ކޮރަޕްޝަންގެ މައްސަލަތައް ބަލަން އަމުރެއްގެ ދަށުން ފުލުހުން އެފްއޭއެމްއަށް ވަދެއްޖެ

ފުޓްބޯލް އެސޯސިއޭޝަން އޮފް މޯލްޑިވްސްގައި ހިނގާ ކަމަށް ބުނާ ކޮރަޕްޝަންގެ މައްސަލަތައް ބަލަން ކޯޓު އަމުރެއްގެ ދަށުން ފުލުހުން އެ އިދާރާގެ އޮފީހަށް މިއަދު ވަދެއްޖެ އެވެ.

"އަދަދު" އަށް އެނގިފައިވާ ގޮތުގައި އެފްއޭއެމްގެ ތަހުގީގު ހިންގުމަށް އަމުރުކޮށްފައި ވަނީ ޕްރޮސެކިއުޓާ ޖެނެރަލްގެ އޮފީހުންނެވެ. އެނގިފައިވާ ގޮތުގައި މިވަގުތު ތަހުގީގު ކުރަމުން އަންނަނީ، އެ އިދާރާއަށް ބޭރުން ލިބުނު ފައިސާ ނަހަމަ ގޮތުގައި ބޭނުން ކުރި ކަމަށް ބެލެވޭ މައްސަލައެކެވެ.

ޕީޖީ އޮފީހުގެ ވެބްސައިޓުގައި އާންމުކޮށްފައިވާ ބަޔާނުން އެނގޭ ގޮތުގައި މިއީ އެފްއޭމްއަށް "އެކި ފަރާތްތަކުން ދޭ ފައިސާއަށް އެ އެސޯސިއޭޝަންގެ އިސްވެރިން ހިޔާނާތްތެރިވެ، އިތުރު ކުށުގެ އަމަލުތައް ހިންގާ ކަމަށް ތުހުމަތުކުރެވޭ" މައްސަލައަކާ ގުޅިގެން ފުލުހުންގެ މައްޗަށް ނެރެފައިވާ ތަހުގީގު އަމުރެކެވެ.

އަދި, މި މައްސަލައާ ގުޅިގެން އެއްވެސް ހިސާބެއްގައި މަނީ ލޯންޑަރިން އާއި، ވައްކަމާއި، ހިޔާނާތާއި، މަކަރާ ހީލަތުގެ ނުވަތަ އެ ނޫން ވެސް ޖިނާއީ ކުށެއް ހިނގަމުންދާނަމަ އެކަމެއް ތަހުގީގުކޮށް, ދައުވާއެއް ކުރެވެން އޮތް ބައެއްގެ މައްޗަށް ދައުވާ ކުރުމަށް އެ އޮފީހަށް ފޮނުއްވުމަށް ޕީޖީން އަމުރުކޮށްފައިވެ އެވެ.

ފުލުހުންގެ މީޑީއާ އޮފިޝަލަކު މި ނޫހާ ވާހަކަ ދައްކަމުން ބުނީ އެފްއޭއެމް ބަލައި ފާސް ކުރަނީ ޕީޖީއިން އަންގައިގެން "މާލީ މުއާމަލާތްތަކަކާ ގުޅޭ ހެކި ހޯދުމަށް" ކަމަށެވެ.

ފުލުހުން އެފްއޭއެމްގެ އޮފީސް ބަލަމުންދާއިރު، އެތަނުގެ ރައީސް ބައްސާމް އަދީލް ޖަލީލް މިވަގުތު ހުންނެވީ އޮފީސް ތެރޭގަ އެވެ. އޭނާއާއެކު އެތަނުގެ ބައެއް އެހެން މުވައްޒަފުން ވެސް އޮފީސް ތެރޭގައި އެބަ ހަރަކާތްތެރިވެ އެވެ.

އެފްއޭއެމްގެ އޮފީހަށް ފުލުހުން ވަދެ އެތަން ބަލައި ފާސް ކުރުމުގެ މަސައްކަތް ކުރިއަށްގެންދާއިރު، އެ އިދާރާ އޮތީ ވަރަށް ބޮޑަށް ދަރަނިވެރިވެފަ އެވެ. އެފްއޭއެމް ހިންގަމުން އަންނަނީ ތަނުގެ މުވައްޒަފުންނާއި ގައުމީ ޓީމުގެ ކުޅުންތެރިންނަށް ދޭންޖެހޭ މުސާރަ ވެސް ނުދީ އެވެ.

އޭގެ އިތުރުން ދަރަންޏަށް ހޯދާފައި ހުރި ހިދުމަތްތަކާއި ގަނެފައިވާ މުދަލަށް ވެސް ފައިސާ ނުދައްކާ އެތައް މައްސަލައެއް ފެންމަތިވެފައިވެ އެވެ. އަދި އެހީގެ ގޮތުގައި ކުޅުންތެރިންނަށް ހަދިޔާ ކުރަން މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ ދިން 500،000ރ. އާއި އެސްޓީއޯއިން ދިން 500،000ރ. އާއި ދިރާގުން ދިން 100،000ރ. ވެސް އެފްއޭއެމްއިން ކުޅުންތެރިންނާ ހަވާލުކޮށްފައެއް ނުވެ އެވެ.