ލަންޑަން (ސެޕްޓެމްބަރު 7) - އިނގިރޭސި ގައުމީ ޓީމްގެ މޮޅު ކުޅުންތެރިޔާގެ އެވޯޑު ޖެހިޖެހިގެން ދެ ވަނަ ފަހަރަށް ޕްރިމިއާ ލީގުގެ އާސެނަލަށް ކުޅެމުން އަންނަ ބުކާޔޯ ސަކާ އަށް ލިބިއްޖެ އެވެ.
މިދިޔަ އަންގާރަ ދުވަހު 22 އަހަރު ފުރުނު ސަކާ އަށް ގައުމީ ޓީމްގެ އަަހަރުގެ މޮޅު ކުޅުންތެރިޔާގެ އެވޯޑު ލިބުނީ މިދިޔަ އަހަރު އޭނާ ގައުމީ ޓީމުގައި ދެއްކި މޮޅު ކުޅުމުގެ ސަބަބުންނެވެ. އެ ގޮތުން ސަކާ ވަނީ މިދިޔަ އަހަރު ގައުމީ ޓީމަށް ކުޅުނު 10 މެޗުގައި ހަތް ގޯލު ޖަހައިފަ އެވެ.
މި އެވޯޑަށް ސަކާއާ އެންމެ ގާތުން ވާދަކުރީ މިޑްފިލްޑަރު ޖޫޑް ބެލިންހަމް އާއި އެޓީމްގެ ކެޕްޓަން ހެރީ ކޭން އެވެ.
ގައުމީ ޓީމްގައި މިދިޔަ އަހަރު ސަކާގެ އެންމެ ފާހަގަކޮށްލެވޭ މެޗުތަކަށް ބަލާއިރު އޭނާގެ ކެރިއަރުގެ ފުރަތަމަ ހެޓްރިކް ހެދީ މިދިޔަ އަހަރު އެވެ. އެއީ ޔޫރޯ ކޮލިފައިންގައި ނޯތު މެސެޑޯނިއާއާ ދެކޮޅަށް ކުޅުނު މެޗުގަ އެވެ. އަނެއްކޮޅުން މިދިޔަ އަހަރު ނިމުނު ވޯލްޑްކަޕްގައިވެސް ސަކާ މޮޅު ކުޅުމެއް ދެއްކި އެވެ.
ސަކާ އަކީ ކުލަބު ލެވެލްގައި މިދިޔަ ސީޒަންގައި ފާހަގަކޮށްލެވޭ ކުޅުމެއް ދެއްކި ކުޅުންތެރިއެކެވެ. މިދިޔަ ސީޒަންގައި އާސެނަލްގައި ދެއްކި މޮޅު ކުޅުމާ އެކު ޕީއެފްއޭއިން ހޮވި އަހަރުގެ އެންމެ މޮޅު ޒުވާން ކުޅުންތެރިޔާގެ އެވޯޑުވެސް ސަކާ ހޯދި އެވެ.
އިނގިރޭސި ގައުމީ ޓީމްގެ އެންމެ މޮޅު ފިރިހެން ކުޅުންތެރިޔާގެ މި ހަފްތާގައި އިއުލާންކުރިއިރު، އެންމެ މޮޅު އަންހެން ކުޅުންތެރިޔާ އިއުލާންކުރާނީ މިމަހުގެ ފަހުކޮޅުގަ އެވެ. މިދިޔަ މަހު ނިމުނު އަންހެން ވޯލްޑް ކަޕްގެ ދެ ވަނަ ހޯދި އިންގްލެންޑްގެ އަންހެން ޓީމުގެ ހިމެނޭ ކުޅުންތެރިންގެ ތެރެއިން މި އެވޯޑު ހޯދާނެކަމަށް ބެލެވޭ ކުޅުންތެރިންގެ ތެރޭގައި ކީޕަރު މެރީ އާޕްސް އާއި ފޯވާޑް ލޯރެން ޖޭމްސް، އެލެސިއާ ރޫސޯ އަދި ލޯރެން ހެމްޕް ހިމެނެ އެވެ.
