ރާއްޖޭގެ ސަލާމަތީ ބާރުތަަކަށް އަލަށް ނަގާ އޮފިސަރުންތަކެއްގެ ސައިކޮލޮޖިކަލް ފްރޮފައިލިން، އިންޑިއާގެ ގައުމީ ފޮރެންސިކް ޔުނިވާސިޓީއެއް މެދުވެރިކޮށް ހެދުމުގެ އެއްވެސް މަޝްވަރާއެއް ނުކުރާ ކަމަށް ސިފައިން މިއަދު ބުނެފި އެވެ.
އިންޑިއާގެ ގުޖުރާތުގެ ގާންދީނަގަރުގައި ހުންނަ ނޭޝަނަލް ފޮރެންސިކް ސައިންސަސް ޔުނިވާސިޓީ (އެންއެފްއެސްޔޫ)ގެ އިސް އޮފިޝަލުންތަކަކާ ހަވާލާދީ "އަހުމަދުއާބާދު މިރާ" ނޫހުގައި ބުނެފައި ވަނީ ރާއްޖޭގެ "ސަލާމަތީ ބާރުތަކާއި ގާނޫނު ތަންފީޒު ކުރާ އިދާރާތަކަށް" ރެކްރޫޓު ކުރާ އޮފިސަރުންގެ ސައިކޮލޮޖިކަލް އެސެސްމެންޓް ހަދާފައި ވަނީ ޔުނިވާސިޓީން ކަމަށެވެ.
ސިފައިން ވެސް ހިމެނޭ ގޮތަށް އެ ވާހަކަ ރާއްޖޭގައި ރިޕޯޓުކޮށްފައިވާތީ، އެމްއެންޑީއެފުން އެކަން ދޮގުކުރަމުން މިއަދު މީޑިއާތަކަށް ބުނެފައި ވަނީ، އެފަދަ ސައިކޮލޮޖިކަލް ޕްރޮފައިލިން ހެދުމުގެ އެއްވެސް މަޝްވަރާއެއް އެމްއެންޑީއެފުން ނުކުރާ ކަމަށެވެ.
އެންއެފްއެސްޔޫގެ ކެމްޕަސް ޑިރެކްޓަރު ޝަންކަރުރާއޯ ޗުނާރު، އަހުމަދުއާބާދު މިރާއަށް ވިދާޅުވި ގޮތުގައި، ދިވެހި ސަރުކާރުގެ އެދުމުގެ މަތިން އެ ޕްރޮފައިލިން ހެދީ އެ ޔުނިވާސިޓީގެ ސްކޫލް އޮފް ބިހޭވިއަރަލް ސައިންސްއިންނެވެ. އަދި އެ ޕްރޮފައިލިންތަކަށް ބިނާކޮށް، ސަލާމަތީ ބާރުތަކަށާއި ގާނޫނު ތަންފީޒު ކުރާ އިދާރާތަކަށް މީހުން ރެކްރޫޓުކޮށްފައިވާ ކަމަށް ވިދާޅުވި އެވެ.
އެކަމަކު، ސަލާމަތީ ބާރުތަކާއި ގާނޫނުތަންފީޒު ކުރާ އިދާރާތައް އޭނާ މާނަ ކުރީ ދިވެހި ސިފައިންގެ ގޮތުގައި ކަމެއް ނުވަތަ ފުލުހުންގެ ގޮތުގައި ކަމެއް އޭނާގެ ވާހަކައިން ސާފެއް ނޫނެވެ. މިކަމާ ގުޅިގެން އަދި ފުލުހުންގެ ބަހެއް ނުލިބެ އެވެ.
ސައިކޮލޮޖިކަލް ޕްރޮފައިލް ހަދަނީ އެ އިދާރާތަކަށް ރެކްރޫޓު ކުރާ މީހުންގެ ކިބައިގައި ހުރި ސިފަތަކުން އެ މީހުން އެކި ނުފޫޒުތަކަށް ލެނބުމުގެ ފުރުސަތު އޮތް މިންވަރާއި ނަސްފާނީ ހާލަތު އަންދާޒާ ކުރުމަށެވެ.
އެ ނޫހުން ރިޕޯޓުކޮށްފައިވާ ގޮތުގައި 187 އޮފިސަރެއްގެ ސައިކޮލޮޖިކަލް އެސެސްމެންޓް ހަދަން ރާއްޖެއިން އެދިފައިވެ އެވެ. އެއީ ދިވެހި ސަރުކާރާއި އެ ޔުނިވާސިޓީއާ ދެމެދު ކުރިން ސޮއިކޮށްފައިވާ އެމްއޯޔޫއެއްގެ ދަށުންނެވެ.
ދިވެހި 187 އޮފިސަރުންގެ ސައިކޮލޮޖިކަލް ޕްރޮފައިލިން ހެދި އެންއެފްއެސްޔޫގެ ވިޝާލް ޕަރުމާރު އެ ނޫހަށް ވިދާޅުވެފައި ވަނީ އެކަމަށް ޕޮލިގްރާފް މެޝިނުތަކާއި ސައިކޮލޮޖިކަލް ސްކްރީނިން ހެދުމަށް ބޭނުންކުރާ އެހެނިހެން ޓެކްނޮލޮޖީތައް ބޭނުންކޮށްފައިވާނެ ކަމަށެވެ. އެގޮތުން، އެ މީހުންގެ ވިސްނުމުގެ ގާބިލުކަން ހުރި މިންވަރާއި ހެވާއި ނުބައި ވަކިކުރުމުގެ ފެންވަރާއި ކުށުގެ ރެކޯޑާއި މުސްތަގުބަލުގައި އެ މީހުންގެ ކިބައިން ފެނިދާނެ އުޅުމާއި އަހުލާގު ވެސް އެނަލައިޒްކޮށްފައިވާ ކަމަށް އޭނާ ވިދާޅުވި އެވެ.
ސަރުކާރުން އިންޑިއާއާއެކު ސަލާމަތީ ދާއިރާގައި ވެސް ގާތް ގުޅުމެއް ބާއްވަމުން އަންނަ އިރު، އެ ގައުމުން ރާއްޖޭގެ ކަންކަމަށް ނުފޫޒު ފޯރުވާ ކަމަށް އިދިކޮޅު ޕީޕީއެމް/ޕީއެންސީއިން ތުހުމަތު ކުރެ އެވެ.
އެގޮތުން، އެ ގައުމުގެ ސިފައިން ރާއްޖޭގައި ތިބުމާއި ދެކޮޅަށް "އިންޑިއާ އައުޓް"ގެ ނަމުގައި އިދިކޮޅުން ހަރަކާތެއް ހިންގާފައިވާއިރު، އިރު އެ ޝިއާރު ބޭނުން ކުރުން ރައީސުލްޖުމްހޫރިއްޔާގެ ގަރާރަކުން ވަނީ މަނާކޮށްފަ އެވެ.
