މާލޭގައި މީހެއްގެ އަތުން ފޭރުމަށްފަހު ފިލަން ދުއްވި މީހަކު އިން ސައިކަލު އެހެން ސައިކަލަކާ ޖެހި އެކްސިޑެންޓުވެއްޖެ އެވެ.
އެ އެކްސިޑެންޓުގައި އެއްވެސް މީހަކަށް އަނިޔާއެއްވި ކަމެއް ނުވަތަ ނޫން ކަމެއް ފުލުހުން ކަށަވަރު ކޮށްދީފައެއް ނުވެ އެވެ.
ފުލުހުންގެ މީޑިއާ އޮފިޝަލް ވިދާޅުވީ ލިލީ މަގުން ދުއްވާފައި ދިޔަ ދެ ސައިކަލު ޖެހި އެކްސިޑެންޓުވެފައިވާ ކަމުގެ ރިޕޯޓެއް މިރޭ 7:02 ހާއިރު އެ އިދާރާއަށް ލިބިފައިވާ ކަމަށާއި ފުލުހުން އެ ސަރަހައްދުގައި މިހާރުވެސް ހަރަކާތްތެރިވަމުންދާ ކަމަށެވެ.
"އެކްސިޑެންޓުވި އެއް ސައިކަލަކީ މީހެއްގެ އަތުން ފޭރުމަށްފަހު ދުއްވާފައި ދިޔަ ސައިކަލެއް ކަމަށް މިހައިތަނަށް ބެލި ބެލުމުން އެނގިފައިވޭ،" ފުލުހުންގެ މީޑިއާ އޮފިޝަލް ވިދާޅުވި އެވެ.
ފުލުހުން އެކަން ކަށަވަރު ކޮށްދީފައިވާއިރު، އެކްސިޑެންޓު ހިނގާފައިވާ ސަރަހައްދު ފެންނަ ފޮޓޯތަކެއް މީސްމީޑިއާގައި ވަނީ އާންމުވެފަ އެވެ. އެ ފޮޓޯތަކުން މަގުމައްޗަށް މީހަކު ވެއްޓިފައި އޮތް މަންޒަރު ވެސް ފެނެ އެވެ. ނަމަވެސް އެމީހާއަށް ލިބިފައި ވަނީ ކިހައިވަރެއްގެ އަނިޔާއެއް ކަމެއް އަދި ސާފެއް ނުވެ އެވެ.
