ކޮލޮމްބިއާގައި އުފެދުނު އެންމެ ބާރުގަދަ އެއް ޑްރަގު ކާޓެލް ކަމަށްވާ ކާލީ ކާޓެލްގެ ލީޑަރު ގިލްބާޓޯ ރޮޑްރިގޭޒް އެމެރިކާގެ ޖަލެއްގައި މަރުވެއްޖެ އެވެ.
ދުނިޔޭގެ ކޮކެއިން ވިޔަފާރީގެ ބޮޑު ބައެއް 1980 އާއި 1990 ގެ އަހަރުތަކުގައި ކާލީ ކާޓެލް އިން ކޮންޓްރޯލް ކުރިއިރު އިސް ލީޑަރަކަށް ހުރީ ގިލްބާޓޯ އެވެ.
އޭނާ މަރުވިއިރު އުމުރަކީ 83 އަހަރެވެ. ވާދަވެރިންނަށް ވުރެ އަބަދުވެސް އެއް ފިޔަވަޅު ކުރީގައި އޭނާ ހުންނާތީ އެއް އިރެއްގައި އޭނާއަށް "ޗެސް ޕްލޭޔާ" ނުވަތަ ރާޒުވާ ކުޅުންތެރިޔާގެ ނަމުން ވެސް މުހާތަބުކުރި އެވެ.
ނަމަވެސް، ފުލުހުންނަށް ފިލައިގެން އުޅެނިކޮށް 1995 ގައި އޭނާ އަތުލައިގަނެ ކުށްވެރިން ބަދަލުކުރުމުގެ އެއްބަސްވުމެއްގެ ދަށުން 2004 ވަނަ އަހަރު އެމެރިކާއަށް ފޮނުވާލި އެވެ.
އޭނާ މަރުވިއިރު ގެންދިޔައީ ނޯތު ކެރޮލައިނާގެ ޖަލެއްގައި 30 އަހަރުގެ ޖަލު ހުކުމެއް ފުރިހަމަ ކުރަމުންނެވެ.
އެމެރިކާގެ ޑްރަގު އެންފޯސްމަންޓު އެޑްމިނިސްޓްރޭޝަން (ޑީއީއޭ) އިން ލަފާކުރާ ގޮތުގައި 1990 ގެ އަހަރުތަކުގައި ދުނިޔޭގެ ކޮކެއިން ވިޔަފާރީގެ 80 ޕަސެންޓު ކޮންޓްރޯލް ކުރީ ކާލީ ކާޓެލް އިންނެވެ.
ކޮލޮމްބިއާގެ ކޮކެއިން ވިޔަފާރީގެ ހުރިހާ ބާރެއް ގިލްބާޓޯގެ ކާޓެލް އަށް ލިބުނީ 1993 ގައި ޑީއީއޭ އިން މެޑެލިން ކާޓެލްގެ ލީޑަރު ޕަބްލޯ އެސްކޮބާ މަރާލުމުންނެވެ.
ގިލްބާޓޯގެ ކޮއްކޮ މިގުއެލް ވެސް ގެންދަނީ އެމެރިކާ ގައި ޖަލު ހުކުމެއް ތަންފީޒު ކުރަމުންނެވެ. ގިލްބާޓޯ ފުލުހުންގެ ބެލުމުގެ ދަށަށް ގެންދިޔަ ހިސާބުން ކާލީ ކާޓެލްގެ ހަރަކާތްތައް މަޑުޖެހި ކާޓެލް އަޑި އަޅާލި އެވެ.
