އައިޖީއެމްއެޗްގައި ވަޒީފާ އަދާކުރަމުން ދިޔަ ފިލިޕީންސްގެ ނަރުސް މޭރީ ގްރޭސް މަރާލި މައްސަލާގައި ދައުވާކުރާ ހަލީމަތު ލަމްހާއަށް ބަންދުގެ ލުޔެއް ދެވެން ނެތް ކަމަށް ކަނޑައަޅުއްވައި، ދައުލަތުން ހުށަހެޅި ހެކިންގެ ތެރެއިން އަދި ބާކީ 50 އެއްހާ މީހުންގެ ހެކިބަސް ނެގުން އެބަ އޮތް ކަމަށް މައްސަލަ ބައްލަވާ ގާޒީ ހުސައިން ފާއިޒު ރަޝާދު މިއަދު ވިދާޅުވެއްޖެ އެވެ.
މޭރީ މަރުވީ ބޮލަށާއި ކަރަށް ހަމަލާދީ ނޭވާ ހާސްކޮށްލައިގެން ކަމަށް އޮޓޮޕްސީ ރިޕޯޓުން ދައްކަ އެވެ. ފުލުހުންގެ ތަހުގީގު ނިންމުމަށް ފަހު އޭނާ މަރާލުމުގެ ދައުވާ ފިރިމީހާ މާވިންގެ މައްޗަށް އުފުލާފައިވާއިރު، މަރާލުމުގައި ބައިވެރިވުމުގެ ދައުވާ އުފުލާފައިވާ ލަމްހާއަކީ މާވިންގެ ލޯބިވެރިޔާ އެވެ.
މި މަރުގެ މައްސަލައިގައި، ކްރިމިނަލް ކޯޓުގައި ކުރިއަށްދާ ޝަރީއަތުގައި މި ދުވަސްވަރު ގެންދަނީ ދައުލަތުން ހުށަހަޅާފައިވާ ހެކިންގެ ހެކިބަސް ނެގުމެވެ. މިއަދު ވެސް ހަތަރު މީހެއްގެ ހެކިބަސް ނެގުނުއިރު، އެއީ އައިޖީއެމްއެޗްގައި އޭރު އަދި މިހާރު ވެސް ވަޒީފާ އަދާކުރަމުން އަންނަ ބައެއް މީހުންނެވެ.
ހެކިބަސް ނަގައި ނިންމުމަށް ފަހު، ލަމްހާ 100 ދުވަހަށް ބަންދުން ދޫކޮށްދިނުމަށް އޭނާގެ ވަކީލުން ހުށަހަޅުއްވައިފައިވެ އެވެ. ނަމަވެސް, ޝަރީއަތް ނިމެންދެން ލަމްހާ ބަންދުކުރަން ގާޒީ ކުރިން ނިންމެވި ނިންމެވުން ނިންމެވި ސަބަބު އަދިވެސް ވުޖޫދުގައި އެބަ އޮތް ކަމަށް ވިދާޅުވި އެވެ.
މޭރީ މަރާލީ މާވިން ކަމާއި، މަރާލުމުގައި ލަމްހާ ބައިވެރިވި ކަމުގެ ދައުވާ ސާބިތު ކުރުމަށް ދައުލަތުގެ ފަރާތުން 74 ޝަފައީ ހެކިން ހުށަހެޅުއްވި އެވެ. މިއަދުގެ އަޑުއެހުން ނިންމާލައްވަމުން ގާޒީ ވިދާޅުވީ އަދި ބާކީ 50 އެއްހާ މީހުން އެބަ ތިބި ކަމަށެވެ.
ދިފާއުގައި މާވިން އަދި ލަމްހާގެ ފަރާތުން ވެސް ޝަފައީ ހެކިތަކެއް ހުށަހަޅާފައިވެ އެވެ.
މައްސަލައިގެ ފަސްފަހަތް؛
މޭރީ ގްރޭސް އަކީ އައިޖީއެމްއެޗްގެ ޑައިލެސިސް ޑިޕާޓްމެންޓްގެ ނަރުހެކެވެ. އޭނާގެ ފިރިމީހާ މާވިންއާއި ލަމްހާއަކީ ކެޝުއަލްޓީގައި މަސައްކަތް ކުރާ ނަރުހުންނެވެ. ފިލިޕީންސްގައި ވަރިކުރުމަކީ މަނާކަމެއް ގޮތުގައި އޮތް އިރު، ލަމްހާއާއި މާވިން އުޅުނީ ސިއްރު ލޯބީގެ ގުޅުމެއް ބާއްވައިގެން ކަމަށް ތުހުމަތު ކުރެ އެވެ.
އޮކްޓޯބަރު 19, 2021 ގައި ގްރޭސް ދަންޖެހިގެން މަރުވި ކަމަށް ބުނެ މާވިން ރިޕޯޓް ކުރިޔަސް ތުހުމަތު ކުރެވޭ ކަންކަން ހުރުމުން ފުލުހުން ތަހުގީގު އިތުރަށް ހިންގަމުން ދިޔައީ އެވެ.
އަދި ގްރޭސް މަރާލި ކަމުގެ ތުހުމަތުގައި މާވިން ހައްޔަރު ކުރީ އެ އަހަރުގެ އޮކްޓޯބަރު 27 ގަ އެވެ. ލަމްހާ ހައްޔަރު ކުރީ އޭގެ 50 ދުވަސް ފަހުން އެ އަހަރުގެ ޑިސެމްބަރު 16 ގަ އެވެ.
މާވިންގެ މައްޗަށް އެނގި ހުރެ މީހަކު މަރާލުމުގެ ކުށުގެ ދައުވާ އުފުލާފައިވާއިރު، ލަމްހާގެ މައްޗަށް ކުރަނީ އެނގި ހުރެ މީހަކު މަރާލުމުގައި ބައިވެރިވުމުގެ ކުށުގެ ދައުވާ އެވެ.
އޭގެ އިތުރަށް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާއާއި ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ދައުވާ ވެސް ލަމްހާގެ މައްޗަށް ކުރެ އެވެ. އެ ދައުވާތައް ލަމްހާގެ މައްޗަށް ކުރަނީ އައިޖީއެމްއެޗުން ހުއްދަ ނުނަގައި، ނުރައްކާތެރި ބައެއް ބޭސްތަކެއް ލަމްހާ ނެގި ކަމަށް ތުހުމަތުކޮށެވެ.
