވެ.
މި ގްރޫޕްގެ އަނެއް މެޗުން ޔުނައިޓެޑް ވީ ބައްޔާއިއެކު އެޓީމްވަނީ ގްރޫޕްގެ ފުލަށް ވެއްޓިފަ އެވެ. އެޓީމް ކުރިއަށް އޮތް ދެ މެޗުން ކުރެ މެޗަކުން ބަލިވެއްޖެ ނަމަ ޗެމްޕިއަންސް ލީގުން ކަޓާނެ އެވެ.
ރޭ ރަށުން ބޭރުގައި ކޮޕެންހޭގަން އަތުން 3-4 އިން ބަލިވި މެޗުގައި ޔުނައިޓެޑުގެ މާކަސް ރަޝްފޯޑަށް ވަނީ ރަތް ކާޑެއްވެސް ދައްކާފަ އެވެ. 10 ކުޅުންތެރިންނާއިއެކު ޔުނައިޓެޑް ދެވަނަ ހާފު ކުޅުނުއިރު، މެޗުގެ 83 ވަނަ މިނެޓާ ހަމައަށް އެޓީމް އޮތީ 3-2 އިން ލީޑުގަ އެވެ. ނަމަވެސް 83 ވަަނަ މިނެޓުގައި ޖެހި ގޯލާއި 87 ވަނަ މިނެޓުގައި ކޮޕެންހޭގަން އިން ޖެހި ގޯލާއިއެކު މި މެޗުން ޔުނައިޓެޑް ބަލިވީ އެވެ.
ޔުނައިޓެޑް ހިމެނޭ ގްރޫޕް އެއްވަނައިގައި ބަޔާން އޮތީ 12 ޕޮއިންޓާއިއެކުގަ އެވެ. ދެވަނައިގައި އޮތް ކޮޕަންހޭގަން އާއި ތިން ވަނައިގައި އޮތް ގެލެޓަސަރާއީ އަށް ލިބިފައިވަނީ ހަތަރު ޕޮއިންޓެވެ. ފުލުގައި އޮތީ ތިން ޕޮއިންޓް ހޯދައިގެން މެންޗެސްޓާ ޔުނައިޓެޑެވެ.
ޗެމްޕިއަންސް ލީގުގައި އާސެނަލުން ވަނީ 2-0 އިން ސެވިއްޔާ ބަލިކޮށް ދެވަނަ ބުރުގެ ފުރުސަތު ބޮޑުކޮށްފަ އެވެ. ގަދަ 16ގެ ޖާގަ ޔަގީންކުރަން ކުރިއަށް އޮތް ދެ މެޗުން އާސެނަލަށް ބޭނުންވަނީ އެންމެ ޕޮއިންޓެކެވެ.
ގްރޫޕް ޑީގައި އިންޓަ މިލާން އާއި ރެއާލް ސޮއިއެޑާޑުވެސް އޮތީ ދެވަނަ ބުރާ ގާތުގަ އެވެ. ދެ ޓީމްވެސް 10 ޕޮއިންޓް ލިބިފައިވާއިރު ތިން ވަނައިގައި އޮތް ސާލްޒްބާގަށް ލިބިފައިވަނީ އެންމެ ތިން ޕޮއިންޓެވެ.
