ވިލާ އިންޓަނޭޝަނަލް ހައި ސްކޫލުގައި އޭ ލެވެލް ކިޔެވުމުގެ ފުރުސަތު މިއަދު ހުޅުވާލައިފި އެވެ.
އެ ސްކޫލުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ސްކޫލުގެ ޕްރިންސިޕަލް ސައީދު އަހުމަދު ވިދާޅުވީ ވިލާ ސްކޫލުގައި 11 އަދި 12 ކިޔަވަން ބޭނުންވާ ދަރިވަރުންނަށް، އޮގަސްޓު 29 ގެ ނިޔަލަށް އޮންލައިންކޮށް އަދި ފޯމު ހުށަހަޅައިގެން ވެސް ކުރިމަތިލެވޭނެ ކަމަށެވެ.
އަދި, އެޑިޔުކޭޝަނުގެ މިންގަޑަށް އޯލެވެލް އިމްތިހާނުން ފާސްވެފައިވާ ހުރިހާ ދަރިވަރުންނަށް އެ ސްކޫލުން ހިލޭ ކިޔެވުމުގެ ޖާގަ ތަނަވަސް ކޮށްދޭނެ ކަމަށް ސައީދު ވިދާޅުވި އެވެ.
"ވަރަށް ގިނަ ބެލެނިވެރިންނަށް ހީފުޅުވެފައި އޮންނަނީ އަޅުގަނޑުމެންނަކީ ސަރުކާރު ސްކޫލެެއް ނޫންވީމަ، ބޮޑު ފީ އެއް ނަގައިގެންނޭ ކިޔަވައި ދެނީ. ނޫން. އެޑިއުކޭޝަންގެ މިންގަނޑަށް އޯލެވެލް އިން ފާސްވި ހުރިހާ ދަރިވަރުންނަށްވެސް މި ސްކޫލުން ހިލޭ ކިޔެވޭނެ" ސައީދު ވިދާޅުވި އެވެ.
އެޑިއުކޭޝަންގެ މިންގަނޑަކީ އޯލެވެލް އަދި އެސްއެސްސީ އިމްތިހާނުގެ ދިވެހި ނުވަތަ އިސްލާމް ހިމެނޭ ގޮތަށް ޖުމްލަ ފަސް މާއްދާއިން ފާސްވެފައިވުމެވެ. ފާސްވެފައިވާ ކަމަށް ބެލެވޭނީ ސީ އަދި އެއަށްވުރެ މަތިން ފާސްވެފައިވުމުންނެވެ. މިނިސްޓްރީގެ މާލީ އެހީގެ ދަށުން އޭލެވެލް އަށް ހިލޭ ކިޔެވުމުގެ ފުރުސަތު ލިބޭ ދަރިވަރުން ދިވެހި އަދި އިސްލާމް އިތުރުން އެޑެކްސެލް ނުވަތަ ކެމްބްރިޖް އިންޓަނޭޝަނަލް އެގްޒޭމިނޭޝަންސްގެ ތިން މާއްދާ ކިޔަވަން ޖެހޭނެ އެވެ.
ސައީދު ވިދާޅުވީ އެ ސްކޫލަށް އަލަށް ވަންނަ ދަރިވަރުންނާއި މިހާރު އެ ތަނުގައި ތިބި ދަރިވަރުންނަށް ހާއްސަކޮށްގެން ދެ ސްކޮލަޝިޕަކަށް ވެސް ހުޅުވާލާފައިވާ ކަމަށެވެ. އެއީ އޯ ލެވެލް އިން ގައުމީ ގަދަ 10ގެ އެއްވަނަ ލިބޭ ދަރިވަރުންނަށް ދޭ ބްރިލިއަންޓް ސްކޮލަޝިޕް އާއި އެޑިއުކޭޝަންގެ ކަލަންޑަރުގައި ހިމެނިފައިވާ ކުޅިވަރު މުބާރާތަކުން އެއްވަނަ ލިބޭ ދަރިވަރުންނަށް ދޭ ސްޕޯޓްސް ސްކޮލަޝިޕެވެ. އަދި ސްކޫލުގައި ރަޖިސްޓްރީ ވުމަށްފަހު ކޮންމެ ދަރިވަރަކަށްވެސް މ ސްކޮލާޝިޕްތަކަށް އެދި ހުށަހެޅޭނެ ކަމަށް ވިދާޅުވި އެވެ.
މީގެ 13 އަހަރުކުރިން އުފެއްދި ވިލާ ހައި ސްކޫލުގައި މިހާރު ވެސް 700 އަށްވުރެ ގިނަ ދަރިވަރުން ތައުލީމް ހާސިލްކުރެ އެވެ.
ސައީދު ވިދާޅުވި ގޮތުގައި މިފަހަރު ހުޅުވާލީ 800 ދަރިވަރުންގެ ޖާގައަށެވެ. އަދި ސްކޫލުން ޖާގަ ލިބޭ ދަރިވަރުންގެ ލިސްޓް އޮގަސްޓު 31, ގައި އެ ސްކޫލުގެ ވެބްސައިޓުގައި ޕަބްލިޝް ކުރައްވާނެ ކަމަށާއި ގްރޭޑް 11 އަށް ވަންނަ ދަރިވަރުންނާއި ބެލެނިވެރިންނަށް ހާއްސަ ބައްދަލުވުމެއް އަންނަ ސެޕްޓެމްބަރު ދޭއްގައި ބާއްވާނެ ކަމަށްވެސް ވިދާޅުވި އެެވެ.
ވިލާ ސްކޫލު ފާހަގަކުރެވެނީ ރާއްޖޭގައި ހިންގާ އެންމެ ފެންވަރު ރަނގަޅު އެއް ސްކޫލުގެ ގޮތުގަ އެވެ. އެ ސްކޫލަކީ ތަފާތު އިންޑަސްޓްރީ ތަކުގެ މައުލޫމާތާއި ތަޖުރިބާ ދަރިވަރުންނަށް ދީގެން ކެރިއާ ކަނޑައެޅުމަށް ދަރިވަރުންނަށް އެންމެ ބޮޑަށް މަގުފަހިކޮށްދޭ އެއް ސްކޫލެވެ. ތަފާތު ފެންވަރުގެ ކުދިންނަށް ޖާގަ ދީގެން ކިޔަވައިދޭއިރު އޭލެވެލް ނިންމާ ދަރިވަރުންގެ 70 ޕަސެންޓަށްވުރެ މަތީ އަދަދެއްގެ ދަރިވަރުން ޔުނިވަސިޓީތަކުން ޖާގަ ލިބޭ މިންވަރަށް ފާސްވާ ކަމަށް އެ ސްކޫލުން ބުންޏެވެ.
ވިލާ ހައި ސްކޫލުން ދަރިވަރުންނަށް ވީހާވެސް ގިނަ މާއްދާތަކުގެ އޮޕްޝަން ދިނުމުގެ ގޮތުން އާ މާއްދާތައް ތައާރަފްކުރުމުންދާއިރު މިފަހަރު އާ މާއްދާއެއް ގޮތުގައި ހިލޭ ޗައިނާ ބަސް ކިޔެވުމުގެ ފުރުސަތު ވެސް ވަނީ ހުޅުވާލާފަ އެެވެ. އަދި ދަރިވަރުންގެ ތައުލީމީ ނަތީޖާ މަތިކުރުމަށް ހާއްސަ މަސައްކަތްތަކެއް ކުރަމުންދާއިރު މިމަހު 20 ގައި ފެށޭ އިމްތިހާނަށް ތައްޔާރުވުމަށްވެސް އެ ސްކޫލުން ހާއްސަ ޕްރޮގްރާމެއް ކުރިއަށްގެންދާނެ އެވެ.
މި ޕްރޮގްރާމްގައި ދަރިވަރުންނަށް ކިޔަވައިދެއްވާނީ ރާއްޖޭން ބޭރުން ގެންނަ ސަބްޖެކްޓު އެކްސްޕާޓުން ކަމަށް ވިލާ ހައި ސްކޫލުން ބުންޏެވެ.
ވިލާ ހައި ސްކޫލުގެ ކިޔެވުން ފެށުމަށް ހަމަ ޖެހިފައިވަނީ ސެޕްޓެމްބަރު ތިނެއްގަ އެވެ. މި ސްކޫލަށް ވަނުމަށް އެދޭ ފޯމް ވިލާ ސްކޫލުގެ ވެބްސައިޓުން އަދި ސްކޫލު އޮފީހުން ލިބެން ހުންނާނެ އެވެ.
