ދިރާގުގެ 35 ވަނަ އަހަރީ ދުވަހާ ގުޅިގެން ގުރުއަތުން ހޮވޭ ކަސްޓަމަރަކަށް ޓެސްލާ ކާރެއް ލިބޭ ޕްރޮމޯޝަނެއް ފަށައިފި އެވެ.
ދިރާގުގެ ޕްރޮމޯޝަނާއި ގުޅޭ މައުލޫމާތު ދޭން އެކުންފުނީގެ ހެޑް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޑިރެކްޓާ، ބްރޭންޑް އެންޑް މާކެޓިން ކޮމިއުނިކޭޝަންސް މުހައްމަދު މިރްޝާން ހަސަން ވިދާޅުވީ އެ ޕްރޮމޯޝަންގެ ދަށުން ނަސީބުވެރި އެއް ކަސްޓަމަރަކަށް ޓެސްލާ މޮޑެލް ތިނެއްގެ އިލެކްޓްރިކް ކާރެއް ދޭން ނިންމާފައިވާކަމަށެވެ.
އެގޮތުން މި ޕްރޮމޯޝަނަށް ޓެސްލާގެ ޒަމާނީ އިލެކްޓްރިކް ކާރެއް ދޭން ނިންމީ ކާރަކީ ރާއްޖޭގެ އާބާދީ ބޮޑު ރަށްތަކުގައި ދިރިއުޅޭ ކަސްޓަމަރުންނަށް މުހިއްމު އެއްޗަކަށް ވާތީކަމަށް މިރްޝާން ވިދާޅުވި އެވެ. އަދި ތިމާވެއްޓާ ރައްޓެހި ޒަމާނީ ޓެކްނޮލޮޖީގެ ސިފަތައް އެކުލެވޭ ކާރެއް ކަސްޓަމަރަކަށް ދިނުމުގެ ގޮތުން ކަމަށް މިރްޝާން ވިދާޅުވި އެވެ.
"މިފަދަ ކުލަގަދަ އަހަރެއް ފާހަގަކުރަމުން ދާއިރު އަޅުގަނޑުމެން ބޭނުންވީ ކަސްޓަމަރުންނަށް ޓެކްނޮލޮޖީގެ އެހީގައި ތަފާތު ތަޖުރިބާއެއް ލިބިގެންދާނެ ކަހަލަ އިނާމެއް ދިނުމަށް. ރާއްޖޭގެ އާބާދީ ބޮޑު ތަންތަނަށް ކާރަކީ ވަރަށް މުހިއްމު އެއްޗެއްކަން ފާހަގަކުރެވޭ. އަދި މިއީ ތިމާވެއްޓާ ރައްޓެހި ކާރެއް،" މިރްޝާން ފާހަގަކުރެއްވި އެވެ.
ދިރާގުގެ ޑިރެކްޓާ، ބްރޭންޑް އެންޑް މާކެޓިން ކޮމިއުނިކޭޝަންސް މުހައްމަދު މިރްޝާން ހަސަން ނޫސްވެރިންނަށް މައުލޫމާތު ދެނީ -- ފޮޓޯ: އިޔާން/އަދަދު
މި ޕްރޮމޯޝަންގައި ބައިވެރިވެވޭނީ ދިރާގު ޕޯސްޓްޕެއިޑް 450 އަދި ފައިބަރ ބްރޯޑްބޭންޑް 30M އިން މަތީގެ ޕެކޭޖްއަކަށް ސަބްސްކްރައިބް ކުރާ ކަސްޓަމަރުންނަށެވެ. ދިރާގުގެ ހިދުމަތް މިހާރު ބޭނުންކުރަމުންދާ ކަސްޓަމަރުނާއި އަލަށް ދިރާގާއި ގުޅޭ ކަސްޓަމަރުންނަށް ވެސް މި ޕްރޮމޯޝަނުގައި ބައިވެރިވެވޭނެކަމަށް އެ ކުންފުނިން މައުލޫމާތުދެ އެވެ.
މި އަގުހުރި އިނާމު ހޯދުމަށް ކަސްޓަމަރުންނަށް އިތުރު ފުރުސަތު މަގުފަހިކޮށްދިނުމުގެ ގޮތުން ދިރާގުން ވަނީ އަންނަ ނޮވެމްބަރު 30، ގެ ކުރިން މި ޕްރޮމޯޝަންގައި ބައިވެރިވާ ފަރާތްތަކަށް މި ޓެސްލާ ކާރު ހޯދުމުގެ ފުރުސަތު ދެގުނައަށް ބޮޑުވެގެން ދާނެ ކަމަށް އިއުލާންކޮށްފައެވެ. އެގޮތުން އެ ކަސްޓަމަރުންނަށް ޑަބަލް އެންޓްރީ ލިބޭނެކަން އެ ކުންފުނިން ފާހަގަކުރި އެވެ.
އަންނަ އަހަރުގެ ޖެނުއަރީ މަހުގެ ނިޔަލަށް ކުރިއަށް ގެންދިޔުމަށް ނިންމާފައިވާ މި ޕްރޮމޯޝަންގައި ބައިވެރިވެވޭނީ ޕްރޮމޯޝަނަށް ހާއްސަ ޕޯޓަލް މެދުވެރިކޮށް ރެޖިސްޓަރީ ކޮށްގެނެވެ.
މި ޕްރޮމޯޝަނާ ބެހޭ އިތުރު މައުލޫމާތު މި ލިންކުން ލިބެން ހުންނާނެ އެވެ.
