ބަޓޫމީ، ޖޯޖިއާ (ޖުލައި 9) - ރުމޭނިއާ އާއި ޖޯޖިއާގައި ހޯސްޓްކުރި 21 އަހަރުން ދަށުގެ ޔޫރޯ ފުޓްބޯޅަ މުބާރާތުގެ ޗެމްޕިއަންކަން އިނގިރޭސިން (އިންގްލެންޑް އިން) ހޯދައިފި އެވެ.
އިންގްލެންޑުން މި މުބާރާތުގެ ތަށި އުފުލާލާފައިވަނީ ރޭ ކުުޅުނު ފައިނަލް މެޗުގައި 1-0 އިން ސްޕެއިން ބަލިކުރުމަށް ފަހު އެވެ. މިއީ، 1984 ވަނަ އަހަރުގެ ފަހުން، މި ވޭތުވެދިޔަ 40 އަކަށް އަހަރުތެރޭ އިންގްލެންޑުން މި މުބާރާތް ކާމިޔާބުކުރި ފުރަތަމަ ފަަހަރު އެވެ. އިންގްލެންޑުން ވަނީ 1982 ވަނަ އަހަރު ވެސް މި މުބާރާތް ކާމިޔާބުކޮށްފަ އެވެ.
ރޭގެ ފައިނަލުގައި ފެނިގެންދިޔަ ހަމައެކަނި ލަނޑު ޖެހީ ފުރަތަމަ ހާފުގެ ފަހު ސިކުންތު ކޮޅުގެ ތެރޭގަ އެވެ. ފުރަތަމަ ހާފުގެ ފުރިހަމަ ވަގުތު ހަމަވެ، ދެއްކި އިތުރު ވަގުތުގެ ހަތަރު ވަނަ މިނިޓްގައި އިންގްލެންޑްގެ ކޯލް ޕާމާ ޖެހި ހިލޭ ޖެހުން އެ ޓީމުގެ ކާޓިން ޖޯންސް ފައިގައި ޖެހިފައި ވަނީ ގޯލަށެެވެ. އެ ބޯޅަ ހުއްޓުވަން ސްޕެއިންގެ ކީޕަރު، އާނައު ޓެނިއާސް އަށް މާ ބޮޑު ކަމެއް ނުކުރެވުނެވެ.
ފަހު ވަގުތު ޕެނަލްޓީ މަތަކުރުމަށް ފަހު ޓްރަފޯޑް (ވ) އެ ޓީމުގެ ކުޅުންތެރިންނާ އެކު އުފާކުރަނީ.--- ފޮޓޯ: އޭއެފްޕީ
އިންގްލެންޑް ރޭ ސަލާމަތްވީ ކިރިޔާ އެވެ. އެ ގޮތުން މެޗުގެ އިތުރު ވަގުތުގައި ސްޕެއިން އަށް ވަނީ ނަތީޖާ ހަމަހަމަކުރަން ޕެނަލްޓީ އެއް ލިބިފަ އެވެ. އެ ގޮތުން އިތުރު ވަގުތުގައި ލިބުނު ޕެނަލްޓީ ސްޕެއިންގެ އަބެލް ރުއީޒް ފޮނުވާލުމުން އިނގިރޭސި ކީޕަރު ޖޭމްސް ޓްރަފޯޑް ވަނީ މަތަކޮށްފަ އެވެ.
މި މުބާރާތުގައި 13 ގޯލު ޖެހި ރުއިޒްގެ ޕެނަލްޓީ ޓްރަފޯޑް މަތަކުރިއިރު، މުބާރާތުގައި އޭނާ ހުރި ގޯލަށް ކުޅުނު ހަ މެޗުގައި ވެސް ބޯޅައެއް ވަދެފައިނުވެ އެވެ. އިންގްލެންޑަކީ ބައިކޮޅަށް ގޯލެއް ނުވަދެ މި މުބާރާތް ކާމިޔާބުކުރި ހަމައެކަނި ޓީމެވެ.
މި ވަގުތު މެންޗެސްޓާ ސިޓީގައި ހުރި ކީޕަރު ޓްރަފޯޑް، 20، އަންނަ ސީޒަނުގައި ފެންނާނީ ބާންލީ އިންނެވެ. ބާންލީން ވަނީ 25 މިިލިއަން ޑޮލަރުގެ ފީއެއް ދައްކައި، ޓްރަފޯޑް ގަންނަން ނިންމައިފަ އެވެ. މި ޑީލާ އެކު ޓްރަފޯޑް ވެގެންދާނީ އިނގިރޭސި ފުޓްބޯޅައިގައި ތިން ވަނަ އަށް އެންމެ އަގުބޮޑު ކީޕަރަށެވެ.
