އެމެރިކާއިން އުފައްދާ ޗައިނާއަށް އެކްސްޕޯޓުކުރާ އާޓިފިޝަލް އިންޓެލިޖެންސް (އޭއައި) ޗިޕުގެ އަދަދު މަދު ކުރުމުގެ ގޮތުން ހާއްސަ ފިޔަވަޅުތަކެއް އެޅުމަށް އެ ގައުމުގެ ސަރުކާރުން ނިންމާފައިވާ ކަމަށް ރިޕޯޓުތައް ބުނެފި އެވެ.
މި ރިޕޯޓުތަކާ އެކު އެންމެ ގިނައިން ޗިޕު އުފައްދާ ދެ ކުންފުނި ކަމަށްވާ އޭއެމްޑީ އަދި އެންވީޑިއާގެ ހިއްސާގެ އަގުތައް ވަނީ ދަށަށް ގޮސްފަ އެވެ. އެ ދެ ކުންފުނީގެ އިތުރުން މައިކްރޯން އިން އުފައްދާ ޗިޕުތައް އެކްސްޕޯޓު ކުރުމަށް ވެސް ހުރަސްތަކެއް ވަނީ ކުރިމަތިވެފަ އެވެ.
އެގޮތުން, އަންނަ ޖުލައި މަހުގެ ތެރޭގައި ޗައިނާއަށް އެކްސްޕޯޓު ކުރަން ނިންމާފައިވާ ޗިޕުތަކުގެ ޝިޕްމެންޓުތައް އެމެރިކާގެ ކޮމާސް ޑިޕާޓުމަންޓުން ހުއްޓުވާނެ ކަމަށް ވެސް ރިޕޯޓުތައް ބުނެ އެވެ.
ރައީސް ޖޯ ބައިޑެންގެ ސަރުކާރުން އޮތީ އޭއައިގައި ބޭނުންކުރާ އެންމެ މުހިންމު ޗެ ޗިޕު އެންވީޑިއާއިން ޗައިނާއަށް ވިއްކުން މަނާކޮށްފަ އެވެ. އެކްސްޕޯޓު ކޮންޓްރޯލް ގަވާއިދުތަކަށް ތަބާވުމުގެ ގޮތުން އެ ކުންފުނިން ވަނީ ޗައިނާ މާކެޓަށް ހާއްސަކޮށް ޗިޕެއް އުފައްދާފަ އެވެ.
އޭގެ އިތުރުން, މިއަހަރު ބާޒާރަށް ނެރުނު އެ ކުންފުނީގެ އެންމެ ވަރުގަދަ ޗިޕަށް ވެސް ވަނީ މި ގަވާއިދުތަކަށް ފެއްތުމުގެ ގޮތުން ބަދަލުތަކެ ގެނެސްފަ އެވެ.
މި ބަދަލުތަކާ އެކު ވެސް ޗައިނާއަށް ޗިޕުތައް އެކްސްޕޯޓު ކުރެވެނީ ހާއްސަ ހުއްދައެއްގެ ދަށުންނެވެ. އެކަމާ ގުޅިގެން މިހާތަނަށް އެއްވެސް ބަހެއް އެމެރިކާގެ ކޮމާސް ޑިޕާޓުމަންޓުން ހާމަކޮށްފައި ނުވެ އެވެ.
