ކުއިތޯ، އިކުއެޑޯ (އޮކްޓޯބަރު 19) - މަސްތުވާތަކެއްޗާ ހެދި ކުރާ ކުށްތައް ވަރަށް ބޮޑަށް އިތުރުވެފައި ވާތީ އިކުއެޑޯގައި ކުއްލި ނުރައްކަލުގެ ހާލަތު އިއުލާނުކޮށް ފުލުހުންނާއި ސިފައިން މަގުތަކަށް ނުކުންނަން އަންގައިފި އެވެ.
"މި ވަގުތުން ފެށިގެން ފުލުހުންނާއި ސިފައިން ހަތިޔާރާ އެކު މަގުތަކުގައި އުޅޭނެ. މުޅި އިކުއެޑޯގެ ސަރަހައްދުގައި އަޅުގަނޑުމެން މި އިއުލާނު ކުރަނީ ކުއްލި ނުރައްކަލުގެ ހާލަތު،" ރައީސް ގިލޭމޯ ލާސޯ ޓީވީ މެދުވެރިކޮށް ވިދާޅުވި އެވެ.
"އިކުއެޑޯގެ މަގުތަކުގައި ވަނީ އެންމެ ދުޝްމަނެއް. އެއީ މަސްތުވާތަކެތީގެ ވިޔަފާރި. މަސްތުވާތަކެތި ޓްރެފިކް ކުރާ ގައުމެއްގެ ގޮތުގައި އޮތް އިކުއެޑޯ އަކީ މިހާރު މަސްތުވާތަކެތި ބޭނުން ވެސް ކުރާނެ ގައުމެއް."
އިކުއެޑޯގައި ކުއްލި ނުރައްކަލުގެ ހާލަތު އިއުލާނު ކުރިއިރު، އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން މި ވަގުތު އެ ގައުމުގައި ހުންނެވީ ރަސްމީ ދަތުރެއްގަ އެވެ. ކޮލޮމްބިއާ އާއި އިކުއެޑޯ އަށް ކުރައްވާ ދަތުރުގެ ބޭނުމަކީ ގުޅުން ރަނގަޅު ކުރުމެވެ.
މި ދަތުރުގައި ބްލިންކެން އާއި ލާސޯ މަޝްވަރާ ކުރައްވާނީ ސެކިއުރިޓީ އާއި ޑިފެންސް އަދި ވިޔަފާރިއާ ގުޅޭ ކަންކަމުގަ އެވެ.
މި އަހަރުގެ ތެރޭގައި އިކުއެޑޯގައި ކުށް ކުރާ މިންވަރު ވަރަށް ބޮޑަށް ވަނީ އިތުރުވެފަ އެވެ. އެގޮތުން ޖެނުއަރީ އިން އޮކްޓޯބަރާ ހަމައަށް 1،900 މަރުގެ މައްސަލަ ރިޕޯޓު ކުރި އެވެ. ނަމަވެސް 2020 ވަނަ އަހަރު އައީ އެފަދަ 1،400 މައްސަލަ އެވެ.
ފަސްދޮޅަސް ދުވަސް ވަންދެން ތަންފީޒު ކުރާ ކުއްލި ނުރައްކަލުގެ ހާލަތުގައި 3،600 ސިފައިންނާއި ފުލުހުން މަގުތަކުގައި އުޅޭނެ އެވެ. އަދި އެ ގައުމުގައި ހުންނަ 65 ޖަލުގެ ސެކިއުރިޓީ ވެސް އިތުރަށް ވަރުގަދަ ކުރާނެ އެވެ.
ޖަލުތަކުގެ މައްސަލަ ވަރަށް ގޯސްވެފައި ވަނިކޮށް، އިއްޔެ އިކުއެޑޯގެ ޑިފެންސް މިނިސްޓަރު ކަމަށް މުޅިން އާ ބޭފުޅަކު އައްޔަނުކުރި އެވެ.
ރިޓަޔާޑް ޖެނެރަލް ލުއިސް ހެނަންޑޭޒް އެ މަގާމަށް އައްޔަނު ކުރީ "އެކަށީގެންވާ ވަރަށް އާއްމު ރައްކާތެރިކަން ނެތް މައްސަލަ" ހައްލު ކުރަން ކަމަށް ސަރުކާރުން ބުންޏެވެ.
އޭގެ ކުރިން ޑިފެންސް މިނިސްޓަރު ކަމުގައި ހުންނެވީ ފެނަންޑީ ޑޮނޯސޯ މަގާމުން ވަކިކުރި ސަބަބު ހާމަކޮށްފައެއް ނުވެ އެވެ.
މި އަހަރުގެ މިހާތަނަށް އިކުއެޑޯގެ ޖަލުތަކުގައި ހަމަނުޖެހުން ބޮޑުވެ 238 ގައިދީން މަރުވެފައި ވެ އެވެ.
