ދިވެހިރާއްޖޭގެ އެންމެ ބޮޑު މުނިފޫހިފިލުވުމުގެ ހިދުމަތް ފޯރުކޮށްދޭ ކުންފުނި، މީޑިއާނެޓުގެ ހިދުމަތް މުޅި ދުނިޔެއަށް ފުޅާކޮށްފި އެވެ.
މީޑިއާނެޓުން ބުނީ މިހާރު އަވަށްޓެރި ގައުމުތަކުގައި ދިރިއުޅޭ ދިވެހިންނަށް ދިވެހި ޗެނަލްތަކުން ދައްކާ މުނިފޫހިފިލުވުމުގެ ޕްރޮގްރާމުތަކާއި ރާއްޖޭގެ އެކިކަންކޮޅުތަކުގެ ހަބަރު ޕްރޮގްރާމްތައް ފަސޭހަކަމާއެކު ބަލާލެވޭނެ ކަމަށެވެ.
މީޑިއާނެޓުން ވަނީ ރާއްޖެއިން ބޭރު ގައުމުތަކަށް ހާއްސަ ދެ ޕެކޭޖެއް ތައާރަފްކޮށްފަ އެވެ. އެއީ:
އެމް އެސް ލައިޓް ގްލޯބަލް
މި ހިދުމަތް މެދުވެރިކޮށް ސީދާ ޓީވީ އިން ޗެނަލްތައް ވަގުތުން ބެލޭނެ އެވެ. މިކަމަށް ހަމައެކަނި ބޭނުންވާނީ އިންޓަނެޓް ކަނެކްޝަނެކެވެ.
މި ހިދުމަތުގައި ހިމެނޭ ޕެކޭޖުގެ އަގަކީ މަހަކު 199ރ. އެވެ. އަދި 12 މަހުގެ ޕްލޭނެއް ނަގާކަމުގައި ވާނަމަ ޖުމްލަ 1،200ރ. އެވެ. އެއީ މަހަކަށް އެންމެ 100ރ. އެވެ.
ކޮންމެ ޕެކޭޖަކާއެކު ވެސް މީޑިއާނެޓުގެ ވީޑިއޯކްލަބް ކޮންޓެންޓް ފެންނާނެ އެވެ.
އެމް އެސް ޑިޖިޓަލް ގްލޯބަލް
މި ޕެކޭޖާއިއެކު ކޮންމެ ވަގުތަކު އަދި ކޮންމެ ތާކުހުރެވެސް މޮބައިލް ފޯނު އެޕްލިކޭޝަން މެދުވެރިކޮށް ދިވެހި ޗެނަލްތަކާއި ވީޑިއޯ ކްލަބް ކޮންޓެންޓް ބަލާލެވޭނެ އެވެ.
މި ހިދުމަތުގައި ހިމެނޭ ޕެކޭޖުގެ އަގަކީ މަހަކަށް އެންމެ 74ރ. އެވެ. އަދި 12 މަހުގެ ޕްލޭނެއް ނަގާކަމުގައި ވާނަމަ ޖުމްލަ 600ރ. އެވެ. އެއީ މަހަކަށް އެންމެ 50ރ. ގެ އަގެކެވެ.
މި ދެ ހިދުމަތުގައިވެސް ތަފާތު ފީޗާތަކެއް ހިމެނިފައިވާނެ ކަމުގައި މީޑިއާނެޓުން ބުނެ އެވެ. އެގޮތުން ކެޗަޕް ފީޗާ މެދުވެރިކޮށް ފާއިތުވި ހަތަރު ދުވަހު ޗެނަލްތަކުން ވަގުތުން އައި ޕްރޮގްރާމްތައް އަލުން ބެލޭނެ އެވެ. އޭގެ އިތުރުން ވަގުތުން ދައްކަމުންދާ ޕްރޮގްރާމްތައް ޕޯސް ކޮށް، ރިވައިންޑްކޮށް އަދި ކުރިއަށް އަންނަން ހުރި ޕްރޮގްރާމްތައް އީޕީޖީ މެދުވެރިކޮށް ބަލާލާ, ރިމައިންޑާ ވެސް ސެޓްކޮށްލެވޭނެ ކަމުގައި މީޑިއާނެޓުން ބުނެ އެވެ.
މި ހިދުމަތްތަކަށް މީޑިއާނެޓުގެ ރަޖިސްޓްރޭޝަން ޕޯޓަލް މެދުވެރިކޮށް ރަޖިސްޓާ ކޮށްލެވޭނެ އެވެ. މައުލޫމާތު ފުރިހަމަކުރުމުން ލޮގިން ޑީޓެއިލްސް އީމެއިލް މެދުވެރިކޮށް ކަސްޓަމަރަށް ލިބިގެންދާނެ އެވެ.
ޕެކޭޖަށް ފައިސާ ދެއްކުމަށާއި ވައުޗާ ބަލައިގަތުމަށް މީޑިއާނެޓުގެ "ކުއިކްޕޭ" ޕޭމަންޓް ޕޯރޓަލް ބޭނުން ކުރެވޭނެ އެވެ.
މީޑިއާނެޓުން ބުނީ މި ހިދުމަތާއިއެކު ދިވެހިރާއްޖޭގެ މުނިފޫހިފިލުވުމުގެ ދާއިރާ އިތުރަށް ފުޅާވެ، ރާއްޖޭގައި ހިނގަމުންދާ ކަންކަމާއި ހަރަކާތްތަކުގެ މައުލޫމާތު ގައުމުން ބޭރުގައި ތިބި ފަރާތްތަކަށް ފަސޭހަކަމާއެކު ބެލުމުގެ މަގު ފަހިވެގެންދާނެ ކަމަށެވެ.
މީޑިއާނެޓުން އަބަދުވެސް މަސައްކަތް ކުރަމުން އަންނަނީ ޒަމާނީ ޓެކްނޮލޮޖީ މެދުވެރިކޮށް ދިވެހިންނަށް މުނިފޫހިފިލުމަށް އިތުރު ލުއި ފަސޭހަ ގޮތްތައް ފޯރުކޮށްދިނުމަށެވެ.
