އިއްޔެ ރައީސް އިބްރާހިމް މުހައްމަދު ސޯލިހު ގއ. ވިލިނގިއްޔަށް ވަޑައިގެންނެވި ވަގުތު އެރަށު ޕީޕީއެމް ސަޕޯޓަރުން ކުރި މުޒާހަރާ ފުލުހުން ރޫޅާލުން ކުށްވެރިކޮށް, އެއްވެ އުޅުމުގެ ހައްގަށް ހުރަސް ނޭޅުމަށް އިދިކޮޅު ޕީޕީއެމުން ގޮވާލައިފި އެވެ.
ޕީޕީއެމް މެންބަރުންގެ މުޒާހަރާ ރޫޅާލި ވަގުތު ފުލުހުންނަށް ހަމަލާ ދިނުމުގެ ސަބަބުން ވިލިނގިލިން އިއްޔެ ވަނީ ތިން މީހުން ހައްޔަރުކޮށްފަ އެވެ.
މިކަމާ ގުޅިގެން ޕީޕީއެމުން މިއަދު ނެރުނު ނޫސްބަޔާނެއްގައި ބުނީ, ވިލިނގިލީގައި އަޑު އުފުލާ ސުލްހަވެރިކަމާއެކު އިހުތިޖާޖު ކުރަމުން ދިޔަ އެތައް ރައްޔިތުންނަކަށް ފުލުހުން މެދުވެރިކޮށް ހަލާތާއި ނުބައްދަލު ބާރުގެ ބޭނުންކޮށް އަނިޔާކޮށްފައިވާ ކަމަށެވެ. ޕީޕީއެމުން ވަނީ އެކަން އެންމެ ހަރުކަށި އިބާރާތުން ކުށްވެރިކޮށްފަ އެވެ.
އެ ޕާޓީން ބުނާ ގޮތުގައި ފުލުހުން ވަނީ އިއްޔެ ވިލިނގިލީގައި އެރަށުގެ ޕީޕީއެމްގެ ތިން ސަޕޯޓަރުން އަނިޔާވެރިކަމާއެކު ހައްޔަރުކޮށްފަ އެވެ. މިއީ އެ ޕާޓީން ބުނާ ގޮތުގައި ހިޔާލުފާޅު ކުރުމާއި އެއްވެ އުޅުން އަދި އިހުތިޖާޖު ކުރުމުގެ ހައްގަށް ސަރުކާރުން އަރައިިގަތުމެވެ.
"ސުލްޙަވެރިކަމާއެކު، ހިޔާލުފާޅުކުރުމާއި އެއްވެ އުޅުމަކީ ގާނޫނުއަސާސީ އިން ދިވެހި ރައްޔިތުންނަށް ކަށަވަރުކޮށްދޭ އަސާސީ ހައްގަކަށް ވާއިރު، އެކަންކަމަށް ހުރަސް ނޭޅުމަށް ސަރުކާރަށް ގޮވާލަމެވެ." ޕީޕީއެމްގެ ބަޔާނުގައި ވެއެވެ.
ޕީޕީއެމްގެ ބަޔާނުގައި ވަނީ ސަރުކާރުގެ 'ޣައިރު ގާނޫނީ' އަމުރުތަކަށް ތަބާނުވުމަށް ފުލުހުންނަށް ގޮވާލާފަ އެވެ.
ރައީސް އިބްރާހިމް މުހައްމަދު ސޯލިހު ކެމްޕޭނަށް ވަޑައިގަންނަވާ ބައެއް ރަށްރަށުގައި ޕީޕީއެމްގެ ސަޕޯޓަރުން ގެންދަނީ އިހުތިޖާޖު ކުރަމުންނެވެ. އެ މީހުން ގޮވާލަމުންދަނީ ޖިނާއީ ހުކުމެއް ތަންފީޒު ކުރައްވަމުން ގެންދަވާ އިދިކޮޅު ލީޑަރު އަބްދުالله ޔާމީން މިނިވަން ކުރުމަށެވެ.
