ބިންވެރިޔާ ސްކީމްގެ ދަށުން މާލޭ ސަރަހައްދުން ގޯއްޗަށް ކުރިމަތިލީ މީހުންގެ ތެރެއިން ގޯތި ނުލިބުނު މީހުންނަށް ގޯތި ނުލިބުނު ސަބަބު ވެސް "ގެދޮރުވެރިން ޕޯޓަލް" މެދުވެރިކޮށް އެނގޭނެ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ސަރުކާރުގެ ބިންވެރިޔާ ސްކީމްގެ ދަށުން މާލޭ ސަރަހައްދުން ދޫކުރަން ހަމަޖެހިފައިވާ 5000 ގޯތި ލިބޭ މީހުންގެ ލިސްޓު އާންމު ކުރުމާ ގުޅޭ ގޮތުން މައުލޫމާތު ދިނުމަށް ރައީސް އޮފީހުގައި ކުރިއަށްދާ ނޫސްވެރިންގެ ބައްދަލުވުމުގައި މިނިސްޓަރު އަސްލަމް ވިދާޅުވީ، 5000 ގޯތި ދޫކުރުމަށް ރައީސް އިބްރާހިމް މުހައްމަދު ސޯލިހު ވެވަޑައިގެންނެވި ވައުދުގެ ދަށުން ދޫކުރާ ގޯތިތަކަށް ކުރިމަތިލީ މީހުންގެ ތެރެއިން ގޯތި ނުލިބޭ މީހުންނަށް ގޯތި ނުލިބުނު ސަބަބު އެނގޭނެ ކަމަށެވެ.
"ޑިސްކޮލިފައިވީ ފަރާތެއްވާ ނަމަ އެ ފަރާތެއް ޑިސްކޮލިފައިވީ ސަބަބު ވެސް ޕޯޓަލްއިން އެނގެން އޮންނާނެ،" އަސްލަމް ވިދާޅުވި އެވެ.
ގޯތި ހޯދުމަށް ހުށަހެޅި ފަރާތްތަކުގެ ތެރެއިން ކޮލިފައިވީ ހުރިހާ ފަރާތްތަކަކީ ވެސް ގޯތި ލިބެން ޖެހޭ ބައެއް ކަމަށް ބަލައިގެން ކުރިއަށް ދިއުމަށް ސަރުކާރުން ސިޔާސަތެއްގެ ގޮތުގައި ކަނޑައަޅާފައިވާ ކަމަށް ވެސް އަސްލަމް ވިދާޅުވި އެވެ. އެކަމަކު، މިއަދު އިއުލާނު ކުރާނީ ރައީސް އެންމެ ފުރަތަމަ ވައުދުވެވަޑައިގެންނެވި ގޮތަށް ފުރަތަމަ 5000 ގޯތި ލިބޭ މީހުން ކަމަށް ވިދާޅުވި އެވެ.
"ލިސްޓު އޮންނާނީ ލައިވް ލިސްޓެއްގެ ގޮތުގައި. ސަރުކާރުގެ ސިޔާސަތެއް އެބަ އޮތް މި ލިސްޓް ލައިވްކޮށް ބާއްވައިގެން ބާކީ ތިބި ފަރާތްތަކަށް އެކަން ހަމަޖެއްސުމަށް ކަންކަން ތަރުތީބު ކުރާނެ ގޮތް ވެސް،" އަސްލަމް ވިދާޅުވި އެވެ.
އަސްލަމް ވިދާޅުވި ގޮތުގައި ގޯތި ލިބޭ މީހުންގެ ފައިނަލް ލިސްޓު އާންމު ކުރާނީ ޝަކުވާތައް ބެލުމަށް ވަގުތު ދިނުމަށްފަހު ޖުލައި މަހުގެ ތެރޭގައި ކަމަށެވެ.
މާލެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅެކެވެ. އެ ވައުދުގެ ދަށުން 5000 ގޯއްޗާއި 4000 ފްލެޓަށް ފްލެޓަށް ކުރިމަތިލުމަށް ސަރުކާރުން ހުޅުވާލީ މިދިޔަ އަހަރުގެ ޖޫން 26 ވަނަ ދުވަހު އެވެ.
މިހާރު ނިންމާފައި ވަނީ ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދިނުމަށެވެ.
މިދިޔަ އޮކްޓޫބަރު 15 ވަނަ ދުވަހު، ކުރިމަތިލުމުގެ މުއްދަތު ހަމަވި އިރު، ބިންވެރިޔާ ސްކީމްގެ ދަށުން ދޫކުރުމަށް ކަނޑައެޅި 3000 ގޯއްޗަށް އެދި ޖުމްލަ 15،164 މީހުން ހުށަހަޅާފައިވެ އެވެ. އަދި, ގެދޮރުވެރިޔާ ސްކީމްގެ ދަށުން ދޫކުރުމަށް ކަނޑައެޅި 4000 ފުލެޓަށް އެދި 20،697 މީހުން ހުށަހަޅާފައިވެ އެވެ.
ބިންވެރިޔާ ސްކީމްގެ ދަށުން ދޫކުރާ ގޯތީގެ ތެރެއިން އެންމެ ކުޑަ ގޯތީގައި ވެސް 1250 އަކަފޫޓު ހުންނާނެ ކަމަށް ސަރުކާރުން ބުނެ އެވެ.
ހުޅުމާލެއިން ދޭ ބިންތައް މިހާރު ސާފުކޮށްފައިވާއިރު، ގޯތި ދިނުމަށް ހަމަޖެހިފައިވާ ގުޅީފަޅު ހިއްކުމުގެ މަޝްރޫއު މިހާރު ދަނީ ކުރިއަށެވެ. އަދި, ގިރާވަރު ފަޅު ހިއްކުމަށް ވަނީ ޕްލޭންކުރެވިފަ އެވެ.
