މާލެ ރައްޔިތުންނަށް ގޯތި ދިނުމަށް ބިން ހިއްކަން ފަށަން ތައްޔާރުވުމުގެ ގޮތުން ހުޅުމާލެ ދެ ވަނަ ފިޔަވަހީގެ ފަޅުތެރެއިން ނަގާ އުޅަނދުފަހަރުތައް އަޅަން މާލެ ސަރަހައްދުން ދެ ފަޅެއް ހަމަޖައްސާފައިވާ ކަމަށް އާބަންކޯ އިން މިއަދު ބުނެފި އެވެ.
އާބަންކޯގެ މާކެޓިން އެންޑް ޕަބްލިކް ރިލޭޝަންސް ޑިރެކްޓަރު ނިއުޝާދު ޝަރީފު މިއަދު މި ނޫހާ ވާހަކަ ދައްކަވަމުން ވިދާޅުވީ ހުޅެމާލެ ދެ ވަނަ ފިޔަވަހީގެ ފަޅުން ނަގާލާ ސަފާރީތަކަށް އަޅަން ނިންމީ ކުޑަގިރި ފަޅާއި ސަފާރީ ބަނދަރު ތަރައްގީކުރާ ދިޔަނެރު ފަޅު ކަމަށް އޭނާ ވިދާޅުވި އެވެ.
އެގޮތުން ކުޑަގިރި ފަޅުގައި ސަފާރީތައް އަޅަން ބޭނުންވާ ފަރާތްތަކުން އާބަންކޯގައި ރަޖިސްޓްރީވުމުން ހަމަޖެހިފައިވާ އުސޫލުގެ ދަށުން އެކަމަށް ހުއްދަ ދޭނެ ކަމަށްވެސް ނިއުޝާދު ވިދާޅުވި އެެވެ.
"ކުޑަގިރިއަކީ ރަނގަޅު އޮޕްޝަނެއް. އެއީ ކުޑަގިރީގައި ފިހާރަ އާއި ފާހަނަތަކާއި މި ފެސިލިޓީސްވެސް ހުންނާތީ،" ނިއުޝާދު ވިދާޅުވި އެވެ.
ނިއުޝާދު ވިދާޅުވީ ސަފާރީތަކުގެ ވެރިން އެދިއްޖެ ހާލަތުގައި ދިޔަނެރު ފަޅުވެސް ހަމަޖައްސަދޭނެ ކަމަށެވެ. އެގޮތުން ހަފްތާއެއް ތެރޭ އެ ފަޅުގައި މޫރިންގް ބޮއެތަކެއް އަޅައި ސަފާރީތައް އެޅޭނެ ގޮތްތައް ހަމަޖެހިގެންދާނެ ކަމަށާއި އާބަންކޯގައި ރަޖިސްޓްރީވާ އުޅަނދުތަކަށް އެތަނުންވެސް ޖާގަ ލިބޭޭނެ ކަމަށް ވިދާޅުވި އެވެ.
އޭގެ އިތުރުން ކުޑަގިރި ފަޅާއި ދިޔަނެރު ފަޅުގައި ސަފާރީތައް އަޅަން ކަނޑައެޅިފައިވާ އުސޫލުގެ ތެރެއިން އަގު ނަގާނެ ކަމަށް ނިއުޝާދު ވިދާޅުވި އެވެ.
ހުޅުމާލޭގެ ބިން ހިއްކުމަށް ތައްޔާރުވުމުގެ ގޮތުން އާބަންކޯއިން ވަނީ ދެ ވަނަ ފިޔަވަހީގެ ފަޅުގައި އަޅާފައިހުރި އުޅަނދު ތަކާއި އަޑިއަށް ގޮސްފައިހުރި އުޅަނދުތައް އެ ސަރަހައްދުން ނެގުމަށް އަންގާފަ އެވެ. އެ ސަރަހައްދުގައި އަޅާފައި ހުރީ މުޅިން ވެސް ސަފާރީތަކެވެ.
އާބަންކޯ އިން ބުނި ގޮތުގައި އެ ތަކެތި އަންނަ ހަފުތާގެ އާދީއްތަ ދުވަހުގެ ކުރިން ނަގަންޖެހޭނެ އެވެ. އަދި އެ މުއްދަތުގައި ވެރިފަރާތުން ނުނަގާ އުޅަނދުތައް އާބަންކޯއިން ނަގައި އެހެން ސަރަހައްދަކަށް ބަދަލު ކުރާނެ ކަމަށް ވެސް ވަނީ ބުނެފަ އެވެ.
ދެ ވަނަ ފިޔަވަހީގެ ފަޅަކީ ކްރޫޒް ޓާމިނަލަކާއި ޔޮޓް މެރީނާއެއް ހެދުމަށް ހުޅުމާލެ މާސްޓަ ޕްލޭނުގައި ހިމަނާފައިވާ ސަރަހައްދެވެ. ނަމަވެސް ހުުޅުމާލެ މާސްޓަ ޕްލޭން ބަދަލުކޮށް އެ ފަޅު ހިއްކައިގެން މާލެ ރައްޔިތުންނަށް ގޯތި ދިނުމަށް ސަރުކާރުން ވަނީ ނިންމާފަ އެވެ.
އެގޮތުން އެ ސަރަހައްދު ހިއްކުމުގެ މަސައްކަތް އާބަންކޯ އިން މިހާރު ވަނީ ލަންކާގެ ސީއެމްސީ ކުންފުންޏާ ހަވާލުކޮށްފަ އެވެ. އަދި ދިޔަނެރު ފަޅުގައި ސަފާރީ ބަނދަރު ހެދުމަށް ބޭނުންވާ ބިން ހިއްކުމުގެ މަސައްކަތް ވެސް އެކުންފުންޏާއި ހަވާލުކޮށް އެ މަސައްކަތް ފަށާފައިވާ ކަމަށް އާބަންކޯ އިން ބުންޏެވެ.
