ކޮލޮމްބިއާގެ އެމޭޒަން ޖަންގަލި ތެރެއަށް މަތިންދާބޯޓެއް ވެއްޓުނުތާ 40 ދުވަސް ފަހުން އެ ބޯޓުން ސަލާމަތްވި ހަތަރު ކުދިން ޖަންގަލި ތެރެއިން ފެނިއްޖެ އެވެ.
ކޮލޮމްބިއާގެ ރައީސް ވިދާޅުވީ އެއީ އެއް އާއިލާއެއްގެ ހަތަރު ބެއިން ކަމަށެވެ. އެއީ އުމުރުން 13 އަހަރާއި ނުވަ އަހަރާއި، ހަތަރު އަހަރާއި އެއް އަހަރުގެ ކުއްޖެކެވެ.
އެ ކުދިންގެ މަންމަ އާއި ދެ ޕައިލެޓުން މަރުވީ މޭ އެއް ވަނަ ދުވަހު ކުޑަ މަތިންދާބޯޓު ޖަންގަލި ތެރެއަށް ވެއްޓުމުންނެވެ. ބޯޓުން ކުދިން ނުފެނުމުން އޮފިޝަލުން ބޮޑު އޮޕަރޭޝަނެއް ފެށި އެވެ.
ރައީސް ގުސްތާވޯ ޕެތްރޯ ވިދާޅުވީ އެ ކުދިން ދިރިތިއްބާ ފެނުމަކީ ގައުމަށް ލިބުނު ބޮޑު އުފަލެއް ކަމަށާއި އެ ކުދިން ކުރި ބުރަ މަސައްކަތް ތާރީހުގައި ލިޔެވިގެން ދާނެ ކަމަށެވެ.
ކޮލޮމްބިއާގެ ޑިފެންސް މިނިސްޓްރީން އާއްމުކުރި ވީޑިއޯތަކުން ފެންނަނީ ޖަަންގަލި ތެރޭގައި ރެސްކިއު ޓީމުން އެ ކުދިންނަށް އެހީވާ މަންޒަރާއި ހެލިކޮޕްޓަަރެއްގެ އެހީގައި އެ ކުދިން ގެންދާ މަންޒަރެވެ.
މިހާރު އެ ކުދިން ތިބީ ސިއްހީ ފަރުވާއަށާއި މޮނިޓަރިންނަށް ވެރިރަށް ބޮގޯޓާގެ ހޮސްޕިޓަލެއްގަ އެވެ. އެ ކުދިންގެ މާމަ ފާތިމާ ވެލެންސިއާ ވަނީ ކުދިން ސަލާމަތްވުމުން ޝުކުރު އަދާކޮށްފަ އެވެ.
