ހުޅުމާލޭ ދެ ވަނަ ފިޔަވަހީގައި މި ސަރުކާރުން ތަަރައްގީކުރާ ފްލެޓުތަކުގެ މަސައްކަތް ކުރަމުން އަންނަ އިންޑިއާގެ މުވައްޒަފުން ހަޅުތާލަކަށް ނުކުމެއްޖެ އެވެ.
މި ސަރުކާރުން ފެށި ފްލެޓް މަޝްރޫއުގެ ތެރެއިން 2،000 ހައުސިން ޔުނިޓް އެޅުމަށް ހަވާލުކޮށްފައި ވަނީ އިންޑިއާގެ ޖޭއެމްސީ ޕްރޮޖެކްޓްސް ލިމިޓެޑްއާ އެވެ. އަދި އަނެއް 2،000 ޔުނިޓް އެޅުމަށް ހަވާލުކޮށްފައި ވަނީ އެގައުމުގެ ނެޝަނަލް ބިލްޑިންސް ކޮންސްޓްރަކްޝަން ކޮމްޕެނީ (އެންބީސީސީ) އާ އެވެ.
މިއަދު ހަޅުތާލުކުރީ ޖޭއެމްސީގެ މުވައްޒަފުންނެވެ.
ފްލެޓް އެޅުމުގެ މަސައްކަތުގައި އުޅޭ އިންޑިއާގެ ޖޭއެމްސީ ކުންފުނީގެ މުވައްޒަފުން ހަޅުތާލުކުރަނީ. ފޮޓޯ:ރައްޔާން މުހައްމަދު/އަދަދު
ހުޅުމާލެ ދެވަނަ ފިޔަވަހީގައި މި ވަގުތު ހުރި "އަދަދު" ނޫހުގެ ރިޕޯޓަރަކު ބުނީ މިއަދު ހަވީރުން ފެށިގެން މަގުމަތީގައި ގިނަ އަދަދެއްގެ މުވައްޒަފުން އުޅެމުންދާ ކަމަށެވެ. އެ މީހުން ކިޔައިދިން ގޮތުގައި އެ މީހުން އެ ތަނުގައި ތިބީ މަަސައްކަތް ހުއްޓާލައިގެންނެވެ. އެއީ އެ މީހުންގެ ކެއިިން ބުއިމުގެ ކަންކަން ގޯސްވުމުންނެވެ.
އެ ސަރަހައްދުގައި ގިނަ އަދަދެއްގެ ފުލުހުން ވެސް މި ރޭ އިރުއޮއްސުނު އިރު ހަރަކާތްތެރިވި އެވެ.
އެނގިފައިވާ ގޮތުގައި ފްލެޓްތަކުގެ މަސައްކަތް ހުއްޓާލައިގެން އެ މީހުން އެހެން ތިބޭތާ މިހާރު ތިންހަތަރު ދުވަސް ވެއްޖެ އެވެ.
