މާލޭގައި ހިންގި ކޮއްޓަފަރު ބޯޑިން ހޯމްގެ ބާނީ އިބްރާހިމް އަބޫބަކުރު (ކޮއްޓަފަރު ދޮންތު) މިއަދު އަވަހާރަވެއްޖެ އެެވެ.
ކޮއްޓަފަރު ބޯޑިން ހޯމް އަކީ އަތޮޅުތަކުން މާލެއަށް ތައުލީމު ހޯދުމަށްޓަކައި އަންނަ ކުދިންނަށް ރައްކާތެރި ހިޔާވައްސެއް ހޯދައި ދިނުމަށް އިބްރާހީމް އަބޫބަކުރު، 70، އާއި އަނބިކަނބަލުން އަމީނާ އިބްރާހީމް، މއ. ކޮއްޓަފަރު ގޭގައި 1994 އަހަރު ފެށި ހިދުމަތެކެވެ.
އެ ހިދުމަތް ފުޅާކުރުމަށް އެ ދެމަފިރިން "ކޮއްޓަފަރު ބޯޑިން ހޯމް" ގެ ނަމުގައި ތަނެއް ރަޖިސްޓްރީކޮށް ފުޅާ ދާއިރާއެއްގައި އެ ހިދުމަތް ވަނީ ފޯރުކޮށްދީފަ އެވެ. ނަމަވެސް ޒަމާނަށް އައި ބަދަލުތަކާއެކު ފަހުން އެހިދުމަތް ވަނީ ހުއްޓާލާފަ އެވެ.
އެތަނުން ޓީވީ ބެލުމާއި ރޭޑިޔޯ އަޑުއެހުމާއި ނޫސް މަޖައްލާ ކިޔޭނެ ގޮތް ހަމަޖެހި އަދި އިންޓަނެޓްގެ ހިދުމަތް ވެސް ކުދިންނަށް ލިބެންހުރި އެވެ. އަދި އެކި ކުޅިވަރުތައް ކުޅެވޭނެ އިންތިޒާމުގެ އިތުރުން "އޮރޭކަލް ލައިބްރަރީ" ގެ ނަމުގައި ލައިބްރަރީއެއް ވެސް ހިންގި އެވެ. އެ ލައިބްރަރީއަކީ ހުރިހާ ސްކޫލެއްގެ ދަރިވަރުންނަށް އާންމުކޮށް ހުޅުވާލައިގެން ހިންގި ތަނެކެވެ.
އެ ހިދުމަތުގެ އަގުވަޒަންކުރުުމުގެ ގޮތުން އިބްރާހިމް އަބޫބަކުރާއި އޭނާގެ އަނބިކަނބަލުން އަމީނާ އިބްރާހިމަށް ވަނީ ޖަމާއަތަށް ފައިދާ ހުރި ހާއްސަ ހިދުމަތެއް ކުރުމުގެ ދާއިރާ އިން 2007 ވަނަ އަހަރު އާންމު ހިދުމަތުގެ އިނާމު ވެސް ލިިބިވަޑައިގެންނެވި އެވެ. އެ އިނާމު ލިބިވަޑައިގަތް އިރު ވެސް ކޮއްޓަފަރުގޭގައި ތިބެގެން ކިޔެވައިގެން 1،300 އަށް ވުރެ ގިނަކުދިން މުޖުތަމައަށް ނިކުމެފައިވެ އެވެ.
