ކޮލްކަތާ (ނޮވެމްބަރު 6) - އިންޑިއާގެ ކްރިކެޓް ތަރި ވިރާތު ކޯލީ އޭނާގެ 35 ވަނަ އުފަން ދުވަހު، ބައިނަލްއަގްވާމީ އެއް ދުވަހުގެ ކްރިކެޓްގައި އެންމެ ގިނަ ސެންޗަރީ ހެދި ސަޗިން ޓެންޑުލްކަރުގެ ރެކޯޑާ ހަމަކޮށްފި އެވެ.
އިންޑިއާގައި މިހާރު ކުރިއަށްދާ އޯޑީއައި ވޯލްޑް ކަޕްގައި އިއްޔެ ސައުތު އެފްރިކާއާ ދެކޮޅަށް ކުޅެ ވިރާތު ހެދި ސެންޗަރީ އަކީ އޭނާގެ ކެރިއަރުގެ 49 ވަނަ ސެންޗަރީ އެވެ.
ކޮލީ އޭނާގެ 49 ވަނަ ސެންޗަރީ ހެދީ ޓެންޑުލްކަރު ކުޅުނު މެޗުތަކުގެ އަދަދަށްވުރެ 174 މެޗު މަދުން ކުޅެގެންނެވެ.
ސައުތު އެފްރިކާ އާއި އިންޑިއާ ވާދަކުރި މެޗުން އިންޑިއާ މޮޅުވީ 243 ލަނޑުންނެވެ. ފުރަތަމަ ކުޅެން އަރައި އިންޑިއާއިން 326 ލަނޑު ހެދިއިރު، ކޯލީ ވަނީ ނުބައިނުވެ 101 ލަނޑު ހަދާފަ އެވެ. ދެން އެޓީމުން އެންމެ ރަނގަޅަށް ކުޅުނީ 87 ބޯޅައިން 77 ލަނޑު ހެދި ޝްރެޔަސް އައްޔަރު އެވެ.
މި މެޗުގައި ވިރާތު ކޯލީ ދެއްކި މޮޅު ކުޅުމާ އެއްވަރަށް އެޓީމްގެ ބޯލަރުންވެސް ތަފާތު މޮޅު ކުޅުމެއް ދެއްކި އެވެ. މިގޮތުން ސައުތު އެފްރިކާއަށް 83 ލަނޑު ހެދުނުއިރު، އިންޑިއާ އިން ވަނީ އެ ޓީމުގެ ހުރިހާ ކުޅުންތެރިން ނުބައިކޮށްފަ އެވެ.
އިންޑިއާގެ ރަވިންދްރަ ޖަޑޭޑާ މި އިނިންގްސްގައި ފަސް ވިކެޓު ނެގިއިރު، މުހައްމަދު ޝަމީ އާއި ކުލްދީޕް ޔާދަވް ވަނީ ކޮންމެ ކުޅުންތެރިއަކު ދެ ވިކެޓު ނަގައިފަ އެވެ.
އިންޑިއާގެ މި މޮޅާ އެކު އެޓީމުން ވަނީ މުބާރާތުގައި މިހާތަނަށް ކުޅުނު ހުރިހާ މެޗެއްވެސް ކާމިޔާބުކޮށްފަ އެވެ. އަށް މެޗު ބަލިނުވެ ހަމަކުރިއިރު ލީގު ބުރުގެ އެއް ވަނަ އެޓީމުން ވަނީ ޔަގީންކޮށްފަ އެވެ. ދެ ވަނައިގައި އޮތީ ސައުތު އެފްރިކާ އެވެ. މިހާތަނަށް ސެމީގެ ޖާގަ ޔަގީންކޮށްފައިވާ ދެ ޓީމަކީ ވެސް މިއީ އެވެ. ސެމީ ފައިނަލްގެ ފަހު ދެ ޖާގަައެއް ހަތަރު ޓީމެއް އެބަ ވާދަކުރެ އެވެ. އެއީ އޮސްޓްރޭލިއާ، ނިއުޒީލެންޑް، ޕާކިސްތާން އަދި އަފްގާނިސްތާނެވެ.
