އިންޑިއަން އޯޝަން އައިލެންޑް ގޭމްސް އިން ރާއްޖޭގެ ފިރިހެން ޓޭބަލް ޓެނިސް ޓީމު ފުރަތަމަ ފަހަރަށް ރިހި މެޑެއްޔެއް ހޯދައިފި އެވެ.
މަޑަގަސްކަރައިގައި ކުރިއަށްދާ ގޭމްސްގެ ފިރިހެން ޓީމު އިވެންޓުގެ ފައިނަލުން ރާއްޖެ ބަލިވީ ބާއްވާ ގައުމާ ވާދަކޮށް 3-2 މެޗުންނެވެ.
ރަން މެޑަލް ހޯދުމުގެ ފުރުސަތު ގެއްލުނު ނަމަވެސް ރިހި މެޑެއްޔަކީ ފިރިހެން ޓީމަށް ބޮޑު ކާމިޔާބެކެވެ. އެންމެ ފަހުގެ ދެ އިންޑިއަން އޯޝަން އައިލެންޑް ގޭމްސްގައި ވެސް ފިރިހެން ޓީމަށް އެދެވޭ ނަތީޖާއެއް ނުނެރެވުނެވެ. އެކަމަކު އަންހެން ޓީމުން 2019 ގެ ގޭމްސް އިން ތިން ރަން މެޑަލް ހޯދި އެވެ. މި ފަހަރު ވެސް އަންހެން ޓީމު އިވެންޓުން ވަނީ ރަން މެޑެއްޔެއް ގެނެސްދީފަ އެވެ.
މި މެޗުގައި ރާއްޖޭގެ ތަރިއަކަށްވީ މުހައްމަދު ޝައްފާން އިސްމާއީލް އެވެ. ރާއްޖޭގެ ޓީޓީގެ މަޝްހޫރު އާއިލާ ކަމަށްވާ ސީވީޑް އަށް ނިސްބަތްވާ ޝައްފާން ވަނީ ދެ ގޭމު ކާމިޔާބުކޮށް ރާއްޖެ ރަން މެޑެއްޔަކާ ވަރަށް ކައިރި އަށް ގެންގޮސްދީފަ އެވެ.
ފުރަތަމަ ގޭމް ޝައްފާން ކާމިޔާބުކުރީ މަޑަގަސްކަރައިގެ ރަންދްރިއަނާޓޯންޑްރޯ އަތުން 3-2 އިންނެވެ. މި ގޭމުގެ ފުރަތަމަ ސެޓު 11-5 އިން ރަންދްރިއަނާޓޯންޑްރޯ ގެންދިޔަ ނަމަވެސް ޝައްފާން އަނެއް ދެ ސެޓު 5-11 އަދި 2-11 އިން ކާމިޔާބުކުރި އެވެ. މެޗުގެ ހަތަރު ވަނަ ސެޓު 11-0 އިން ރަންދްރިއަނާޓޯންޑްރޯ ގެންދިއުމުން ހަމަހަމަވި އެވެ. ނަތީޖާ ނެރެން ކުޅުނު ސެޓު ޝައްފާން ކާމިޔާބުކުރީ 6-11 އިންނެވެ.
މެޗުގެ ދެ ވަނަ ގޭމުން ރާއްޖޭގެ ތަޖުރިބާކާރު ކުޅުންތެރިޔާ މޫސާ މުންސިފް ވަނީ މަޑަގަސްކަރައިގެ ނަޓިވެލް ޖޮނަތަން އަތުން ސީދާ ތިން ސެޓުން ބަލިވެފަ އެވެ. ސެޓުތައް ޖޮނަތަން ގެންދިޔައީ 11-9، 11-7 އަދި 11-5 އިންނެވެ.
މެޗުގެ ތިން ވަނަ ގޭމުން ރާއްޖޭގެ އަހްޔަރް އަހުމަދު ހާލިދު ވަނީ މަޑަގަސްކަރައިގެ ރަޒަފިންރަލަމްބޯ ޒޯ ނަދާރް އަތުން 3-1 ސެޓުން ބަލިވެފަ އެވެ. ފުރަތަމަ ސެޓު 11-6 އިން އަހްޔަރު ކާމިޔާބުކުރި ނަމަވެސް މަޑަގަކަސްރަ ކުޅުންތެރިޔާ ވަނީ އަނެއް ތިން ސެޓު 9-11، 4-11 އަދި 8-11 އިން ކާމިޔާބުކޮށްފަ އެވެ.
މެޗުގެ ހަތަރު ވަނަ ގޭމު ކާމިޔާބުކޮށްގެން މަޑަގަސްކަރަ އަށް ރަން މެޑަލް ކަށަވަރުކުރެވެން އޮތް ނަމަވެސް ރާއްޖޭގެ ޝައްފާން ވަނީ ޖޮނަތަން އަތުން 3-1 އިން މޮޅުވެ އުއްމީދެއް ހޯދައިފަ އެވެ. ފުރަތަމަ ސެޓު ޝައްފާން ކާމިޔާބުކުޜީ 11-8 އަދި 12-10 އިންނެވެ. އަނެއް ދެ ސެޓު 6-11 އަދި 8-11 އިން ކާމިޔާބުކޮށް ޖޮނަތަން އެއްވަރުކުރި އެވެ. އެކަމަކު ޝައްފާން ވަނީ 11-6 އިން ފަހު ސެޓު ކާމިޔާބުކޮށް ގޭމުން ރާއްޖެ މޮޅުކޮށްދީފަ އެވެ.
މަޑަގަސްކަރަ ރަން މެޑަލް ހޯދި ދެ ޓީމު 2-2 ގޭމުން އެއްވަރުވުމުން ނަތީޖާ ނެރެން ކުޅުނު ފަހު ގޭމް 3-1 އިން ކާމިޔާބުކޮށްގެންނެވެ. މި މެޗުން މަޑަގަސްކަރައިގެ ރަންދްރިއަނާޓޯންޑްރޯ މޮޅުވީ ރާއްޖޭގެ މުންސިފް އަތުން 3-1 އިންނެވެ. މި ގޭމުގެ ފުރަތަމަ ސެޓު މުންސިފް 13-11 އިން ކާމިޔާބުކުރި އެވެ. އެކަމަކު ރަންދްރިއަނާޓޯންޑްރޯ ވަނީ އަނެއް ތިން ސެޓު 6-11، 4-11 އަދި 14-16 އިން ކާމިޔާބުކޮށްފަ އެވެ.
ގްރޫޕް ސްޓޭޖުގެ މެޗުން މަޑަގަސްކަރަ އަތުން ރާއްޖެ ބަލިވީ ސީދާ ތިން ގޭމުންނެވެ. އެ މެޗާ ބަލާއިރު މި މެޗުން ރާއްޖެ ވަނީ ތަފާތު ވަރަށް ބޮޑަށް ކުޑަކޮށްފަ އެވެ.
