ޓްވިޓާގެ ޔޫޒާސްއަށް ދުވާލަކު ބެލޭނެ ޓްވީޓްތަކުގެ އަދަދު ލިމިޓްކޮށްފައިވާ ކަމަށް އިލޯން މަސްކް ބުނެފި އެވެ.
ޓްވިޓާގެ އެގްޒެކެޓިވް ޗެއާ މަސްކް ކުރި ޓްވީޓެއްގައި ބުނެފައިވަނީ ޓްވިޓާގެ ޑޭޓާ ނަހަމަގޮތުގައި ބޭނުންކުރުން ހައްދު ފަހަނައަޅާފައިވާތީ، ވެރިފައިޑް އަދި އަންވެރިފައިޑް އެކައުންޓްތަކުން ދުވާލަކު ބެލޭނެ ޓްވީޓްތަކުގެ އަދަދު ލިމިޓްކޮށްފައިވާ ކަމަށެވެ.
މަސްކް މިކަން ފުރަތަމަ އިއުލާންކޮށް ކުރި ޓްވީޓްގައި ބުނެފައިވަނީ، ވެރިފައިޑް އެކައުންޓްތަކުގެ ލިމިޓަކީ ދުވާލަކު 6،000 ޕޯސްޓް ކަމަށާއި، އަންވެރިފައިޑް އެކައުންޓްތަކުގެ ލިމިޓަކީ ދުވާލަކު 600 ޕޯސްޓް ކަމަށެވެ. އަދި އަލަށް ހުޅުވާ އަންވެރިފައިޑް އެކައުންޓްތަކަށް ބެލޭނީ ދުވާލަކު 300 ޕޯސްޓްކަމަށް މަސްކް ބުނެފައިވެ އެވެ.
ނަމަވެސް އޭގެ ފަހުން ކުރި ޓްވީޓެއްގައި މަސްކް ވަނީ ވަގުތީ ގޮތުން ލިމިޓޭޝަންގެ އަދަދު އިތުރުކޮށްފައިވާ ކަމަށް ބުނެފަ އެވެ. އެގޮތުން ވެރިފައިޑް ޔޫޒަރުންނަށް މިހާރު ދުވާލަކު 10،000 ޕޯސްޓް ބެލޭއިރު، އަންވެރިފައިޑް އެކައުންޓްތަކަށް ދުވާލަކު 1،000 ޕޯސްޓް އަދި އަލަށް ހުޅުވާ އަންވެރިފައިޑް އެކައުންޓްތަކުން ދުވާލަކު 500 ޕޯސްޓް ބެލޭނެ އެވެ.
މި ލިމިޓޭޝަންތައް ކަނޑައެޅުމުގެ ކުރިން މަސްކަ ވަނީ، އޯޕަންއޭއައި ފަދަ އާޓިފިޝަލް އިންޓެލިޖެންސް ކުންފުނިތަކުގެ ލެންގުއޭޖް މޮޑެލްތައް ތަމްރީނު ކުރުމަށް ޓްވިޓާގެ ޑޭޓާ ބޭނުން ކުރާތީ ހިތްހަމަ ނުޖެހުން ފާޅުކޮށްފަ އެވެ. އަދި އެތައް ސަތޭކަ ޖަމިއްޔާތަކުން ޓްވިޓާގެ ޑޭޓާ ނަހަމަ ގޮތުގައި ސްކްރޭޕް ކުރުމަކީ ޔޫޒަރުންގެ ތަޖުރިބާއަށް އަސަރުކުރާ ކަމެއް ކަމަށް ވެސް އޭނާ ފާހަގަކޮށްފައިވެ އެވެ.
މަސްކް ޓްވިޓާގަތުމަށް ފަހު ގެންނަ ކޮންމެ ބަދަލަކަށް ގިނަ ބައެއްގެ ފާޑުކިޔުން އަމާޒުވާ ފަދައިން މި ނިންމުމަށް ވެސް ވަނީ އެތައް ބައެއްގެ ނުރުހުން އަމާޒުވެފަ އެވެ. މިފަދަ ޝަކުވާ ތަކަށް އަމާޒުކޮށް ސަމާސާ ރާގަކަށް މަސްކް ކުރި ޓްވީޓެއްގައި ވަނީ، ލިމިޓްތަކާ މެދު ޝަކުވާ ކުރަމުން ދަނިކޮށް ލިމިޓް ހަމަވުމުގެ މަޖާޒީކަމަށް އިޝާރާތްކޮށްފަ އެވެ. އޭނާގެ ޓްވީޓްތަކުގެ ސަބަބުން #RipTwitter އަދި #Twitterdown ފަދަ ހޭޝްޓެގްތައް ވަނީ ޓްރެންޑްވާން ފަށައިފަ އެވެ.
ޓްވިޓާ އައު ސީއީއޯ އަންނަނީ މަސްކްގެ މިލްކުވެރިކަމުގައި ޕްލެޓްފޯމް ދޫކޮށް ދިޔަ އިޝްތިހާރު ކުރާ ފަރާތްތައް އަލުން ހޯދުމަށާއި ސަބްސްކްރިޕްޝަން އާމްދަނީ އިތުރުކުރުމަށް ގިނަ ފިޔަވަޅުތަކެއް އަޅަމުންނެވެ. މި މަސައްކަތްތަކުގެ ތެރޭގައި ވެރިފިކޭޝަން ޗެކްމާކްސް ޓްވިޓާ ބްލޫ ޕްރޮގްރާމްގެ ބައެއްގެ ގޮތުގައި ހެދުން ހިމެނެއެވެ.
ޓްވިޓާގެ ކޯ ފައުންޑަރު އަދި ކުރީގެ ސީއީއޯ ޖެކް ޑޯސީ ވަނީ ގިނަ ގޮންޖެހުންތަކެއް ހުރި ހާލަތެއްގައި އަދުގެ ޓްވިޓާ ޓީމުން ކުރާ މަސައްކަތަށް ތާއީދު ފާޅުކޮށްފަ އެވެ. އޭނާ ކުރި ޓްވީޓެއްގައި ބުނެފައިވަނީ ޓްވިޓާ ހިންގުމަކީ އުނދަގޫ ކަމެއްކަމަށާއި މިހާރު އޮތް ޓީމަށް އިތުބާރު އޮތްކަމަށެވެ.
