ވަގު ޑޮލަރުތަކެއް ބޭނުންކޮށްގެން އޮޅުވާލައިގެން ބިދޭސީއެއްގެ އަތުން އައިފޯނެއް ނެގި މީހަކު ހަތް މަހާއި 24 ދުވަހަށް ޖަލަށްލުމަށް ކްރިމިނަލް ކޯޓުން މިދިޔަ ބުރާސްފަތި ދުވަހު ހުކުމްކޮށްފި އެވެ.
ސ. ހިތަދޫ، އިރަމާގެ، ހުސެއިން ޒައިދާންގެ މައްޗަށް މި ދައުވާ ކުރީ، މެއި 11، 2023 ވަނަ ދުވަހު އޭނާ އޮންލައިންކޮށް ފޯނު ވިއްކުމުގެ ވިޔަފާރި ކުރާ ބިދޭސީއަކަށް ގުޅައި އައިފޯން 13 ޕްރޯ މެކްސްއެއް ގަންނަން އޯޑަރު ދީ، އޭގެ އަގަށްވާ 1000 ޑޮލަރު ދެއްކާނެ ކަމަށް ބުނެ، އެ ބިދޭސީ މީހާއަށް އޮޅުވާލައިގެން އެ އަދަދަށް ވާ ވަރަށް ސައްހަ ނޫން ޑޮލަރު ނޫޓުތަކެއް ދީފައިވާ ކަމަށް ބުނެ އެވެ.
އެ މައްސަލައިގައި އޭނާގެ މައްޗަށް ދައުލަތުން މަކަރާއި ހީލަތުގެ ދައުވާ ކުރުމުން ކްރިމިނަލް ކޯޓުގައި ޒައިދާން ވަނީ ދައުވާއަށް އިއުތިރާރުވެފަ އެވެ. އެއީ ދައުލަތާއެކު ހެދި އިއުތިރާފު އެއްބަސްވުމެއްގެ ދަށުންނެވެ.
ގާނޫނުލްއުގޫބާތުގައި އޮންނަ ގޮތުން މަކަރާއި ހީލަތުގެ ކުށުގައި ހިމެނޭ މުދަލުގެ އަގު 5000ރ.އަށް ވުރެ މަތިވާ ނަމަ އެ ކުށް ވާނީ ޖިނާއަތުގެ ފަސް ވަނަ ދަރަޖައިގެ ކުށަކަށެވެ. އެހެންވެ، އަދަބުގެ އަސާސީ މިންގަނޑަކީ ނުވަ މަހާއި 18 ދުވަހަށް ޖަލަށްލުމެވެ. އިއުތިރާފު އެއްބަސްވުމުގައި ވެސް އެދިފައި އޮތީ މުއްދަތަށް އަދަބު ކަނޑައެޅުމެވެ.
އެހެންވެ، މިދިޔަ ބުރާސްފަތި ދުވަހު ކްރިމިނަލް ކޯޓުގެ ގާޒީ އިބްރާހިމް ޒިހުނީ ހުކުމްކުރެއްވީ، ޒައިދާންގެ އިއުތިރާފުުން ކުށް ސާބިތުވާތީ އޭނާ ނުވަ މަހާއި 18 ދުވަހަށް ޖަލަށްލުމަށެވެ.
ހުކުމުން އެނގޭ ގޮތުގައި އޭނާ މި މައްސަލައާ ގުޅިގެން ބަންދުގައި ހޭދަ ކުރި އެއް މަހާއި 24 ދުވަހުގެ މުއްދަތު ޖަލު އަދަބުން އުނިކުރުމުން ތަންފީޒު ކުރަން ޖެހޭނީ ހަތް މަހާއި 24 ދުވަހެވެ.
