އޮޅުވާލައިގެން ފައިސާ ހޯދުމުގެ މައްސަލަތަކުގެ ތެރެއިން 60 ޕަސެންޓާއި ގާތްކުރާ އަދަދަކަށް މައްސަލަ ހިނގާފައިވަނީ ކޮންމެވެސް އެއްޗެއް ނުވަތަ ހިދުމަތެއް ލިބުމުގެ އުންމީދުގައި އަމިއްލަ އިހުތިޔާރުގައި ފައިސާ ޓްރާންސްފާ ކޮށްގެން ކަމަށް ބީއެމްއެލްގެ ސީއީއޯ ކާލް ސްޓުމްކަ ވިދާޅުވެއްޖެ އެވެ.
"އިންޓަނެޓުން، ނޫނީ ވައިބާ އިން ފެނިގެން އެއްޗެއް ގަންނަން އަމިއްލަ އަށް ފައިސާ ފޮނުވައިގެން ގިނަ ސްކޭމް ތައް ހިނގާފައި ހުރީ، ދަރިންގެ އަތަށް ފޯނު ދީގެން ވެސް ވަރަށް ގިނަ ފައިސާ ގެއްލިފައި އެބަހުރި،" ހޯމަ ދުވަހުގެ ރޭ ބޭއްވި ބީއެމްއެލް ގެ އަހަރީ އާންމު ޖަލްސާގައި އެ ބޭންކުގެ ސީއީއޯ ކާލް ސްޓުމަކް ވިދާޅުވި އެވެ.
އޭނާ ވިދާޅުވި ގޮތުގައި ދުނިޔޭގެ ހުރިހާ ހިސާަބެއްގައި ވެސް ސްކޭމްތައް ހިންގައިގެން ފައިސާ ހޯދުން ވަނީ އިތުރުވެފަ އެވެ. މީގެ ދެ އަހަރު ކުރިން ފޭސްބުކް ހެކް ކޮށްގެން ލީކުވި މައުލޫމާތުގެ ތެރޭގައި ރާއްޖެ އިން ފޭސްބުކް ބޭނުންކުރާ 80،000 މީހުންގެ ޕާސަނަލް މައުލޫމާތު ވެސް ހިނެމޭނެ ކަމަށް ވެސް ސްޓުމަކް ހާމަކުރެއްވި އެވެ. އެ މައުލޫމާތަކީ ވެސް ސްކޭމް ހިންގާ ފަރާތްތަކުން ބޭނުން ކުރާނެ މައުލޫމާތެވެ.
އެކައުންޓުގައި ހުންނަ ފައިސާ ގެއްލުމުގެ މައްސަލާގައި ބޭންކަށް އަމާޒުވާ ފާޑުކިޔުންތަކާއި ގުޅޭ ގޮތުން ކާލް ވިދާޅުވީ ބައެއް ހާލަތުގައި ބޭންކުން ވަކި އެއްޗެއް ނުބުނަނީ ކަސްޓަމަރުންގެ ފަރުދީ ހައްގުތަކާ ވެސް އެކަން ގުޅިފައިވާތީ ކަމަށެވެ.
"ބޭންކުގެ އިހުމާލަކުން ފައިސާ ގެއްލިއްޖެ ނަމަ، ބޭންކުން އެކަމުގެ ޒިންމާ ނަގާނެ،" ކާލް ވިދާޅުވި އެވެ.
އޭނާ ވިދާޅުވީ ސްކޭމް ތަކަށް ކަސްޓަމަރުން ހޭލުންތެރި ކުރުމަށްޓަކައި ފާއިތުވި އަހަރު ބޭންކުން މިލިއަނަކަށް ވުރެ ގިނަ އެސްއެމްއެސް ފޮނުވާފައި ވާނެ ކަމަށެވެ. އަދި, ޓީވީ އާއި ރޭޑިއޯ މެދުވެރިކޮށް ގާތްގަޑަކަށް 1,800 ފަހަރު އިސްތިހާރުކޮށް، ސްކޭމް އެވެއާނަސް އާއި ބެހޭ ގޮތުން 1.4 މިލިއަނަށް ވުރެ ގިނަ މީސްމީޑިއާ އިމްޕްރެޝަންސް ހަދާފައިވާނެ ކަމަށް އޭނާ ވިދާޅުވި އެވެ.
އިންޓަނެޓް ބޭންކިން ހިދުމަތް ބޭނުންކުރާ މިންވަރަށް ބަލާއިރު، މިދިޔަ އަހަރުތެރޭ އެވްރެޖްކޮށް ދުވާލަކު އިންޓަނެޓް އަދި މޮބައިލް ބޭންކިން މެދުވެރިކޮށް 232،000 އަށް ވުރެ ގިނަ މުއާމަލާތް ކޮށްފައިވެ އެވެ. ދުވާލެއްގެ މައްޗަށް ދެ މިލައަނަށް ވުރެ ގިނަ މޯބައިލް ބޭންކިން ލޮގިން ރިކޯޑް ކުރެވިފައިވާއިރު، ފާއިތުވި އަހަރު އިންޓަނެޓް ބޭންކިން މެދުވެރިކޮށް ވަނީ 85 މިލިއަނަށް ވުރެ ގިނަ މުއާމަލާތްކޮށްފައިވާކަން ބީއެމްއެލްގެ ތަފާސްހިސާބުތަކުން އެނގެ އެވެ.
