ލަންޑަން (އޮކްޓޫބަރު 14) - އޮލީ ވަޓްކިންސް ޖަހައިދިން ގޯލުން 1-0 އިން އޮސްޓްރޭލިއާ އަތުން އިންގްލެންޑް މޮޅުވެއްޖެ އެވެ.
ލަންޑަންގެ ވެމްބްލީ ސްޓޭޑިއަމްގައި ކުޅުނު މެޗަށް އިނގިރޭސި ގައުމީ ޓީމުގެ ފުރަތަމަ އެގާރަ އަށް އެ ޓީމުގެ ކޯޗު ގަރެތު ސައުތުގޭޓް ވަނީ ގިނަ ބަދަލުތަކެއް ގެނެސްފަ އެވެ. އެ ގޮތުން، ކެޕްޓަން ހެރީ ކޭން ބެންޗުގައި އިންއިރު، އެއް ވަނަ ކީޕަރު ޖޯޑަން ޕިކްފޯޑްގެ އިތުރުން އާންމުކޮށް ފުރަތަމަ އެގާރައިގައި ކުޅޭ ޑެކްލަން ރައިސް، ޖޫޑް ބެލިންހަމް އަދި ކައިލް ވޯކާ ވެސް އިނީ ބެންޗުގަ އެވެ.
ސައުދީ ލީގުގެ އަލް އިއްތިހާދަށް ކުޅެމުން އަންނަ ހެންޑަސަން ގައުމީ ޓީމަށް ނެގުމުން ގިނަ ބަޔަކު ކޯޗު ސައުތުގޭޓަށް ފާޑުކިޔާފައިވާއިރު، ދެ ވަނަ ހާފުގައި ހެންޑަސަން ބަދަލުކުރި ވަގުތު ސަޕޯޓަރުންވަނީ ހެންޑަސަންއަށް ޓީމުން ޖާގަ ދިނުމުން އެކަމާ ހިތްހަމަނުޖެހުން ފާޅުކޮށްފަ އެވެ.
ގޯލު ޖަހާނެ ރަނގަޅު ފުރުސަތުތަކެއް ދެ ޓީމަށްވެސް ލިބުނުއިރު، ވަޓްކިންސް ގޯލު ޖެހީ މެޗުގެ 57 ވަނަ މިނެޓުގަ އެވެ. މިއީ އިންގްލެންޑްގެ ގައުމީ ޓީމަށް އޭނާ ކުޅުނު އަށް މެޗުގައި ޖެހި ތިން ވަނަ ގޯލެވެ. އަދި މިއީ މިދިޔަ އަހަރުގެ މާޗު މަހުގެ ފަހުން ވަޓްކިންސް ގައުމީ ޓީމަށް ކުޅުނު ފުރަތަމަ މެޗެވެ.
މި މޮޅާ އެކު އިނގިރޭސި ގައުމީ ޓީމް ތައްޔާރުވާނީ އަންނަ އަންގާރަ ދުވަހުގެ ރޭ ޔޫރޯ ކޮލިފައިންގައި އިޓަލީއާ ދެކޮޅަށް ކުޅޭ މެޗަށެވެ. މި މެޗުން އިންގްލެންޑް މޮޅުވެއްޖެ ނަމަ އަންނަ އަހަރުގެ ޔޫރޯ އަށް އެ ޓީމު ކޮލިފައިވާނެ އެވެ.
ރޭ ކުޅުނު އެކުވެރިކަމުގެ އެހެން މެޗުތަކަށް ބަލާއިރު، ޖަޕާނުން ވަނީ 4-1 އިން ކެނަޑާ ބަލިކޮށްފަ އެވެ. ޖަޕާނުން ވަނީ އެންމެ ފަހުން ކުޅުނު ފަސް މެޗުގައިވެސް މަދުވެގެން ހަތަރު ގޯލު ޖަހައިފަ އެވެ.
ދެކުނު ކޮރެއާ އިންވެސް ވަނީ ރޭ 4-0 އިން ޓިއުނީޝިއާ ބަލިކޮށްފަ އެވެ. ސައުދީ އަރަބިއްޔާއާ ނައިޖީރިއާ ވާދަކުރި މެޗު 2-2 އިން އެއްވަރުވިއިރު، އިރާން ވަނީ 3-1 އިން ޖޯޑަން ބަލިކޮށްފަ އެވެ.
