ބަންގްލަދޭޝް މީހެއް ކަމަށްވާ މުހައްމަދު ލިޓަން، 35، މަރާލި ކަމުގެ ތުހުމަތުގައި ގދ ތިނަދޫ, މަނާރު, މުހައްމަދު ނިޒާމުގެ މައްޗަށް އުފުލާފައިވާ ދައުވާތައް ސާބިތު ކުރުމަށް ދައުލަތުން ހުށަހަޅާފައިވާ ބައެއް ހެކިތައް ރައްކާތެރިކުރުމުގެ އަމުރަކަށް އެދިއްޖެ އެވެ.
ފުރަތަމަ މި މައްސަލަ ފެންމަތިވީ, ފިއުލް ޕަވާ ކުންފުނީގެ "ހެދޭކުރި" ދޯނީގައި މަސައްކަތްކުރާ ބަންގްލަދޭޝަށް ނިސްބަތްވާ ލިޓަން އަދި ނިޒާމް ގެއްލިގެން ހޯދަން ފެށި ހިސާބުންނެވެ. ނިޒާމު ފެނުނު ނަމަވެސް ލިޓަން އަދިވެސް ނުފެނެ އެވެ.
ދައުލަތުން ތުހުމަތު ކުރަނީ، ލިޓަންއަށް ނޭގި ހުއްޓާ އޭނާ މޫދަށް ކޮއްޕާލައިގެން އޭނާ މަރާލާފައިވާ ކަމަށެވެ. އެ ހާދިސާ ހިނގީ ޑިސެމްބަރު 28، ގެ 19:00 އާ 20:30 އާ ދެމެދުގެ ވަގުތެއްގައި ކަމަށެވެ. އެ ތުހުމަތުގައި ނިޒާމުގެ މައްޗަށް އެނގި ހުރެ މީހަކު މަރާލުމުގެ ދައުވާ ވަނީ އުފުލައިފަ އެވެ.
ދޯނިން 51،000ރ. ވަގަށް ނެގި ކަމުގެ ތުހުމަތުގައި ނިޒާމުގެ މައްޗަށް ވައްކަމުގެ ދައުވާ ވެސް އުފުލާފައިވެ އެވެ. އަދި, މަސްތުވާތަކެތި ޓްރެފިކް ކުރުމުގެ ދައުވާއެއް ވެސް އުފުލާފައިވެ އެވެ.
މި ދައުވާތަކުގެ ޝަރީއަތް ކްރިމިނަލް ކޯޓުގައި ގެންދަވަނީ ގާޒީ މުހައްމަދު މިސްބާހެވެ. މިއަދު ބޭއްވި އަޑުއެހުމުގައި ގާޒީ ވަނީ ދައުލަތުގެ ފަރާތުން ހެކި ރައްކާތެރި ކުރުމުގެ އަމުރަކަށް އެދިފައިވާ ކަން ފާހަގަ ކުރައްވައިފަ އެވެ.
ނަމަވެސް, މައްސަލައިގެ ހުރިހާ ލިޔެކިޔުންތައް ނުލިބޭތީ ނިޒާމުގެ ދިފާއީ ވަކީލު މަޖީދު އަލީ އެދިވަޑައިގަތީ ލިޔެކިޔުންތައް ހަމަކުރުމަށް ފަހު ހެކި ރައްކާތެރި ކުރުމުގެ އަމުރާ ގުޅޭ ގޮތެއް ނިންމުމުގެ ބައި ކުރިއަށް ގެންދިއުމަށެވެ.
ޝަރީއަތުން ނިންމީ ލިޔެކިޔުންތައް ހަމަކުރުމަށް ޓަކައި އިދާރީ ވަކި އަޑުއެހުމެއް ބޭއްވުމަށެވެ. އެ އަޑުއެހުން އަންނަ ނޮވެމްބަރު 1، އިން ފެށިގެން 5، ގެ ދެމެދުގެ ތާރީހެއްގައި ބޭއްވުމަށް އެއްވެސް ފަރާތަކުން އިއުތިރާޒު ނުކުރާތީ އެ ގޮތަށް ނިންމުމަށް ފަހު މިއަދުގެ އަޑުއެހުން ނިންމަވާލެއްވި އެވެ.
މަސްލައިގެ ފަސްފަހަތް؛
ޑިސެމްބަރު 28، 2022 ގައި ފުލުހުންނަށް ކުރި ރިޕޯޓަކާ ގުޅިގެން ހޯދި ހޯދުމުން އެނގުނު ގޮތުގައި އެންމެ ފަހުން އެ ދެ މީހުން ފެނިފައިވަނީ ތެޔޮބޯޓެއްގައި ވިލިމާލޭ ފަޅުން ނުކުމެގެން ދަނިކޮށް ކަމަށްވެ އެވެ.
ޖެނުއަރީ 01، 2023 ގައި އެ ދެ މީހުން ދަތުރުކުރި ތެޔޮބޯޓު ވަނީ ކ. ހުޅުލެ ނެރު ކައިރިން ފެނިފަ އެވެ. ނަމަވެސް ބޯޓުގައި ލިޓަން އަދި ނިޒާމް ވެސް ނެތެވެ. އެ ދެ މީހުން ހޯދުމަށް ފުލުހުންގެ އޮޕަރޭޝަން ހުއްޓާނުލާ ކުރިއަށް ގެންދަނިކޮށް ނިޒާމް މާލެއިން ފެނުނީ އާންމު މީހަކު ސޯޝަލް މީޑިއާގައި އޭނާ ފެނިގެން ހިއްސާކުރި ފޮޓޯއަކާ ގުޅިގެންނެވެ.
އޭގެ ފަހުން މާލޭ ގެސްޓްހައުސް އަކުން އޭނާ ހައްޔަރުކޮށް ކްރިމިނަލް ކޯޓުން އޭނާގެ މައްޗަށް 60 ދުވަހުގެ ބަންދުގެ މުއްދަތެއް ޖެހި އެވެ. ނިޒާމް އަދިވެސް ބަންދުގައި ހުރި އިރު، އޭނާ ހައްޔަރުކުރީ ލިޓަންގެ މަރުގެ މައްސަލައިގައި ކަމަށް ފުލުހުން ވަނީ ބުނެފަ އެވެ.
ލިޓަންގެ ހަށިގަނޑު ނުފެނުނު ނަމަވެސް ނިޒާމުގެ އަމަލުތަކަކީ މީހަކު މަރާލުމުގެ އަމަލެއް ކަން ޝަރީއަތަށް ސާބިތު ކުރެވޭނެ ކަމަށް ޕްރޮސެކިއުޓާ ޖެނެރަލް ހުސައިން ޝަމީމް ވަނީ މީގެ ކުރިން ވިދާޅުވެފަ އެވެ.
