އިންޓަނެޓު އަގު ހެޔޮ ކުރުމުގެ މަސައްކަތުގެ ދަށުން ސަރުކާރުން އިންވެސްޓުކޮށްގެން ގެނައި "އިންޑިއާ އޭޝިއާ އެކްސްޕްރެސް" (އައިއޭއެކްސް) ސަބްމެރިން ކޭބަލް އަންނަ ޑިސެމްބަރު މަހުގެ ތެރޭގައި ޓެސްޓު ކުރަން ފަށާނެ ކަމަށް އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު ރިޔާޒް މަންސޫރު ވިދާޅުވެއްޖެއެވެ.
އައިއޭއެކްސްއަކީ އިންޑިއާގެ ޖިއޯ ޓެލެކޮމް ކުންފުނިން ފްރާންސުގެ މާސޭ އާއި ސިންގަޕޫރާ ދެމެދު އަޅާ އެންމެ ޒަމާނީ ގިންތީގެ ސަބްމެރީން ކޭބަލް ވިއުގައެކެވެ.
"އަދަދު" ނޫހާ ވާހަކަ ދައްކަމުން ރިޔާޒު މިއަދު ވިދާޅުވީ ސަބްމެރިން ކޭބަލްއާ ގުޅޭ ޓެކްނިކަލް މައްސަލަތަކެއް ނެތް ކަމަށާއި ކޭބަލް ޓެސްޓުކުރަން ފަށަން މިހާރު ރާވާފައި އޮތީ އަންނަ ޑިސެމްބަރު މަހުގެ މެދުތެރޭގައި ކަަމަށެވެ.
"މި ކޭބަލްއަކީ ވަރަށް ދިގު ކޭބަލް އެއް. ބައިވަރު ސެގްމެންޓުތައް ހުންނާނެ. ބްރާންޗުތައް ހުންނާނެ. ޖިއޯ އިން މުޅި ކޭބަލް އެއްކޮށް ޓެސްޓުކުރާނެ،" އޭނާ ވިދާޅުވި އެވެ.
އޯސީއެމް-އައިއޭއެކްސް ކޭބަލްގެ ނަމުން ނަން ދެވިފައިވާ ކޭބަލް ރާއްޖެއާ ގުޅާލުމުގެ މަސައްކަތް ކުރީ 100 ޕަސެންޓު ސަރުކާރު ހިއްސާވާ އޯޝަން ކަނެކްޓް މޯލްޑިވްސް (އޯސީއެމް) އާއި އިންޑިއާގެ ޓެލެކޮމް ކުންފުނި ޖިއޯ ޓެލެކޮމް ގުޅިގެންނެވެ.
ރިޔާޒު ވިދާޅުވި ގޮތުގައި މައްސަލައެއް ދިމާނުވާ ނަމަ ކޭބަލް ޓެސްޓިން މަރުހަލާ އެއްކޮށް ނިންމާލެވޭނެ ކަމަށް ލަފާކުރެވެނީ ދެތިން މަސް ދުވަހުގެ ތެރޭގަ އެވެ. އަދި އެ މަރުހަލާ ނިމުމުން މި ކޭބަލް ރަސްމީކޮށް ބޭނުންކުރަން ފެށޭނެ ކަމަށް ވިދާޅުވި އެވެ.
ސަރުކާރުގެ ޑިޖިޓަލް ރާއްޖޭގެ ސިޔާސަތުގެ ދަށުން ދައުލަތުން އިންވެސްޓުކޮށްގެން އެޅި މި ކޭބަލްއަކީ އިންޓަނެޓުގެ އަގު ހެޔޮ ކުރުމާއި ސްޕީޑު ހަލުވި ކުރުމާ އެކު، ޑޭޓާ އެކްސްޕޯޓު ފަދަ ވިޔަފާރިތަކަށް ހުޅުވާލުމުގެ މަގުސަދުގައި އެޅި ކޭބަލްއެކެވެ. ސަރުކާރުން ބުނަނީ މި ކޭބަލްގެ ސަބަބުން މުސްތަގުބަލުގައި ގިނަގުނަ ފައިދާތަކެއް ކުރާނެ ކަމަށެވެ.
ފްރާންސުގެ މާސޭ އާއި ސިންގަޕޫރާ ދެމެދު އަޅާ އައިއޭކްސް ކޭބަލް ރާއްޖެ މަސައްކަތް ފެށީ މިދިޔަ އަހަރުގެ ފެބްރުއަރީ މަހުގެ ތެރޭގަ އެވެ. ދިގުމިނުގައި 19،200 ކިލޯމީޓަރުގެ މި ކޭބަލް ވިއުގަ ގުޅާލާ ގައުމުތަކުގެ ތެރޭގައި ރާއްޖޭގެ އިތުރުން ހިމެނެނީ މެލޭޝިއާ، ބަންގްލަދޭޝް، ސްރީ ލަންކާ، އިންޑިއާ، ޕާކިސްތާނު، ސައުދީ އަރަބިއާ އަދި މިސްރެވެ.
