ކޮލޮމްބިއާގެ މަސްތުވާތަކެތީގެ ވިޔަފާރިއާ ގުޅިގެން ހައްޔަރު ކުރި އެ ގައުމުގެ އެންމެ ބޮޑު ކުށްވެރިންގެ ގޭންގުގެ ލީޑަރުގެ އިއުތިރާފުގެ ރެކޯޑިންތައް ވަގަށް ނަގައިފި އެވެ.
ޑައިރޯ އެންޓޯނިއޯ އުސޫގާ ނުވަތަ އޮޓޯނިއެލްގެ އިއުތިރާފުގެ ބަޔާން ރެކޯޑު ކުރީ ޓްރުތް ކޮމިޝަނުން މިދިޔަ ބުދަ ދުވަހު އެވެ. އެއީ ސަރުކާރާއި ފާކް ގްރޫޕާ ދެމެދު ހިނގި ދިގު ހަމަނުޖެހުމުގެ މައްސަލަ ތަހުގީގު ކުރާ ކޮމިޝަނެވެ.
އެ ކޮމިޝަނުން ހުކުރު ދުވަހު ނެރުނު ބަޔާނެއްގައި ބުނީ ކޮން ބަޔެއްކަން ނޭނގޭ ގްރޫޕަކުން ކޮމިޝަނުގެ އިންވެސްޓިގޭޓަރުގެ ގެޔަށް ދަންވަރު ވަނީ ފެބްރުއަރީ 18 ވަނަ ދުވަހު ކަމަށެވެ.
"އިންޓަވިއުގައި ބޭނުން ކުރި ޑިޖިޓަލް ރެކޯޑަރުތަކާއި ކޮމްޕިއުޓަރެއް އެ ގެއިން ވަގަށް ނެގި،" ބަޔާނުގައިވެ އެވެ.
މިދިޔަ ބުރާސްފަތި ދުވަހު އޮޓޯނިއެލްގެ ޝަރީއަތުގެ އަޑުއެހުމެއް ކުރިއަށް ދިޔައިރު، އޭނާ ފިލަން ރާވާފައިވާ ކަމަށް ބުނެ، ފުލުހުން އަޑުއެހުމަށް ވެސް ހުރަސް އެޅި އެވެ.
އުމުރުން 50 އަހަރުގެ އޮޓޯނިއެލް ހައްޔަރު ކުރީ މިދިޔަ އޮކްޓޯބަރު މަހު ކޮލޮމްބިއާގެ ހުޅަނގު އުތުރުގެ ބޯ ޖަންގައްޔަކުންނެވެ. އެ އޮޕަރޭޝަނުގައި 18 ހެލިކޮޕްޓަރު ބޭނުންކޮށް، 700 އަށް ވުރެ ގިނަ ޔުނިފޯމު އެޅި އޭޖެންޓުން ބައިވެރިވި އެވެ.
މަސްތުވާތަކެތި ޓްރެފިކް ކުރުމުގެ ތުހުމަތުގައި އެމެރިކާއިން ވަނީ އޭނާ ހައްޔަރު ކުރަން އަމުރެއް ނެރިފަ އެވެ. އެހެންވެ، ރައީސް އައިވަން ޑޫކޭގެ ސަރުކާރުން ބުނީ އެމެރިކާއަށް އެކްސްޓްރެޑައިޓް ކުރަން ބޭނުންވާ ކަމަށެވެ.
ކޮލޮމްބިއާގައި އޮޓޯނިއެލްއާ ދެކޮޅަށް ގިނަ ކުށްތަކެއް ސާބިތުވެފައިވެ އެވެ. އޭގެ ތެރޭގައި މަސްތުވާތަކެތި ޓްރެފިކް ކުރުމާއި، މީހުން މެރުމާއި، ޓެރަރިޒަމާއި، ކުށްތަކަށް ކުޑަކުދިން ރެކްރޫޓް ކުރުމާއި، ރަހީނު ކުރުން ހިމެނެ އެވެ.
އޭނާ އިސްކޮށް ހުރި ކްލޭން ޑެލް ގޮލްފޯއަކީ ކޮލޮމްބިއާގެ އެންމެ ބޮޑު މަސްތުވާތަކެތީގެ ގޭންގެވެ. އެ ގޭންގަކުން އަހަރަކު 300 ޓަނުގެ ކޮކެއިން އެކްސްޕޯޓް ކުރާ ކަމަށް ރަސްމީ ތަފާސްހިސާބުން ދައްކަ އެވެ.
