ދޮޅު ލައްކަ ރުފިޔާގެ މުދާ ހަވާލުކޮށް ތަނަކަށް ގެންދަން ބުނުމުން ފިލި ޓެކްސީއެއް އިއްޔެ ހޯދައިފި އެވެ.
ފުލުހުން ބުނީ ވެލާނާ އިންޓަނޭޝަނަލް އެއާޕޯޓުން އިލެކްޓްރޯނިކް ސާމާނުތަކެއް ހަވާލުކޮށް ތަނަކަށް ގެންދަން ބުނުމުން ފިލި ޓެކްސީ ހޯދީ ސީސީޓީވީ ކެމެރާ ބަަލައިގެން ކަމަށެވެ. ވަގަށް ނަގަން އުޅުނު މުދާ ވެރިފަރާތާ ހަވާލުކޮށްފައިވާ ކަމަށް ވެސް ފުލުހުން ބުނެ އެވެ.
"މާފަންނު ޕޮލިހުން އެތަކެތި ހޯދާފައިވަނީ ސީސީޓީވީ ފުޓޭޖުބަލައި އެ ޓެކްސީ ދެނެގަނެގެން. ރައްޔިތުންނަށް ކަމެއް ދިމާވާ ހިނދު ދިވެހި ފުލުހުން ތިބޭނީ އެހީތެރިކަން ފޯރުކޮށްދިނުމުގައި އަބަދުވެސް ރައްޔިތުންނާ އެންމެ ގާތުގައި. ކަމެއް ދިމާވާ ހިނދު ވީއެންމެ އަވަހަކަށް އަޅުގަނޑުމެންނަށް ރިޕޯޓުކުރައްވާ،" ފުލުހުން ބުނެފައިވެ އެވެ.
ފުލުހުންގެ ތަފާސްހިސާބުތަކަށް ބަލާއިރު މިއަހަރުގެ މިހާތަނަށް ވެސް އެންމެ ގިނައިން ރިޕޯޓުކޮށްފައި ވަނީ ވައްކަމުގެ ކުށްތަކެވެ. މިއަހަރުގެ މިހާތަނަށް 1310 ވައްކަމުގެ މައްސަލަ ވަނީ ރިޕޯޓުކޮށްފަ އެވެ.
ތަފާސްހިސާބުތަކަށް ބަލާއިރު މިދިޔަ އަހަރު ވެސް އެންމެ ގިނައިން ރާއްޖޭގައި ރިޕޯޓު ކުރީ ވައްކަމުގެ މައްސަލަތަކެވެ. މިދިޔަ އަހަރު ޖުމްލަ 3976 ވައްކަމުގެ މައްސަލަ ފުލުހުންނަށް ރިޕޯޓުކޮށް ތަހުގީގުކޮށްފައިވެ އެވެ.
