ބޮގޯޓާ، ކޮލޮމްބިއާ (އޮކްޓޯބަރު 24) - ކޮލޮމްބިއާގެ މަސްތުވާތަކެތީގެ ވިޔަފާރިއާ ގުޅިގެން ހޯދަމުންދާ އެ ގައުމުގެ އެންމެ ބޮޑު ކުށްވެރިންގެ ގޭންގުގެ ލީޑަރު ހައްޔަރުކޮށްފި އެވެ.
ޑައިރޯ އެންޓޯނިއޯ އުސުގާ ނުވަތަ އޮޓޯނިއެލް ހައްޔަރު ކުރީ ހޮނިހިރު ދުވަހު ސިފައިންނާއި، ވައިގެ ފައުޖާއި ފުލުހުން ގުޅިގެން ހިންގި އޮޕަރޭޝަނެއްގަ އެވެ.
އޭނާ އުޅޭ ތަނަކާ ގުޅޭ މައުލޫމާތު ފޯރުކޮށްދޭ މީހަކަށް 800،000 ޑޮލަރު ކޮލޮމްބިއާ ސަރުކާރުން ހުށަހަޅާފައި ވެ އެވެ. އެމެރިކާ އިން ވެސް ވަނީ އޭނާ ހައްޔަރު ކުރަން އެހީވާ ބަޔަކަށް ފަސް މިލިއަން ޑޮލަރު ދޭނެ ކަމަށް ބުނެފަ އެވެ.
ޓީވީ މެދުވެރިކޮށް ދެއްވި ހިތާބެއްގައި ރައީސް އިވާން ޑުކޭ ވިދާޅުވީ މިއީ ކޮލޮމްބިއާގައި މަސްތުވާތަކެތީގެ ވިޔަފާރި އަށް ދެވުނު ބޮޑު ގެއްލުމެއް ކަމަށާއި މި ގަރުނުގައި ވެސް މަސްތުވާތަކެއްޗާ ދެކޮޅަށް އެ ގައުމުން ހޯދި އެންމެ ބޮޑު ކާމިޔާބު ކަމަށެވެ.
"މިއީ 1990 ގެ އަހަރުތަކުގައި ޕަބްލޯ އެސްކޯބާ ވެއްޓިގެން ދިޔަ ފަދަ ހާލަތެއް،"
އޮޓޯނިއެލް ހައްޔަރު ކުރީ ކޮލޮމްބިއާ އާއި ޕެނެމާ ގުޅޭ ބޯޑަރު ސަރަހައްދުން އެންޓިއޯކިއާ ޕްރޮވިންސްގައި މީހުން މަދު ހިސާބެއްގައި ފިލައިގެން އުޅެނިކޮށެވެ. އެ އޮޕަރޭޝަނާ ގުޅޭ ތަފްސީލް އަދި ހާމަކޮށްފައި ނުވާއިރު، އެއް ފުލުހަކު މަރުވެފައި ވެ އެވެ.
އޮޓޯނިއެލްގެ އަތުގައި ބިޑި އަޅުވައި ހައްޔަރުކޮށްފައި ހުރި މަންޒަރު ފެންނަ ފޮޓޯ އާއްމު ކުރީ ސިފައިންނެވެ.
އުމުރުން 50 އަހަރުގެ ޑްރަގުގެ ބޮޑު ހައްޔަރު ކުރަން އެތައް ހާސް ސިފައިން ބައިވެރިކޮށްގެން ގިނަ އޮޕަރޭޝަންތަކެއް މީގެ ކުރިން ވެސް ހިންގާފައި ވެ އެވެ. ނަމަވެސް މިއީ އޮޕަރޭޝަނެއް ކާމިޔާބު ކުރެވުނު ފުރަތަމަ ފަހަރެވެ.
ގަލްފް ކްލޭންގެ ގޮތުގައި މަޝްހޫރު ގޭންގުގެ ލީޑަރު ކަމަށް އޮޓޯނިއެލް އައީ މީގެ 10 އަހަރު ކުރިންނެވެ. އެ ގޭންގުގެ ލީޑަރުގެ ގޮތުގައި ކުރިން ހުރި އޭނާގެ ބޭބެ މަރުވީ ފުލުހުން ދިން ހަމަލާއެއްގަ އެވެ.
ކޮލޮމްބިއާގެ އެންމެ ބާރުގަދަ ކުށްވެރިންގެ ގޭންގުގެ ގޮތުގައި ގަލްފް ކްލޭން ލޭބަލްކޮށްފައި ވާއިރު، އެމެރިކާ އިން އެ ގޭންގު ސިފަކުރީ ގިނަ ހަތިޔާރުތަކާ އެކު އަނިޔާވެރި އަމަލު ހިންގާ ބަޔެއްގެ ގޮތުގަ އެވެ.
ކޮލޮމްބިއާގެ ގިނަ ޕްރޮވިންސްތަކުގައި އޮޕަރޭޓުކޮށް، ބައިނަލްއަގްވާމީ ގުޅުންތައް ހުރި އެ ގޭންގު ގުޅިފައި ވަނީ މަސްތުވާތަކެއްޗާއި އިންސާނުން ޓްރެފިކް ކުރުމާއި، ގަވާއިދާ ހިލާފަށް ރަން މައިނު ކުރުމާއި، މަކަރު ހަދައިގެން ފައިސާ ހޯދުމާ އެވެ.
ގޭންގުގެ މެމްބަރުންގެ ގޮތުގައި ހަތިޔާރާ އެކު 1،800 މީހުން އުޅޭއިރު، އޭގެ ތެރެއިން ގިނަ މީހުންނަކީ އަސްކަރީ ތަމްރީން ލިބިފައި ތިބި މީހުންނެވެ. އާޖެންޓީނާ، ބްރެޒިލް، ހޮންޑިއުރަސް، ޕެރޫ އަދި ސްޕެއިން އިން ވެސް އެ ގޭންގުގެ މެމްބަރުން ހައްޔަރުކޮށްފައި ވެ އެވެ.
