އިމާމުވެ ހުކުރުކުރާ ހުރިހާ ހަތީބުން، ހުކުރު ކުރާއިރު ޖުއްބާ ލާންޖެހޭ ގޮތަށް ހަމަޖައްސައި، މިއަދުން ފެށިގފެން އެގޮތަށް އަމަލު ކުރަން ފަށާފައިވާ ކަމަށް އިސްލާމިކް މިނިސްޓްރީން ބުނެފި އެވެ.
އެ މިނިސްޓްރީން ބުނީ އެގޮތަށް ނިންމީ ހުކުރު ކުރާ ހުރިހާ ހަތީބުންނަކީ ވެސް އެއްގޮތަކަށް، އެއް މިންގަނޑަކަށް ހެދުން އަޅާބަޔަކަށް ހަދައި، އިމާމުންނާއި ހަތީބުންގެ ހައިބަތު ދެމެހެއްޓުމުގެ މަގުސަދުގައި ކަމަށެވެ.
އެ އުސޫލަށް މިވަގުތު ހަމައެކަނި މާލެ ސަރަހައްދުގައި އަމަލުކުރި ނަމަވެސް ކުރިއަށް އޮތް ތަނުގައި ރާއްޖޭގެ ހުރިހާ ރަށެއްގެ ހަތީބުން ވެސް އެ އުސޫލަށް އަމަލު ކުރަން ޖެހޭނެ ކަމަށް ވެސް އެ މިނިސްޓްރީން ބުނެފައިވެ އެވެ. ނަމަވެސް މުޅި ރާއްޖެގެ ހަތީބުން މި އުސޫލަށް އަމަލުކުރަން ފަށަން ޖެހޭ ވަކި ތާރީހެއް ނުބުނެ އެވެ.
މި އުސޫލަށް އަމަލުކުރަން ފެށުމާއެކި މިވަގުތަށް، މާލޭ ސަރަހައްދުގެ މިސްކިތްތަކުގައި ހުކުރުކުރާ ހުރިހާ ހަތީބުންނަށް ވަކި އެލަންވަންސެއް ކަނޑައަޅައި، ކޮންމެ އަހަރަކު ވެސް އިސްލާމިކް މިނިސްޓްރީން ޖުއްބާ އާއި ތާކިހާ ފޯރުކޮށްދޭނެ ކަމަށް ވެސް އެ މިނިސްޓްރީން ބުނެފައިވެ އެވެ.
ޖުއްބާއާއެކު ހުކުރު ކުރުމަކީ ދުނިޔޭގެ ގިނަ މުސްލިމު ގައުމުތަކުގައި އަމަލުކުރަމުން އަންނަ ގޮތެކެވެ. ރާއްޖޭގައި ވެސް ބައެއް ހަތީބުން އެގޮތަށް އަމަލުކުރި ނަމަވެސް އެކަމަށް ވަކި އުސޫލެއް ނުވަތަ މިންގަނޑެއް މިހާތަނަށް އެކުލަވާލެވިފައެއް ނުވެ އެވެ.
