ދިރާގާއި ސްޕާކްހަބް ގުޅިގެން ކުރިއަށްގެންދިޔަ "ލީން ސްޓާޓްއަޕް މޯލްޑިވްސް 2023 ވޯކްޝޮޕް" ކާމިޔާބުކަމާ އެކު ނިންމާލައިފި އެވެ.
މި ވޯކްޝޮޕްގައި އިނޮވޭޝަނާއި ވިޔަފާރި ކުރިއެރުވުމަށްޓަކައި ރާއްޖޭގައި ލީން މެތަޑޮލޮޖީތައް ބޭނުންކުރާނެ ގޮތް ދަސްކުރުމަށް ޝައުގުވެރިވި 50 ފަރާތަކުން ވަނީ ބައިވެރިވެފަ އެވެ.
ވޯކްޝޮޕްގެ ބައިވެރިން ވަނީ ލީން މެތަޑޮލޮޖީގެ އުސޫލުތައް އެމީހުންގެ މަސައްކަތުގެ މާހައުލުގައި އަދި އަލަށް ފަށާ ވިޔަފާރިތަކުގައި ބޭނުން ކުރެވިދާނެ ގޮތް ދަސްކޮށްފަ އެވެ. އަދި, ޒަމާނީ ވަސީލަތްތަކާއި އުސޫލުތައް ތައާރަފްކޮށް، ހަލުވިކަމާއެކު ޕްރޮޓޯޓައިޕްތައް ހަދާނެ ގޮތުގެ މައުލޫމާތު ވެސް މި ވޯކްޝޯޕްގައި ފޯރުކޮށްދީފައިވެ އެވެ.
އެގޮތުން ޓީމްތަކުގައި މަސައްކަތްކުރަމުން ދިޔަ ބައިވެރިންނަށް ތަފާތު އެކްސްޕެރިމެންޓޭޝަން ޓެކްނިކްތައް މެދުވެރިކޮށް އެމީހުންގެ ހިޔާލުތައް ޓެސްޓްކޮށް، ރިފައިން ކުރާނެ ގޮތުގެ މައުލޫމާތާއި އަމަލީ ތަޖުރިބާ ލިބުނެވެ.
އޭގެ އިތުރުން އުފެއްދުންތަކާއި ހިދުމަތްތައް ފަރުމާކުރެވިފައިވަނީ ބޭނުންކުރާ މީހުންނަށް ވިސްނައިގެންކަން ކަށަވަރުކުރުމަށްޓަކައި، ކަސްޓަމަރުންގެ މުއާމަލާތްތައް ހަރުދަނާގޮތެއްގައި ކުރިއަށް ގެންދިއުމުގެ މުހިންމު ހަރަކާތްތައްވެސް މި ވޯކްޝޮޕުގެ ދަށުން ވަނީ ކުރިއަށް ގެންގޮސްފަ އެވެ.
މި ވޯކްޝޮޕާއި ގުޅޭގޮތުން ދިރާގުގެ ސީއީއޯ އަލި ރިޔާޒު ވިދާޅުވީ ވިޔަފާރީގެ ހުނަރު ތަރައްގީކުރުމަށް ހިއްވަރުދީ ސްޓާޓްއަޕް ސަގާފަތް ބާރުވެރިކުރުވުމަށް ދިރާގުން އަބަދުވެސް އެއްބާރުލުން ދެމުން ދާނެކަމަށެވެ.
"އަޅުގަނޑުމެން އުންމީދު ކުރަނީ ލީން ސްޓާޓްއަޕް މޯލްޑިވްސްގެ ބައިވެރިން ޕްރޮގްރާމުން ދަސްވި ކަންކަންމކުރިއަށް އޮތް ތަނުގައި ސްޓާޓަޕްތަކާއި ވިޔަފާރިތަކުގައި ބޭނުންކުރަމުންގެންދާނެކަމަށް. އަޅުގަނޑުމެން މިތިބީ ތިޔަބޭފުޅުންނަށް އެއްބާރުލުން ދޭން،" ދިރާގު ސީސީއޯ އަލީ ރިޔާޒު ވިދާޅުވިއެވެ.
ދިރާގާއި ސްޕާކްހަބުން އަންނަނީ ވިޔަފާރީގެ ހުނަރުތައް ތަރައްގީކުރުމަށް ހިތްވަރުދިނުމަށާއި، ސްޓާޓްއަޕް ސަގާފަތެއް ބިނާ ކުރުމަށް ގިނަ މަސައްކަތްތަކެއް ކުރަމުންނެވެ.
