ދަ ޑިމޮކްރެޓްސްގެ ވެރިކަމެއްގައި މަސްވެރިން ގައުމީ ޕެންޝަން ސްކީމުގައި ހިމަނާ، ވަޒީފާ ދޭ ފަރާތުގެ ހައިސިއްޔަތުން ދޭން ޖެހޭ ކޮންޓްރިބިއުޝަން ފައިސާ ސަރުކާރުން ހަމަޖައްސައިދޭނެ ކަމަށް އެ ޕާޓީގެ ރިޔާސީ ކެނޑިޑޭޓު އިލްޔާސް ލަބީބު މިއަދު ވިދާޅުވެއްޖެ އެވެ.
އިލްޔާސް މިހެން ވިދާޅުވީ މަސްވެރި ރަށެއް ކަމުގައިވާ ގއ. ގެމަނަފުއްޓަށް ވަޑައިގެން ބޭއްވި ކެމްޕެއިން ހަރަކާތެއްގައި ވާހަކަ ދައްކަވަމުންނެވެ.
އެގޮތުން އިލްޔާސް ވިދާޅުވި ގޮތުގައި މަސްވެރިކަންނަކީ އިގުތިސޯދުގައި މުހިންމު ދައުރެއް އަދާކުރާ ބައެއް ކަމުގައިވީ ހިނދު ޕެންޝަން ސްކީމުގައި މަސްވެރިން ހިމަނާ، އެ ސްކީމުގައި ބައިވެރިވުމުން ލިބޭ މަންފާތައް ލިބެން ޖެހެ އެވެ.
"[މަސްވެރިން] ޕެންޝަން ފަންޑުގަ ބައިވެރިވެގެން އެ މީހުން ކޮންޓްރިބިއުޓްކުރާ މިންވަރެއް ސަރުކާރުން އެ މީހުންގެ ނަމުގަ ލާރި ސަރުކާރުން ލާނަން، އޭގެ ފައިދާއަކީ އެމީހުން ހައްޖަށް ދާން ނުވަތަ ގެ އަޅާން ކޮރެޓްރަލް އެއްގެ އެހެން މީހުންނަށް ޕެންޝަން ފަންޑު ބޭނުންކުރެވޭހެން މަސްވެރިންނަށް ވެސް ބޭނުންކުރެވެން ޖެހޭ،" އިލްޔާސް ވިދާޅުވި އެވެ.
މަސްވެރިކަމުގެ ދާއިރާއަށް އިލްޔާސް ދެއްވި އަނެއް ޔަގީންކަމަކީ މިހާރު 17ރ. ހުރި މަހުގެ 25ރ. އިތުރުކޮށްދިނުމެވެ. އެކަމަށްޓަކައި މަސް ގަންނަ ފަރާތްތަކަށް ލިބޭ ގެއްލުން ސަރުކާރުން ސަބްސިޑައިޒް ކޮށްދޭނޭ ކަމަށް އޭނާ ވިދާޅުވި އެވެ.
ގެމަނަފުށީގައި ދެއްކަވި ވާހަކައިގައި އިލްޔާސް ވަނީ ފަތުރުވެރިކަމުގެ ދާއިރާ ކުރިއެރުވުމުގެ ގޮތުން ގެމަނަފުށީގެ ރައްޔިތުން ބޭނުންވެއްޖެ ނަމަ އެ ރަށާ ޖެހިގެން އޮންނަ، މިހާރު ވެސް އެ ރަށުގެ އިހުތިސާސުގެ ތެރޭގައި ހިމެނޭ ކަލުޑިރެހާ ގެސްޓްހައުސް ވިޔަފާރިއަށް ހާއްސަކުރަން ތައްޔާރަށް ހުންނެވި ކަމަށް ވިދާޅުވެފަ އެވެ.
"މި ރަށުގެ ރައްޔިތުން ބޭނުންވަނީ އެތަނުގަ ގެސްޓުހައުސް ވިޔަފާރި ކުރަންތޯ ނޫންތޯ އެއީ މި ރަށުގެ ރައްޔިތުން ނިންމަންޖެހޭ ކަމެއް، ރައްޔިތުން އެތަނުގައި ގެސްޓުހައުސް ވިޔަފާރި ކުރަން ބޭނުންވާ ނަމަ އަޅުގަނޑުމެން އެކަން ކޮށްދޭން މިތިބީ ތައްޔާރަށް،" އިލްޔާސް ވިދާޅުވި އެވެ.
އޭގެ އިތުރުން ހުވަދު އަތޮޅަކީ ފަތުރުވެރިކަމަށް ފައްކާވެފައިވާ މަންޒިލެއް ކަން ފާހަކުރަމުން އިލްޔާސް ވަނީ ވިޔަފާރިތަކަށް ރަހުނަކާ ނުލާ ލޯނޫ ދޫކުރަންވީ ވައުދު ތަކުރާރުކުރައްވާފަ އެވެ. އެކަމަށްޓަކައި، އޭނާ ވިދާޅުވީ، ބޭނުންވަނީ އެކަން ކުރާނެ ގޮތުގެ ޕްލޭނެއް އެކަނި ކަމަށެވެ.
"އެކަން ކުރުމަށް ތިބޭފުޅުންގެ އަތުގައި އިކުއިޓީއެއް ހުންނާކަށް ނުޖެހޭ، ގެއެއް މޯގޭޖު ކުރާކަށް ނުޖެހޭ، ބޭންކު ޑޮކިއުމެންޓުތަކެއް ބޭނުމެއް ނުވޭ، ތިބޭފުޅުން އެކަން ކުރާނެ ގޮތުގެ ޕްލޭނެއް އަޅުގަނޑުމެންނަށް ދޭން ޖެހޭނީ" އިލްޔާސް ވިދާޅުވި އެވެ.
މިއީ ޑިމޮކްރެޓްސްގެ 'ފަސޭހަ ވިޔަފާރި' ސިޔާސަތުގެ ދަށުން އެކަން ކުރަން ބޭނުންވާ އެންމެންނަށް ހުޅުވިފައި އޮތް ފުރުސަތެއް ކަން އިލްޔާސް ފާހަގަކުރެއްވި އެވެ.
މިވަގުތު ހުވަދު އަތޮޅުގައި ކެމްޕެއިން ކުރައްވަމުން ގެންދަވާ އިލްޔާސް ވަނީ ގެމަނަފުއްޓަށް ފަހު އެ އަތޮޅު ގައްދޫ އާއި ހޯންޑެއްދޫ އާއި މަޑަވަލީގެ އިތުރުން ތިނަދޫއަށް ވަޑައިގެންފަ އެވެ. އޭނާގެ އަރިހުގައި ރައްޔިތުންގެ މަޖިލީހުގެ ރައީސް އަދި ޑިމޮކްރެޓްސްގެ އިސް ލީޑަރު މުހައްމަދު ނަޝީދު ވެސް ގެންދަވަނީ ކެމްޕެއިން ކުރައްވަމުންނެވެ.
